SÖHBƏT FUAD POLADOVDAN GEDIR...

M.Əlizadə: “O, xalqının milli sərvəti olan aktyordur. Biz buna biganə yanaşmamalıyıq”

Xalq artisti Fuad Poladov Akademik Milli Dram Teatrı ilə yollarını ayırdı. O, aktyor Hikmət Rəhimovun işdən qovulmasına etiraz əlaməti olaraq belə bir addım atdığını bildirib. Xalq artistinin ana teatrın səhnəsindən uzaqlaşması teatr ictimaiyyətində böyük rezonansa səbəb olub. Məsələ ilə bağlı tanınmış incəsənət xadimləri öz müvasibətini bildirib. Xalq artisti Rasim Balayev Fuad Poladovun Akademik milli Dram Teatrından gedişi ilə bağlı deyib ki, onun kimi aktyorun gedişi Akademik teatr üçün xoş hadisə deyil: "Fuad Poladovun gedişini eşitdim. Çox üzüldüm. Görünür incidiblər, bu da xoşuna gəlməyib. Əcəb edib gedib. Düz edib. Yəqin ki, teatr bu gedişlə çox şey itirəcək. Fuad kimi aktyor indi yoxdur, azdır. Gündən-günə azalırıq”.

Teatrşünas, əməkdar incəsənət xadimi, professor Məryəm Əlizadə: "Fuad yanlış iş tutan adam deyil. Əgər bu qərarı veribsə, deməli, güclü motivləri var. Arzu edirəm ki, motivlər aradan götürülsün və Fuad öz doğma teatrına qayıtsın. Biz teatr cameəsi, bütünlüklə Azərbaycan tamaşaçısı onun gedişinə etiraz edək. Onu gedişi adi hal kimi qəbul edilməməlidir. Bu adam elə-belə aktyor deyil axı. O, xalqının milli sərvəti olan aktyordur. Biz buna biganə yanaşmamalıyıq. Mən öz adımdan deyirəm ki, bizim teatr xadimləri - başda Azər Paşa Nemət olmaqla - çalışmalıyıq ki, böyük aktyorumuz öz doğma, ana teatrına qayıtsın”.

Teatrşünas, əməkdar incəsənət xadimi, professor Aydın Talıbzadə:

"Bir Fuad Poladov bütöv bir aktyor truppasına bərabər sənətçidir. Azərbaycanda Fuad Poladovdan bir dənədir, bir nüsxədir, təkrarsızdır. Hər bir teatr onu öz səhnəsində görməkdən şərəf duyar. O, əgər bugün Milli Teatrdan gedirsə, kiməsə görə getmir. Bu, aksiyadır, bir aktyorun teatr sənətinin bu gününə etirazıdır, Milli Dram Teatrında olan vəziyyətə etirazıdır, sənət prinsiplərini pozanlara etirazıdır. Di gəl ki, mənim üçün Fuad Poladov nə dərəcədə dəyərli bir sənətçidirsə, Azərpaşa Nemətov da bir o qədər dəyərlidir. Və mən bu iki şəxsiyyəti "Hamlet” tamaşasından üzü bu yana dost görmüşəm, sənət tərəfdaşı görmüşəm. Azərpaşa son 10-15 ildə tamaşalarını məhz Fuad üçün qurub, onun imkanlarını nəzərə alaraq qurub. Əgər Fuad bugün teatrı tərk eləyirsə, tamaşalarından imtina eləyirsə, deməli, bunun çox mühüm və dərin səbəbləri var. Lakin bununla yanaşı hamı bilməlidir ki, Fuad Poladovun yeri Rus Dram Teatrı deyil, Milli Teatrdır və o, hər dəfə məcbur qalıb əlacsızlıqdan, bekar dayanmamaqdan ötrü Rus Dram Teatrını tərcih edir”.

Xalq artisti Fəxrəddin Manafov: "Bu, mənə çox pis təsir etdi. Teatrda xoşagəlməz hadisələr baş verir. Rəhbərlik dəyişilir, amma problem həll edilmir. Yenə deyirəm, bilmirəm nə baş verir, bilmirəm nəyə görə gənc aktyor oradan çıxıb, yoxsa çıxarılıb. Mən, sadəcə, mediadan eşitdiklərimi, gördüklərimi deyirəm. Deməli, orda nəsə baş verir ki, Azərbaycan teatrında yeganə professional, - bunu qorxmadan və tam məsuliyyətimlə deyirəm - və dünya səviyyəsində peşəkar olan bir aktyor, teatra o qədər töhfələr vermiş insan teatrdan gedir. Demək o məcburiyyət qarşısında olub. Təsəvvür edə bilməzsiniz ki, Fuad necə gözəl insandır. Onun qədər öz peşəsinə sadiq, öz peşəsinə dəlicəsinə sevgisi, münasibəti bugünkü aktyorların heç birində görməmişəm. O baxımdan düşünürəm ki, əgər belə bir insan, belə bir böyük aktyor, mənim özümə örnək hesab etdiyim bir adam teatrdan gedirsə, deməli, orda nəsə baş verir. Və baş verənlərin səbəbi məhz aktyorun özündə deyil. Onu tanımasaydım, bunu deməzdim. O məcburiyyət qarşısında bu addımı atıb. Orda nə baş verdiyini isə araşdırmaq lazımdır. Yəqin bu Mədəniyyət və Turizm Nazirliyinin teatr şöbəsi tərəfindən öyrənilməli, araşdırılmalıdır. Fuad Poladovun getməsi Azərbaycan teatrına, Akademik Milli Dram Teatrına böyük zərbədir. Əgər o gedirsə, bu teatda kim qalacaq? Bu məsələnin bir tərəfidir. O biri tərəfdən mənə elə gəlir ki, Fuad müəllim tamaşaçıları intizarda qoymaz, tamaşaçıların Fuad müəllimə böyük ehtiyacı var. Ümidvaram ki, o, bunları da nəzərə alacaq”.

Akademik Milli Dram Teatrının aktrisası Xalq artisti Firəngiz Mütəllimova: "Bu yaxında Fuadla teatrda görüşdük, söhbət etdik. Amma olanlardan xəbərim yoxdur. Bir aktrisa kimi onun getməyini istəməzdim. Açığı, başqa nəsə bilmirəm, bilmədən də bir söz deyə bilmərəm. Bir də görürsünüz, sayt yazır, amma sonra başqa cür olur. İşə gedəcəm, məsələni orda dəqiq öyrənəcəm”.

Aktrisa Fuad Poladovla uzun illər tərəf müqabili olduğunu bildirib: "İndi repertuarda eyni tamaşada rol almırıq. Amma vaxtilə biz çox tamaşalarda bərabər oynamışıq. Elə "Təhminə və Zaur” tamaşasını deyə bilərəm. Uzun illər bu tamaşada bərabər oynadıq. Fuad qabiliyyətli, layiqli, ən sevdiyim aktyorlardan, tərəf müqabillərindən biridir. İnsan kimi də onu çox istəyirəm”.

Əməkdar artist Mehriban Zəki: "Fuad Poladovu teatrda saxlamaq üçün teatr, mədəni ictimaiyyət mütləq addım atmalıdır: "Söhbətlərdən xəbərim var, eşitmişəm. Amma mən Fuad müəllimə heç bir fikir, heç bir söz demədim. Hər insanın qərarı onun şəxsi işidir. Amma mən hesab edirəm ki, bu addım şəxsi iş olmaqdan çıxır. Fuad müəllim boş yerə, ağlına gələn ilk fikirlə bu addımı atmır, kapriz eləmir. Hansısa bir fikri var və onu bu addımı atmağa vadar edib. Əvəzində hesab edirəm ki, teatr cəmiyyəti onu bu mövqeyindən, bu fikrindən daşındırmaq üçün addımlar atmalıdır. Çünki Fuad müəllim Azərbaycan teatrına çox lazımdır. Şəxsən mənə, bir çox aktyorlara, teatr cəmiyyətinə, teatr tamaşaçısına lazımdır. Onu bu teatr mədəniyyətində, bu teatr sənətində saxlamaq üçün teatr, mədəniyyət ictimaiyyəti mütləq addım atmalıdır. Bu sadəcə kapriz deyil. Bu bir mövqedir və onu burda saxlamaq üçün ona qarşı mütləq getmək lazımdır. Əks halda bu, bizim üçün çox utancverici bir məqamdır”.

Türkiyədə fəaliyyət göstərən azərbaycanlı aktrisa Məlahət Abbasova Fuad Poladovun Akademik Dram Teatrını tərk getməsinə sərt reaksiya verib. Aktrisa fikirlərini sosial şəbəkədə bölüşüb: "İndi saytlardan Fuad Poladovun teatrdaxili bir münaqişə, həm də bəsit bir münaqişə səbəbindən "Azdrama”dan getdiyini oxuyuram. Dahi, xalqın qəlbində taxt qurmuş bir aktyorun bəsit bir məsələyə görə teatrdan gedişini alqışlayanları başa düşə bilmirəm. Səhnəmiz, teatrımız, tamaşalarımız, tamaşaçılarımız yetim qaldı. Bunu alqışlayırsınız? Bizim səhnədə necə Fuadımız var? Çoxu dünyasını dəyişdi. Həyatda qalanlar da o qədər azaldı ki…Və ən dəhşətlisi gedənlərin yeri doldurulmadı. Bu gedişatla uzun illər də doldurulmayacağını düşünürəm. Əlimizdə qalan bu nadir aktyor və aktrisaların teatrdan getməsini necə alqışlaya bilirsiniz? Səfurə xanım da, Zərnigar xanım da küsüb getmişdilər. Hər kəs alqışladı. Nəyi alqışlayırsınız? Və neçə gün alqışladınız? Üç gün. Sonra hamısı unuduldu. İndi harda olduqlarını bilən də yoxdur. Hardadılar, nə edirlər? Səhnəmizin ulduzları əlimizdən tək-tək sürüşüb gedir, siz isə alqışlayırsınız. Soruşuram, nəyi alqışlayırsınız? Fuad müəllimin qürurunu, mərdliyini alqışlayırsınız? Kim itirir? Yenə biz itirmirikmi? Səhnəmiz itirmirmi? Tamaşaçımız, tamaşaçılarımız itirmirmi? Bunu alqışlayırsınız? Üç gün sonra hər şey unudulacaq, eynilə teatrdan küsüb gedən digər aktyor və aktrisalar kimi”.

Akademik Milli Dram Teatrının bədii rəhbəri-direktoru, xalq artisti Azər Paşa Nemət APA-ya açıqlamasında xalq artisti Fuad Poladovun teatrdan işdən getməsi qərarına belə münasibət bildirib: "Məsələnin mahiyyəti ondan ibarətdir ki, Fuad Poladov teatrdan getmək haqqında rəsmi müraciət etməyib. Əmək Məcəlləsinə görə, hər hansı dövlət və özəl qurumun əməkdaşı işdən gedəndə ərizə təqdim etməlidir. Fuad Poladov bizə ərizə təqdim etməyib. Əgər Akademik Milli Dram Teatrındakı işindən getmək istəyirsə, bu onun qərarıdır, şəxsi fikridir. Bunu demək vacibdir ki, Fuad Poladovun əsas iş yeri Dövlət Rus Dram Teatrıdır. O, Akademik Milli Dram Teatrında əvəzçilik üzrə çalışır.

Mənim Fuad Poladova münasibətim bəllidir, görkəmli aktyor kimi onun sənətini hər zaman qiymətləndirmişəm. Quruluşçu rejissor kimi hazırladığım "Hamlet”, "Şah Qacar”, "Afinalı Timon”, "Boy çiçəyi” tamaşalarımda Fuad Poladov baş rollarda iştirak edib. Təvazökarlıqdan uzaq qəbul etməyin, bu tamaşalar həm sənət faktı, həm rejissor işi, həm də aktyor oyunu baxımından çox böyük maraqla qarşılanıb. Bunu teatrşünaslar da yazıb, sıravi tamaşaçılar da deyib. Bu mənim rejissor kimi Fuad Poladova münasibətim deməkdir. Yeri gəlmişkən, onu da deyim ki, "Afinalı Timon” tamaşasını mən Fuad Poladovun 60 illik yubileyinə hədiyyə kimi hazırlamışdım və bunu hələ illər əvvəl müsahibəmdə demişdim. Bu fakt da mənim Fuad Poladova münasibətimin göstəricisidir. Əgər Fuad Poladov bizimlə birgə çalışmaq istəmirsə, ona yalnız uğurlar arzu edə bilərəm, fikrinə hörmətlə yanaşıram. Bu cür hadisələr yaradıcı mühitdə, teatrlarda tez-tez olur və mətbuatın bu məsələdə həssas olmasını, şou yaratmamasını arzu edirəm”.

Xəyalə Rəis

Kaspi.-2016.-3 noyabr.-S.11.