Lavrov günahı münaqişə tərəflərinin üstünə atdı

"Problemin nizamlanmasında əsas məsuliyyət azərbaycanlılarla ermənilərin üzərinə düşür"

Rusiya xarici işlər naziri Sergey Lavrovun Bakıya səfəri zamanı informasiya-mədəni mərkəzin açılışı nəzərdə tutulub. Bu barədə "RİA Novosti" məlumat yayıb. Açılış mərasimi hər iki ölkənin XİN rəhbərlərinin iştirakı ilə keçiriləcək. Səfəri ərəfəsində "İnterfaks"a müsahibə verən nazir vurğulayıb ki, rəsmi Bakının Kollektiv Təhlükəsizlik haqqında Müqavilə Təşkilatının (KTMT) çərçivəsində kollektiv çevik əməliyyat qüvvələrinin (KÇƏQ) yaradılması ilə bağlı narahatlığına əsas yoxdur. Nazir vurğulayıb ki, yaradılan qüvvələr, məsələn, NATO çevik reaksiya qüvvələrindən fərqli olaraq öz fəaliyyətini yalnız KTMT-yə daxil olan dövlətin ərazisində həyata keçirməyə yönəlib: "Onların tətbiqi barədə qərar təşkilat üzvü olan ölkələrin prezidentləri tərəfindən yekdilliklə qəbul edilir".

Nazir onu da qeyd edib ki, Qarabağ münaqişəsi məsələsində Rusiya münaqişə iştirakçılarına kənardan hansısa reseptin zorla qəbul etdirilməsinin əleyhinədir: "Biz ona əsaslanırıq ki, bu problemin nizamlanması işində əsas məsuliyyət azərbaycanlıların və ermənilərin özlərinin üzərinə düşür. Rusiya maraqlı tərəfləri qane edəcək kompromis razılaşmanı dəstəkləməyə və bu razılaşma əldə olunduğu halda nizamlanmanın qarantı kimi çıxış etməyə hazırdır". S.Lavrov həmçinin hesab edir ki, Moskva bəyannaməsi Dağlıq Qarabağ münaqişəsinin nizamlanmasına yardım göstərə bilər: "Bu sənəd mühüm əhəmiyyət kəsb edir. Azərbaycan və Ermənistan liderləri siyasi nizamlanmanın razılaşdırılmasının başa çatdırılması məqsədilə yüksək səviyyədə ikitərəfli görüşlərini davam etdirmək niyyətlərini və buna hazır olduqlarını bildiriblər". Onun sözlərinə görə, üçtərəfli görüşün yekunlarının həmin ilin dekabrında Helsinkidə ATƏT-in Xarici İşlər Nazirləri Şurasının iclasında güclü dəstək alması təsadüfü deyil. "Hələ ATƏT-in Minsk qrupunun həmsədrləri bu iclasda Azərbaycan və Ermənistanın xarici işlər nazirlərinə Moskva Bəyannaməsinin müddəalarının inkişafında tərəflərin mövqelərinin yaxınlaşmasına dair əlavə təkliflərini də veriblər. Moskva Bəyannaməsinin imzalanmasından sonrakı üç aydan az vaxtda Azərbaycan və Ermənistan prezidentlərinin bu yaxınlarda Sürixdə növbəti görüşünün keçirilməsi faktı göstərir ki, sənəd artıq nizamlanmanın xeyrinə işləyir" - deyə nazir vurğulayıb.

Rusiyalı nazir bir daha bildirib ki, Rusiyanın Ermənistana silah və hərbi texnika verməsi barədə məlumat həqiqətəuyğun deyil: "İnformasiya təxribatından başqa bir şey olmayan bu nəşrin Azərbaycanda öz "ünvanlarını" belə asanlıqla tapmasından təəssüf edirik. Hər hansı əlavə araşdırmanın aparılmasına ehtiyac olduğunu düşünmürəm. Çünki Rusiya tərəfinin diplomatik kanallar vasitəsilə verdiyi bütün bəyanatlar faktlara və Rusiya hərbi rəhbərliyinin heç bir şübhə yeri qoymayan nəticələrinə əsaslanır. Bakı və Yerevan arasında münasibətlərin mürəkkəbliyini nəzərə alaraq Azərbaycan tərəfinin bu mövzuya diqqətlə yanaşması bizə aydındır. Eyni zamanda əminik ki, Rusiya və Azərbaycan bu cür saxtalıqların bizə strateyi tərəfdaşlığımızı inkişaf etdirməyə mane ola bilməməsi üçün kifayət qədər qarşılıqlı etimad ehtiyatına malikdir".

Qeyd edək ki, rusiyalı nazir bu gün Bakıya gəlir. Rusiya XİN-in rəsmi nümayəndəsi Andrey Nesterenko "RİA Novosti"yə bildirib ki, səfərin əsas məqamı S.Lavrovun prezident İlham Əliyevlə görüşü olacaq: "Rusiya tərəfi ikitərəfli əməkdaşlıq, regional və beynəlxalq gündəlikdə duran məsələlərlə bağlı Azərbaycan rəhbərliyi ilə təmaslara xüsusi əhəmiyyət verir". A.Nesterenko S.Lavrovun həmkarı Elmar Məmmədyarovla keçirəcəyi görüşdə həm ikitərəfli münasibətlərin, həm də regional və beynəlxalq vəziyyətin müxtəlif aspektlərinin müzakirə olunacağını söyləyib: "Nazirlər BMT, MDB və digər beynəlxalq strukturlarda əməkdaşlığın dərinləşdirilməsi imkanları ətrafında fikir mübadiləsi aparacaqlar. Rusiya Qafqazda bizim vacib strateyi tərəfdaşımız olan Azərbaycanla münasibətlərini hörmət, etimad və qarşılıqlı anlayış əsasında qurur. Biz Rusiya prezidenti Dmitri Medvedyevin Azərbaycana keçən il iyulun 3-4-də həyata keçirilmiş rəsmi səfəri zamanı imzalanmış dostluq və strateyi tərəfdaşlıq haqqında Bəyannamənin bəndlərinə uyğun olaraq ikitərəfli münasibətləri inkişaf etdirməyi davam etdirmək niyyətindəyik".

Bakıda müzakirə olunacaq məsələlərə dair sualı cavablandıran A.Nesterenko bəyan edib ki, əsas diqqət Xəzəryanı ölkələrin 3-cü sammitinə hazırlıq kontekstində Xəzərin hüquqi statusu probleminə ayrılacaq: "Xəzərin hüquqi statusunun müəyyənləşdirilməsi, Xəzərdə təhlükəsizliyin təmin olunmasında çoxtərəfli mexanizmin və Xəzər İqtisadi Əməkdaşlıq Təşkilatının yaradılması məsələlərində azərbaycanlı tərəfdaşlarımızla ciddi qarşılıqlı anlayışa doğru irəliləyəcəyimizə ümid edirik".

Azər NURİYEV

Kaspi.- 2009.- 11 mart.- S. 4.