Azadlığın yolu
ədəbiyyatdan keçir
“Bizim
ədəbiyyatımızın xalqımıza etdiyi ən
böyük xidmət ondan ibarətdir ki, şairlərimiz,
yazıçılarımız öz əsərləri ilə
Azərbaycanda, xalqımızda, millətimizdə daim
hissiyyatları oyatmağa çalışırlar, milli
özünüdərki, milli oyanış, milli dirçəliş
prosesi xalqımıza birinci növbədə ədəbiyyatdan
gəlir”.
Təbii ki, ulu öndər Heydər Əliyevin dərin müşahidə və qənaətlərinin ümumiləşdirilmiş ifadəsi olan bu fikir əslində ədəbiyyatımızın yanında olan, bütün zamanlarda milli dəyərlərimizin, vətəndaşlıq duyğularımızın yaşadılması və inkişaf etdirilməsi çabası göstərmiş söz sənətimizin tarixi yerini düzgün dəyərləndirən Azərbaycan insanının mövqeyini ifadə edir. Deyək ki, insan üçün ana südü necə müqəddəs, əvəzolunmaz bir nemətdirsə, ədəbiyyat, söz sənəti üçün də azadlıq duyğuları, vətəndaşlıq qayəsi həmin dəyərdə olub. Ədəbiyyatımız bu sahədə heç vaxt seyrçi mövqe tutmayıb, milli dəyərlərə sədaqət, azadlıq, müstəqillik ideyalarına birmənalı mövqe sarıdan söz sənətimiz həmişə öndə gedib. Xalq şairi Səməd Vurğun
Kiçicik bir sudur yer üzündə Kür
Baxsan bu dünyanın xəritəsinə.
Bəs niyə qəlbimdə ümman döyünür
Mən qulaq asanda Kürün səsinə -
misraları ilə əslində bircə çayı ilə ölkəmizin dünyanın coğrafi xəritəsində tutduğu önəmli mövqeni ortaya qoyurdu. Şairin “niyə” sorğusunun cavabı, altında əslində bir ucu qardaş Türkiyədən başlayıb Xəzər doğmalığına can atan bir dünyanın, bar-bərəkət mənbəyinin bütöv obrazı göz önünə gətirilirdi. Eyni zamanda, vətənin kiçicik bir çayının belə hansı doğma, əbədi, əzəli doğmalıqdan keçib gəldiyinin sətiraltı anlamı diqqətə çatdırılırdı. Böyük şairin bu qürurlu misralarını məşhur “Azərbaycan” şeri daha da parlaq şəkildə irəli aparırdı. Elə bil ki, istiqlal şairi Əhməd Cavadın “Azərbaycan” şeirində ifadə edilən mətləbin davamı S.Vurğunun “Azərbaycan”ında bir az da cilalanır, bir az da tribun şəkildə ifadə etdirilirdi. Əhməd Cavad və Səməd Vurğundan başlayan bu tendensiya Məhəmməd Hüseyn Şəhriyarın “Azərbaycan”ında artıq öz mübarizə, siyasi yetkinlik iradəsini ortaya qoyur, azərbaycançılıq savaşının açıq-aşkar meydanından dünyaya səsləniş edirdi:
Könlüm quşu qanad çalmaz,
Sənsiz bir an, Azərbaycan.
Xoş günlərin getmir müdam
Xəyalımdan, Azərbaycan.
...Ya Rəbb, nədir
bir bu qədər
Ürəkləri qan etməyin?
Qolubağlı qalacaqdır
Nə vaxtacan,
Azərbaycan?!
...Övladların nə vaxtacan
Tərki-vətən olacaqlar?
Ələ-ələ ver, üsyan elə,
Oyan, oyan, Azərbaycan!
...Şəhriyarın ürəyi
də
Səninkitək yaralıdır.
Azadlıqdır mənə məlhəm,
Sənə dərman, Azərbaycan!
Bu, təkcə doğma
vətənimizin təbiət
gözəlliklərini, bol
sərvətini, iqlim özəlliklərini ortaya
qoyan poetik tərənnüm, tablo yox, azadlıq savaşının yolunu açan, istiqlala, hürriyyətə səfərbər
edən himn, hayqırtı idi.
Öz zamanında türkçülük,
eyni fikir ucalığı ilə azərbaycançılıq düşüncəmizin
formalaşması və
irəli aparılması
yolunda M.Ə.Rəsulzadə,
Əli bəy Hüseynzadə, Ə.Ağaoğlu,
Ziya Göyalp və başqaları hansı mücadiləni, hürriyyət savaşını
aparıblarsa Hüseyn
Cavid, Əhməd Cavad, Mikayıl Müşfiq, Rəsul Rza, Bəxtiyar Vahabzadə, Şəhriyar,
Söhrab Tahir, Balaş Azəroğlu, Əlu Tudə, Məmməd Araz, Nəriman Həsənzadə,
Məmməd İsmayıl,
Sabir Rüstəmxanlı,
Şahmar Əkbərzadə,
Rüstəm Behrudi və başqaları da həmin fikir-düşüncə
ucalığıyla yazıb-yaradıblar.
Birmənalı demək olar
ki, Azərbaycan milli düşüncəsinin
totalitar sovet imperiya siyasətinə yenilməməsi yolunda şair və yazıçılarımız əsl fədai kimi fəaliyyət göstərmiş, mədəniyyətimizi
“xalqımızın milli
sərvəti və intellektual mülkiyyətinə
çevirə bilmişdilər”.
Onların, bütün basqı
və təzyiqlərinə
baxmayaraq Azərbaycan insanının “yeni əsrə, yeni müstəqilliyə Qorqud
irsinin bayrağı altında, Qorqud övladları, Qorqud mənəviyyatını yaşadan
insanlar kimi qədəm qoymasında müstəsna xidmətləri
olub.
Hələ vaxtilə xalq yazıçısı Mirzə
İbrahimov böyük
Azərbaycan şairi M.H.Şəhriyarın “Heydərbabaya
salam” poemasından bəhs edərkən bu gözəl əsərin tarixi yeri və aşıladığı
vətəndaşlıq duyğusundan
bəhs edərkən
dərin qədirbilənlik
hissi ilə yazırdı: “Bu poema şairin vətənpərvərlik
duyğularının, humanizminin
parlaq ifadəsidir. Bütün bunların içində böyük bir ürəyin həsrəti
duyulur, çox uca bir amalın
işığı görünür,
şairin yaxşılığa,
milli oyanışa, birliyə çağıran
rübabının səsi
qulağımıza gəlib
çatır”.
Ədəbiyyatımızda milli azadlıq mücadiləsinin
Mirzə Cəlil, Əli bəy Hüseynzadə, H.Cavid, Ü.Hacıbəyli, Cəfər
Cabbarlı, Əhməd
Cavad örnəkləri
var. Bu mücadilə Mirzə
İbrahimov, Mir Cəlal,
Bəxtiyar Vahabzadə,
Balaş Azəroğlu,
Söhrab Tahir, Məmməd Araz kimi yazıçı və şairlərin timsalında zaman-zaman davam və inkişaf
etdirilib.
Görkəmli yazıçı Mir Cəlalın məşhur
“Bir gəncin manifesti” əsərinin qəhrəmanlarından və
ən unudulmazlarından
biri olan Sona ana ehtiyac
üzündən bazara
çıxardığı cehizlik xalçasını
daha çox pul təklif edən xarici, gəlmə adama satmayıb, “itə ataram, yada satmaram”-deyə onun təklif etdiyi puldan imtina etməsi
əslində xalqımızın
milli mücadiləsinin
manifesti idi. Bu səhnə hər bir Azərbaycan insanının üzünə
milli düşüncənin,
özünüdərkin qapısını
açırdı və
cəsarətlə demək
olar ki, Mir Cəlalın Sona ana obrazına qədər heç bir sovet yazıçısı
milli baxışın,
düşüncənin açıq-aşkar
savaşını bu qədər dolğunluğu
və qabarıqlığı
ilə verə bilməmişdir. Bu obraz əslində ayrı-ayrı fərdin, mücadilə fədailərinin
yox, bütöv xalqın, millətin ümumiləşdirilmiş obrazı
olaraq hər kəs üçün başa düşülən,
dərk olunan və əziz idi. Sona xanımın “itə
ataram, yada satmaram” kəlməsi əslində bu baxımdan mətnin ümumi tərkibindən alınaraq ayrıca aforizm şəklində işlənməyə başlanmışdı.
Azərbaycan oxucusu bu aforizmin daşıdığı
daxili mənaya hesablandıqca dönüb
Sona ananın özü olur, onun əxlaqı və düşüncəsinə
hesablanırdı. Bu baxımdan, Mir Cəlalın
Azərbaycan oxucusuna daha yaxın olan Sona ana
obrazı xalqımızın
mənəvi yaddaşında
parlaq bir xalq qəhrəmanı simvolu olaraq həmişə yaşayır
və xatırlanır.
Nəsrdə Mirzə İbrahimovun
“Gələcək gün”,
Fərman Kərimzadənin
“Qarlı aşırım”,
Mövlud Süleymanlının
“Köç”, Sabir Əhmədlinin “Aran” əsərlərinin ehtiva
etdiyi azadlıq mücadiləsi poeziyada “Heydərbabaya salam” (Şəhriyar), “Gülüstan”
(B.Vahabzadə), “Nəriman”
(N.Həsənzadə) poemalarında,
R.Rza və S.Rüstəmxanlının şəhər
sovetinin sədrinə
ünvanladıqları şeirlərində
öz parlaq tribun fəaliyyətini ortaya qoyur, yetişməkdə
olan nəslin ideya-məfkurə gəlişmələrinə
milli azadlıq mübarizəsi nöqteyi-nəzərindən
istiqamətverici təsirini
göstərirdi. Belə deyək
ki, adlarını çəkdiyimiz əsərlərin
hər biri öz dövrü üçün “bütöv
bir ordunun görə biləcəyi
işi təkbaşına
yerinə yetirə bilmiş”, tarixi vəzifələrini ləyaqətlə
başa vurmuşlar.
Təəssüf hissi ilə qeyd olunmalıdır ki, bəzən bu böyük haqların üstünə
kölgə salmaq çabaları olur. Milli düşüncəmizin
formalaşmasında, azadlıq
mücadiləmizin inkişafında,
daha geniş şəkildə vüsət
tapmasında xüsusi
əməyi olan şair və yazıçılarımızın parlaq yaradıcılığı
üstünə kölgə
salmaq cəhdləri olur. Unudulur ki, xalq şairi Süleyman Rüstəm məşhur
“Zalım, sən mənim ana dilimə dəymə”, “Deyirəm ki, bu quruluş dağılacaq” misralarını,
Şəhriyara məktublarını
məhz o çətin
illərdə yazıb.
Rəsul Rza “Ağ fil”, “Sarı dana”, “Qaz və onun
balaları” kimi şeirlərini o illərdə
nəşr etdirib. Xəlil Rza Ulutürk “Əsl Azərbaycan oğullarını öz
kişi bətnimdən
doğacağam mən”
misralarını o illərin
senzura basqıları
altında yazıb.
Şahmar Əkbərzadə “Mərkəzi poçtxana”
şerini, Məmməd
Araz, Məmməd İsmayıl, Söhrab Tahir Cənub həsrətli şeirlərini
o illərdə oxucu diqqətinə təqdim ediblər.
Bu əsərlərin hər biri qaranlıqda
parlayan, bir anda yüzilliklərin qatı dumanını yarıb keçə bilən nicat işığı kimi xalqın azadlıq yolunu işıqlandırıb,
ona istiqamət, başlıca olaraq milli dirəniş gücü verib. Nüsrət Kəsəmənlinin “Qəhrəman
şəhərlər cərgəsinə
siz yazın, Bakımın da adını yazın!” səslənişi məhz
bu düşüncələrdən,
bu örnəkdən gəlirdi. Xəlil Rzanın “Azadlığı
istəmirəm zərrə-zərrə,
qram-qram, qolumdakı zəncirləri qıram gərək, qıram gərək!” dirənişi
məhz bu mücadilə silsiləsindən
qaynaqlanırdı. Rəsul
Rza bu təməl
üzərindən səslənirdi
ki, mübarizə bu gün də
var, yarın da – mən də
onun ən ön sıralarında!
Filologiya üzrə fəlsəfə
doktoru Sona Vəliyevanın yazdığı
kimi, Azərbaycançılıq
ideologiyasının ardıcıl
və məqsədyönlü
formalaşması yolunda
ədəbiyyatımız həmişə
böyük mücadilə
aparıb və bu örnəklər yetərincə öyrənilməli,
tədqiq olunmalıdır.
Gülayə
Kaspi.-2014.-12-14 iyul.-S.15.