Bakı finalının turizmə töhfəsi

Mütəxəssislər deyirlər ki, belə məqamda turizm sektoru çox həssas və peşəkar yanaşma ortaya qoymalıdır

Bu axşam "danışır və göstərir Bakı” sözləri dünyanın 204 telekanalından, saysız-hesabsız radiosundan eşidiləcək. 48-i Avropa, 156-sı qeyri-Avropa telekanalları olan bu yayım şirkətləri dünya ölkələrinin diqqətini Azərbaycana yönəldəcək. Bu gün futbol üzrə Avropa Liqasının final qarşılaşmasında dünyanın iki nəhəngi – İngiltərənin "Çelsi” və "Arsenal” komandaları Bakı Olimpiya Stadionunda üz-üzə gələcək. Futbol azarkeşləri saatları saya-saya böyük oyunun başlamasını gözləyirlər. Emosiyaları coşduracaq Bakı finalını izləmək üçün dünyanın dörd bir yanından azarkeşlər ölkəmizə gəlib. İlk Avropa Oyunlarının, İslam Həmrəylik Oyunlarının, beynəlxalq reytinqə görə Yay Olimpiya Oyunlarının və futbol üzrə dünya çempionatının səviyyəsində sayılan və tamaşaçı auditoriyası 500 milyon insan olan Formula 1 üzrə Azərbaycan Qran Prisi yarışlarının sədası qulaqlardan çəkilməmiş, idmanın şahı sayılan futbol yarışı – Avropa Liqasının final oyunu dünyanın diqqətini Azərbaycana yönəldir. UEFA-nın onlayn satışa çıxardığı 21 min 500 ədəd bilet 100-dən artıq müxtəlif xarici ölkənin vətəndaşları tərəfindən alınıb. Ermənistan istisna olmaqla, Avropanın bütün ölkələrinin vətəndaşları Bakı finalına bilet əldə ediblər. İndiyədək Avroliqa tarixində 100-dən artıq ölkədə bilet satılmadığı halda, Bakı finalına belə bir marağın olması hər bir Azərbaycan vətəndaşında qürur hissi doğurur. 1 milyarda yaxın insan isə televiziya qarşısında bu möhtəşəm finalı izləyəcək. Bakı finalı bir neçə əlamətdar məqamlarla da tarixə düşəcək. Məsələn, axşamkı final oyunu dünyanın ən böyük ekranında nümayiş olunacaq. Final oyunu Moskvada Music Media Domenin ən böyük proyeksiya ekranında göstəriləcək.

Beynəlxalq nüfuzun göstəricisi

Sevindirici haldır ki, artıq ölkəmiz dünyada beynəlxalq idman yarışlarının keçirildiyi məkan kimi tanınır. Ölkə başçısının qeyd etdiyi kimi, bu, beynəlxalq idman aləmi tərəfindən bizə göstərilən böyük hörmətdir.

Ölkəmizdə yaradılan yüksək səviyyəli idman infrastrukturu təkcə paytaxtı deyil, regionların da beynəlxalq idman yarışlarına ev sahibliyi etməsinə imkan verir. Müxtəlif idman növləri üzrə Avropa və dünya çempionatlarının, beynəlxalq turnirlərin və digər tədbirlərin Azərbaycanda keçirilməsi ölkəmizin regionun siyasi, iqtisadi və mədəni mərkəzinə çevrildiyini bir daha təsdiqləyir. Mötəbər yarışlar beynəlxalq nüfuzumuzdan xəbər verir.

Sirr deyil ki, beynəlxalq tədbirlərin keçirilməsi üçün ölkəni seçərkən, ilk növbədə, sabitliyin, təhlükəsizliyin təmin olunduğu əsas götürülür. Mötəbər beynəlxalq yarışlarda məhz Azərbaycanın seçilməsi, dünyanın ölkəmizə etimad göstərdiyini təsdiqləyir. Digər tərəfdən, hər bir beynəlxalq yarış Azərbaycanın turizm potensialının inkişafına öz töhfəsini verir. Turizmçilər də bu faktları təsdiqləyərək, ölkəmizdə keçirilən beynəlxalq yarışların sayını artırmağın tərəfdarıdırlar.

Həm ölkəmizin imici, həm turizmin inkişafı...

Paytaxtımızda keçirilən böyük futbol oyununun bütün dünyanın diqqətini Azərbaycana yönəltdiyini turizm mütəxəssisi Ceyhun Aşurov da təsdiqləyir: " Bildiyiniz kimi, futbol dünyada azarkeşlərinin sayına görə ən populyar idman növüdür. Çox məşhur futbol klublarının finalda qarşıladığını nəzərə alsaq, bu cür ciddi azarkeş kütləsinə malik komandaların ölkəmizə təşrif gətirməsi, dünya mətbuatında, müxtəlif internet portallarında bu oyun haqqında yazılması, məlumatların paylaşılması ölkəmiz üçün ciddi bir hadisədir. Təbii ki, bu da ölkəmizin axtarış sistemlərində tanıdılmasında, ümumiyyətlə, turizm məkanı kimi daha çox məlumatların paylaşılmasında çox faydalıdır”. Final oyunu ilə əlaqədar ölkəmizə turist axınının müşayiət olunduğunu deyən turizmçi bildirir ki, hava limanı, ictimai nəqliyyat, turizm infrastrukturları gücləndirilmiş iş rejimində işləyir: "Gələnlərin sayında ciddi şəkildə artım olduğundan, otellərdə sıxlıq müşayiət olunur. Ölkəyə indiyə qədər Azərbaycanda olmayan turist kütləsi gəlir. Hətta, evlərin kirayəsində artım qeydə alınır. Onlar ilk dəfə ölkəmizi görəcək, paylaşımlar edəcək və Azərbaycan haqqında onlarda təəssüratlar yaranacaq. Bu, ölkənin turizm istiqamətində tanıdılması yönündə müsbət addımdır. Turistlərin gəlişi ölkəmizə valyuta axınına səbəb olur. Gələnlər sadəcə, oyuna baxıb qayıtmır, bir neçə gün öncədən gəlir və oyundan sonra da bir neçə gün qalacaqlar. Təbii ki, onların oyundan başqa, əlavə xərcləri də olacaq. Məsələn, onların regionlara səfər etmək imkanları olacaq. Turistlər müxtəlif turizm məhsullarımızdan istifadə edəcəklər. Bu da ölkəyə əlavə gəlirin qazandırılması və ölkəmizin tanıdılması üçün əla imkandır. Hesab edirəm ki, bu cür idman yarışlarının faydası çoxdur. Bu, həm ölkəmizin imici, həm turizmin inkişafı üçün, həm də ümumilikdə ölkəmizin təbliğatı üçün yaxşı məqamdır”.

Həssas və peşəkar yanaşma

Ölkəmizdə keçirilən beynəlxalq əhəmiyyətli yarışların coğrafiyasının gün-gündən genişləndiyini deyən «Millennium Tourism & Congress DMC»nin direktoru Ruslan Quliyev hesab edir ki, bu tip tədbirlərin Azərbaycana ən böyük töhfəsi dünya turistlərinin maraq dairəsini ölkəmizə yönəltməkdir. Belə ki, ölkəmizə gələnlər onun gözəllikləri, turizm imkanları ilə yaxından tanış olurlar: "Əgər Formula 1 yarışlarında yarım milyard auditoriya varsa, təbii ki, bu, ölkəmizin tanıdılmasına xidmət edir. Həmçinin turistlərin axınına öz təsirini göstərir. Baxmayaraq ki, finalda ingilis komandaları qarşılaşır, Yaxın Şərqdən, Şərqi Avropadan da gələnlərin sayında artım var. Hətta, yarışı izləməyə gələn ölkələrin sayında kəskin artım hiss olunur. Gələcəkdə dövlətin özü, əlaqədar strukturlar məhz belə yarışların ölkəmizdə daha çox keçirilməsində maraqlı olmalıdır”. Gələn il futbol üzrə Avropa çempionatının 4 oyununun Azərbaycanda keçiriləcəyini deyən turizmçi bildirdi ki, həmin qarşılaşmalara qədər hazırlıq prosesləri, tanıtım, sosial şəbəkələrdə təbliğat da öz bəhrəsini verir: "Gələn turistlər oyun öncəsi və sonrası bölgələrə maraq göstərirlər. Burda da turizm sektoru çox həssas və peşəkar yanaşma ortaya qoymalıdır. Bu, həm təbliğat, həm də iqtisadi baxımından bizim dividentlərimizdir. Hesab edirəm ki, bu istiqamətdə fəaliyyətimizi ardıcıl olaraq yürütməliyik”.

Əgər onlar regionlara üz tutsalar...

Azərbaycan Turizm Assosiasiyası (AzTA) sədrinin müşaviri Müzəffər Ağakərimov hesab edir ki, ölkəmizdə beynəlxalq idman yarışlarının keçirilməsi, eləcə də mədəni tədbirlər, konqreslər, simpoziumlar, forumlar Azərbaycanı dünyaya tanıdır: "Təbii ki, Bakı finalını izləmək üçün ölkəmizdə qonaq olanlar Azərbaycanın inkişafının, sözün əsl mənasında, sabitlik, əmin-amanlıq məkanı olduğunun şahidi olacaqlar. Hər gələn qonaq ölkəmizin necə bir məmləkət, paytaxt Bakının necə qədim və müasir olması haqqında məlumat alır. Qonaqlar insanlarımızın necə qonaqpərvər, tolerant olmasını öyrənirlər. Əgər onlar regionlara üz tutsalar, öz ölkələrinə qayıdandan sonra Azərbaycan haqqında ətraflarına məlumat verirlər. Bu o deməkdir ki, Azərbaycanın təbliği və təşviqi yüksək səviyyədə keçirilir. Ona görə də, bu tədbirlərin, xüsusən beynəlxalq tədbirlərin Azərbaycanda keçirilməsi çox müsbət haldır. Bu cür tədbirlər gələcəkdə də keçirilərsə, ölkəmizə gələn turistlərin sayı daha da artacaq. Bu, həmçinin yeni otellərin inşası, yeni turizm şirkətləri, yeni iş yerləri deməkdir. Xüsusən turizm sahəsində çalışan gənc tələbələrin inkişafı və gələcəkdə işlə təminatı üçün yaxşı imkandır. Azərbaycana turistlərin gəlməsi ölkənin iqtisadiyyatına maddi cəhətdən dəstək olur. Digər tərəfdən, ölkənin mədəniyyətini, tarixini, mətbəxini, reallıqlarını təbliğ və təşviq edir».

Təranə Məhərrəmova

Kaspi 2019.- 30 may.- S.6.