Ramiz Mirişli 75 yaşını geridə qoydu

Ötən gün Xalq artisti, bəstəkar Ramiz Mirişlinin 75 yaşı tamam olub. Yubileyini ailə üzvləri ilə birlikdə kiçik çevrədə qeyd edən bəstəkarı sənət dostları və dövlət nümayəndələri bu gün təbrik edəcəklər. Bəstəkarın "Kaspi"yə bildirdiyinə görə, aprelin 17-də M.Maqomayev adına Azərbaycan Dövlət Filarmoniyasında yubiley tədbiri keçiriləcək. Gecədə mədəniyyət və turizm nazirinin çıxışından sonra bədii hissə başlayacaq. İlk hissədə Ramiz Mirişlinin simfoniyaları, kantataları, daha sonra tar üçün yazdığı simfonik əsərləri və "Oxu tar" balladası səsləndiriləcək. Sonuncu kompozisiyanı Xalq artisti Alim Qasımov və qızı Fərqanə Qasımova ifa edəcəklər.

Ramiz Mirişlinin əlavəsinə görə, həmin gün onun mahnı yaradıcılığına yer ayrılmayacaq. Bunu bir konsert proqramına sığdırmağın mümkünsüz olduğunu deyən bəstəkar daha bir yaradıcılıq gecəsinin bu ilin mayında eyni adlı konsert salonunda təşkil ediləcəyini bildirdi. Qeyd etdi ki, həmin gün onun yalnız mahnı yaradıcılığına yer ayrılacaq. Bugünkü proqram başa çatandan bir neçə gün sonra bəstəkar növbəti konsert proqramının repertuarını müəyyən edəcək. Söhbət əsnasında öyrəndik ki, aprelin 19-da yubiley münasibəti ilə Musiqili Komediya Teatrında bəstəkarı Ramiz Mirişli olan "Qısqanc ürəklər" tamaşası nümayiş etdiriləcək. Yaxın aylarda isə Ramiz müəllimin musiqi həyatı verdiyi "Kürəkən" tamaşasının premyerası keçiriləcək.

Kaspi.-2009.-17 aprel.-S.10.