“Bu konsertimdə tamaşaçıları təəccübləndirəcəyəm”

Nəzakət Teymurova: Solo-konsertdə səhnəni kimləsə paylaşmağı sevmirəm, qəbul da etmirəm

İyun isti yay aylarının xəbərçisidir. Bu ayda insanlar yay istirahətlərini necə keçirəcəkləri haqqında düşünür, indidən planlar qurmağa başlayırlar. İl ərzində sərasər çalışanlar tətil planları qurduqları halda, xalq artistimiz, xanəndə Nəzakət Teymurova növbəti solo-konsertinə hazırlaşır. İyunun 22-də Yaşıl Teatrda solo konsert proqramı ilə tamaşaçılarının görüşünə gəlməyi planlaşdıran xalq artisti bütün enerjisini toplayıb, fərqli bir ampluada özünü təqdim edəcək. Xanəndə konsertqabağı öz təəssüratlarını bizimlə bölüşdü. Deyir ki, konsert ifaçının özünə bir hesabatıdır. Deyir ki, bu konsertində fərqli bir repertuarla səhnəyə çıxacaq və bir çoxları buna təəccüblənəcək. Çünki bu konsert onun digər konsertlərinə bənzəməyəcək.

- Nəzakət xanım, hazırlıqlar necə gedir? Bizi necə bir konsert proqramı gözləyir.

- Diqqətiniz üçün təşəkkür edirəm. Hələ ki hazırlıqlar davam edir, məşqlər gedir. İyunun 22-də Yaşıl Teatrda tamaşaçıları çox gözəl bir konsert proqramı gözləyir. Konsertdə aşıq mahnıları olacaq. Nəinki aşıq mahnıları, ilk dəfə mənim ifamda tamamilə yeni repertuar olacaq. Tamaşaçıları gözəl istirahət gözləyir. İndidən deyirəm ki, bu mahnıları dinləməyə dəyər. Konsert çox fərqli olacaq.

- Fərqli deyərkən nəyi nəzərdə tutursunuz?

- Bu günə qədər konsertlərdə kamera orkestri, xalq çalğı alətləri ansamblı, 3-lük trio şəklində çıxışlar etmişəm. Bu dəfə daha fərqli bir konsert proqramı olacaq. İndiyə qədər müraciət etmədiyim xalq, bəstəkar mahnılarına, aşıq musiqilərinə üz tutmuşam. Məkana uyğun olaraq repertuar qurmuşuq. Konsertdə indiyə qədər ifa etmədiyim, az hallarda müraciət olunan bəstəkar mahnıları, xalq mahnıları səslənəcək. Bir sözlə, indiyə qədər ifa etmədiyim musiqiləri seçmişik. Xalq mahnılarını da yeni aranjemanda, fərqli tərzdə oxumaq istədim. Tamaşaçı yeniliyi sevir. Müasir dövrümüzdə tamaşaçı zövqünə xitab etmək çətindir. Düşünürəm ki, tamaşaçı bu konsertdən zövq alacaq. Yeni üslubda səhnəyə çıxacam. Bu konsertdə tamaşaçı daha böyük dinamika hiss edəcək. Sənətçi performans göstərirsə, maraqlı görünür. O performans təkcə səhnədə dinamik hərəkətlə ölçülmür. Bəzən səsin dinamikası bütün hərəkətləri əvəz edə bilir. Yaşıl Teatrın tələb etdiyi repertuarla tamaşaçını təəccübləndirmək istəyirəm.

- Bu sizin ölkə daxilində verdiniz neçənci konsert olacaq?

- Açığı, heç saymamışam. Ona görə də sizə dəqiq deyə bilmərəm. Amma indiyə qədər saysız konsertlər vermişəm. Bu da onlardan biridir.

- Bildiyimiz qədəri ilə, bir neçə ay bundan öncə Türkiyədə də konsert vermisiniz.

- Nəinki Türkiyədə, dünyanın bir çox ölkələrində solo konsertlərim olub. Siz dediyiniz, aprel ayında Samsunda konsertimiz oldu. Orda festivalda da iştirak etdik. Bu yaxınlarda Vyanada konsert verdik. Vyanadakı konsert solo deyildi, orada sənət dostlarım da var idi. Bu ərəfələrdə isə bütün gücümü solo konsertə sərf edirəm. Uzun müddətdir ki, öz vətənimdə konsert proqramı ilə çıxış etmirəm. Buna görə də istəyirəm ki, hər şey yüksək səviyyədə olsun.

- Konsertdə tələbələrinizlə çıxışlarınız necə, olacaqmı?

- Olmayacaq. İstəmirəm ki, tamaşaçıların solo-konsert deyəndə, ağıllarına müğənnilərlə, tələbələrlə, sənət dostlarımla olan bir şey gəlsin. Adından göründüyü kimi, bu, solo-konsertdir. Xoşlamıram ki, solo-konsertdə kimsə sənətçi ilə birgə çıxış etsin. Mən səhnədə tək olacam. Solo-konsertdə səhnəni kimləsə paylaşmağı sevmirəm, qəbul da etmirəm. Çünki bunun adı solo-konsertdirsə, tamaşaçı ora sənin ifanı eşitməyə gəlir. Müğənni, sənətkar da solo-konsert verərkən səhnədə bütün imkanlarını göstərmək imkanı əldə edir. Orda başqa birinə ehtiyac olmur. Solo-konsert sənin səs və səhnə imkanlarını, həyəcanını təqdim edə biləcək məkana çevrilir. Sən maksimum dərəcədə solo-konsertin verdiyi şansdan düzgün istifadə etməlisən. Maraqlı olmalısan səhnədə. Səhnədə tək olsan da, diqqətləri özünə yönəldə bilməlisən. Mən yola verməyi bacarmıram. O xüsusiyyət məndə yoxdu deyə, səhnədə ifa edəcəyim hər mahnı üzərində dönə-dönə keçidlər edirəm ki, maraqlı alınsın.

- Konserti özünüzə hesabat saymaq olarmı?

- Ümumiyyətlə, xanəndə, müğənni, ifaçı konsert verərkən daha da mükəmməlləşir, nəyə qadir olduğu özünə bir daha sübut edir. Formalaşır, bərkiyir, yetişir və sənətinə daha da ciddi yanaşır. Bu sənətdə müəyyən titullar da qazanmışam. Ancaq hər zaman özümə borc bilmişəm ki, tamaşaçılarla ünsiyyətdə olum, onların rəğbətini qazanım. Bu bizim işimizdir. Bu mənim üzərimə götürdüyüm böyük bir məsuliyyətdir. O məsuliyyət ki, onun ağırlığını hiss və dərk edərək səhnəyə çıxmışam. Sadəcə, budəfəki fərqli formatda olmaq istəyi həyəcanı da, məsuliyyəti də bir az çoxaltmış oldu. Mənim üçün tamaşaçı fikri, münasibəti önəmli olub. Misal üçün, mən kamera orkestri ilə də konsert vermişəm. Bəzi tamaşaçılar bunu sevib, bəziləri üçün maraqlı olmayıb, onlar klassik muğamı daha çox qəbul ediblər. Bilmirəm, bu dəfə tamaşaçı reaksiyası necə olacaq. Amma seçdiyim mahnılar ki var, onlar tamaşaçılar tərəfindən seviləcək.

- Hər bir xanəndə istəyir ki, daha böyük səhnədə çıxışlar etsin və bunun üçün Heydər Əliyev Sarayına müraciət edir. Siz niyə Yaşıl Teatra müraciət etdiniz?

- Mən Heydər Əliyev Sarayında çox konsert proqramı ilə çıxış etmişəm. Nəinki konsertlərin ana beşiyi olan sarayda, hətta Opera və Balet Teatrının səhnəsində, Filarmoniyada, Muğam Mərkəzində konsertlər vermişəm. Bu dəfə isə istədim bir qədər fərqlilik edim. Bunun üçün isti yay aylarında insanların istirahət etmək istədiyi gözəl bir məkanı seçdim. Belə daha münasib gördük.

- Konsertdən gözləntiləriniz nələrdir?

- Gözləntilərim çoxdur. Çox istəyirəm ki, bu konserti uğurla başa çatdırım. Mənim üçün unudulmaz bir konsert olsun. Bu konserti istədiyim şəkildə başa çatdırsam, yəqin ki, mənim üçün ən böyük uğur elə bu olar. İnanıram ki, bu konserti xoş xatirə kimi yaddaşıma həkk edəcəm.

- İndiki dövrdə konsertdən gəlir əldə etmək mümkündürmü?

- Mən bu suala çox çətinliklə cavab verəcəm. Çünki məsələn, biz xaricə gedirik, orada qonorar alırıq, ayrı heç nədən xəbərimiz olmur. Burada isə bizə konserti təklif ediblər, amma yenə də görürsən ki, tamaşaçılar daha çox dəvətnamələrə üstünlük verirlər, nəinki bilet almağa. Bilet almaq qabiliyyəti bizdə bir az zəifdir. Arzu edərdim ki, bunun da bir çarəsi tapılsın.

- İndi sizdən dəvətnamə istəyən çoxdurmu?

- Çoxdur (gülür). Məni təxribata çəkməyin. Bu işləri təşkilatçılar görür. Ona görə biz çıxılmaz vəziyyətdə qalırıq.

- Aralıq mahnılarının bu qədər çox dinlənildiyi bir vaxtda muğam və bəstəkar mahnılarından ibarət konsert vermək böyük bir riskdir. Bu riski gözə almısınızmı?

- Hər ifaçının - istər bu sənətə yeni gələn olsun, istər köhnə - fərqi yoxdur, öz pərəstişkarları var. Mən muğam, bəstəkar mahnılarının ifaçısıyam, bizim işimiz çox çətindir. Bizi kütlə yox, ayıq baş, ziyalı insanlar dinləyir. Hansı ki, onlar sənətə, sənətkara qiymət verirlər. Şükürlər olsun ki, bu gün elə tamaşaçılarımız var. Kim nəyi dinləyir, bu onun öz seçimidir. Az olsun, amma bizim sənəti başa düşən olsun. Bu çox qəliz məsələdir, burada bir az səviyyə söhbəti də var. Ona görə hər şeyi adam oxuya bilmir. Biz xanəndələr, adətən bir tərzdə oluruq, muğam ifa edirik. Yəni muğam ifaçılarının əksəriyyətinin bir yolu olur, eyni xətt üzrə fəaliyyət göstərirlər.

- Konsertdə hansı bəstəkar mahnıları olacaq?

- Açığı, çox bəstəkar mahnıları səslənəcək. Bunu bir dəfə də demişdim, daha sirri qalmadı. Konsertdə elə mahnılar səslənəcək ki, vaxtilə tanınmış sənətkarlar bu mahnılara möhürlərini vurublar. Rəhmətlik İlhamə Quliyevanın repertuarına müraciət etmişəm. Flora Kərimovanın repertuarından mahnı hazırlayıram. Ona görə deyirəm ki, siz bu konsertdə fərqli Nəzakət Teymurovanı görəcəksiniz.

- Son olaraq tamaşaçılara sözünüz.

- 22 iyunda istirahət etmək və gözəl zaman keçirmək istəyirsinizsə, sizləri Yaşıl Teatrda gözləyirəm.

Xəyalə Rəis

Kaspi.-2018.-5 iyun.-S.12.