Jurnalist Qadınlar Assosiasiyası mükafatlarını təqdim etdi

Dünən Azərbaycan Jurnalist Qadınlar Assosiasiyası (AYQA) illik mükafatlarının təqdimetmə mərasimini keçirdi. Tədbiri açan assosiasiyanın rəhbəri Sevil Yusifova bildirdi ki, jurnalistika sahəsində öz peşəsilə seçilən qadınların mükafatlandırılması və xüsusi diplomlarla təltif edilməsi əslində onların əməyinə verilən bir qiymətdir. Bu həm də cəmiyyətin mətbuata olan münasibətinin bir göstəricidir: "Çünki biz yalnız "İlin Qadın Jurnalistini" seçmirik, eyni zamanda jurnalist qadınlara dəstək olan qurumları və yaxud məmurları, diplomatları və diplomatik korpusları da seçirik". S.Yusifova onu vurğuladı ki, bu ənənə AYQA tərəfindən artıq on ildir ki, həyata keçirilir. Keçən ilki nominantlar arasında "Azərbaycan" qəzetinin şöbə müdiri Flora Xəlilzadə, Amerikanın Azərbaycandakı səfiri Ann Dersi, Türkiyənin Azərbaycandakı səfirliyinin mətbuat məsələləri üzrə müşaviri Bülent Uğur və müxtəlif telekanalların, radioların jurnalist xanımları olub. Sonra isə ilin jurnalistləri elan olundu: "Mətbuatın inkişafındakı xidmətlərinə görə" - tənqidçi publisist Bəsti Əlibəyli, İctimai Televiziyanın "Səhər" proqramları departamentinin rəhbəri Səidə Musabəyli, "Assoşieyted Press"in müxbiri Aidə Sultanova, Qafqaz jurnalistləri internet saytının Azərbaycan üzrə koordinatoru Anna Batkulaşvili, "Strana" qəzetinin baş redaktoru, "Novosti.az" internet saytının baş direktoru Gülnarə Məmmədzadə mükafatlandırıldı.

"Ən yaxşı müəllif verilişinə görə" - Fəxriyyə Xələfova, "İlin ən yaxşı televiziya xəbər proqramı" - "Azad Azərbaycan" televiziya yayım şirkətinin xəbər departamenti elan edildi. İlin ən ən yaxşı "FM" radiosu - Xəzər radiosu, "Regionda ilin ən yaxşı televiziya kanalı" "Regional" TV elan edildi. İlin ən yaxşı informasiya agentliyi isə "Trend" oldu.

Mükafatlandırılanlar arasında Milli Məclisin üzvləri də var. Rəbiyyət Aslanova və Qənirə Paşayeva "Mətbuata açıq olan millət vəkilləri", Məlahət Həsənova isə "Qadın layihələrini dəstəklədiyinə görə" diplomla təltif edildilər. S.Yusifova vurğuladı ki, ilin ən yaxşı mətbuat katibi BMT-nin informasiya departamentinin rəhbəri Envera Səlimoviç elan olunur. Mətbuata açıq olan dövlət qurumları içərisində Xarici İşlər Nazirliyinin mətbuat xidməti, xarici səfirliklər içərisində isə ABŞ səfirliyi fərqlənib. Mətbuata açıq diplomat isə Türkiyənin ölkəmizdəki səfiri Hulusi Kılıc elan edilib.

Məlumat üçün qeyd edək ki, AYQA özündə ölkəmizin peşəkar jurnalistlərini birləşdirən qeyri-siyasi, qeyri-kommersiya, ictimai əsaslarla fəaliyyət göstərən Qeyri-Hökumət Təşkilatıdır. Təşkilat əsasən qadın jurnalistləri bir araya gətirərək ölkəmizin demokratikləşməsi, inkişafı prossesində qadınların iştirakına yardım edir.

Kamran

Kaspi.- 2009.- 7-10 mart.- S.15.