Təhsil qanunu ilə bağlı ciddi problemlər qalmayıb

Siyasi partiyalar haqqında isə yeni qanun layihəsi yoxdur

Azərbaycan beynəlxalq təşkilatların işində fəal iştirak edir. O cümlədən ölkəmizin ATƏT Parlament Assambleyasındakı nümayəndə heyəti də qurumun toplantılarda ölkənin maraqlarının qorunmasına çalışır. Nümayəndə heyətinin rəhbəri, Milli Məclis sədrinin müavini Bahar Muradova həm qurumun qarşıdan gələn toplantısı, həm də parlamentin gündəmində olan məsələlərlə bağlı jurnalistlərin suallarını cavalandırıb:

- Mayın 27-dən 29-dək İrlandiyanın paytaxtın Dublin şəhərində ATƏT Parlament Assambleyasının (PA) növbəti yaz konfransı keçiriləcək və təbii ki, biz də bir nümayəndə heyəti olaraq, ancaq məhdud tərkibdə bu toplantının işinə qatılacağıq. Qeyd edim ki, konfransda son vaxtlar dünyada yaşanan maliyyə böhranı müzakirə olunacaq. Eyni zamanda, qeyd edim ki, biz də bu məsələnin müzakirəsində yaxından iştirak edəcəyik. Çox güman ki, iqtisadi böhranla əlaqədar Azərbaycanın özünəməxsus vəziyyəti barədə fikirlərimiz avroparlamentarilər üçün maraqlı olacaq.

- Bahar xanım, son günlər "Siyasi partiyalar haqqında" qanun layihəsinin parlamentdə müzakirə olunması barədə məlumatlar yayılmaqdadır. Bu məlumatlar nə dərəcədə həqiqətəuyğundur?

- Bilirsiniz, bu məsələ ilə bağlı ümumilikdə müzakirələr nəinki parlamentdə, elə ictimaiyyət arasında da gedir. Bu yöndə ictimai müzakirələr çoxdandır ki, davam edir. Bu baxımdan, yaxın gələcəkdə parlamentdə də bu məsələyə baxıla bilər...

- Ortalıqda konkret bir qanun layihəsi varmı?

- Bu günə olan vəziyyət belədir ki, hələlik ortada "Siyasi partiyalar haqqında" yeni qanun layihəsi yoxdur. Yəni parlamentin müvafiq komitələrinin və yaxud plenar iclasının müzakirəsinə çıxarılacaq bitkin bir layihə hələ mövcud deyil. Bunlar sadəcə, fikirlər şəklindədir.

- Siyasi partiyalarla bağlı yeni qanun layihəsinin müzakirələrə yubanmasının bəs səbəbi nədir?

- Bu barədə fikirlərimizi dəfələrlə bildirmişik. Biz istəyirik ki, "Siyasi partiyalar haqqında" yeni qanunla bağlı daha çox müzakirəyə səbəb olan partiyaların dövlət maliyyələşməsi məsələsi barəsində ən azı yetkil, ümumi bir mövqeyə gələk. Bu isə heç şübhəsiz, mövcud vəziyyətlə bağlı olan məsələdir. Ona görə də düşünürük ki, yalnız bu məsələ və digər həllini gözləyən məsələlər daxil olmaqla parlamentdə sözügedən sənədə baxıla bilər. Ancaq hələlik yaz sessiyasında bu məsələyə baxılacağını da gözləmirik.

- Parlamentdəki çıxışlarında müxalifətçi millət vəkilləri bələdiyyə seçkiləri ərəfəsində Seçki Məcəlləsinin təkmilləşdirilməsi təklifini irəli sürüblər. Bəs parlament rəhbərliyi bu təklifə necə yanaşır?

- Biz işlək vəziyyətdə olan qanunlara, qanun layihələrinə hər zaman baxmışıq, o cümlədən adını çəkdiyiniz Seçki Məcəlləsinə də. Yəni hər seçki ərəfəsində sözügedən Məcəlləyə bu və ya digər dərəcədə dəyişikliklər edilib. Bununla belə, mən indidən bu məcəlləyə hansısa dəyişikliklərin olacağını, ümumiyyətlə, dəyişikliklərin ediləcəyini söyləmək istəməzdim. Çünki bu məsələ hələ müzakirə tələb edir.

- Bahar xanım, aprel ayı da çıxdı, amma "Təhsil haqqında" qanun layihəsi hələ də yeni variantda üçüncü oxunuşun müzakirəsinə çıxarılaraq bütövlükdə qəbul olunmadı...

- Yaxın zamanlarda "Təhsil haqqında" qanun layihəsi də üçüncü oxunuşda parlamentin müzakirələrinə çıxarılacaq. Artıq bu qanun layihəsi ilə bağlı ciddi problemlər qalmayıb. Yəni mən düşünürəm ki, həmin sənədin müzakirələrə çıxarılması ilə bağlı hər hansı bir maneə yoxdur.

- Yeri gəlmişkən, Dövlət Neft Akademiyasında baş vermiş məlum faciəvi olayla bağlı sözügedən qanuna hər hansı əlavələrin və dəyişikliklərin olması mümkündürmü?

- Bilirsiniz, təhlükəsizlik məsələsi hər bir təhsil müəssisəsinin və ümumiyyətlə, hər bir müəssisənin özünün səlahiyyətində olan bir məsələdir. Eyni zamanda, təhlükəsizliyin təmin olunmasının əlahiddə bir məsələ kimi sözügedən qanun layihəsinə salınması ilə bağlı da ortalıqda hansısa fikirlər yoxdur. Yəni "Təhsil haqqında" qanun təhsilin istiqamətlərini, formasını, məzmununu, onun təşkili qaydasını müəyyən edir. Amma təhlükəsizlik məsələləri, yenə də qeyd edirəm ki, hər bir müəssisənin səlahiyyətində olan bir məsələdir. Onlar özləri bu məsələni həll etməlidirlər.

- Məlum qanlı olaydan söz düşmüşkən, böyük əksəriyyət bu cinayət hadisəsini siyasi terror kimi qiymətləndirsə də, baş verənləri daha çox kriminal hadisə kimi qiymətləndirmək cəhdləri də var. Sizcə bu, nə ilə bağlıdır?

- Əvvəla, bu məsələ ətrafında ciddi istintaq işləri gedir. Hadisə baş verən anda, təbii ki, hərə buna bir cür reaksiya verə bilər. Amma düşünürəm ki, ən ciddi, ən dolğun reaksiya istintaqın nəticələrinə əsaslanmış reaksiya olmalıdır. Ona görə indidən hakimiyyəti nədəsə ittiham etmək və yaxud hüquq-mühafizə orqanlarını nədəsə günahlandırmaq düzgün olmazdı. Sadəcə, istintaqın nəticəsini gözləmək lazımdır.

- Bahar xanım, bir müddət öncə Konstitusiyaya edilən dəyişikliklərdə eks-prezidentlərin statusu ilə bağlı qanunun qəbulu məsələsi də öz əksini tapıb. Ona görə bilmək istərdik ki, bu yöndə hansısa bir qanun layihəsi varmı, varsa, onun müzakirəsi, qəbulu nə vaxta nəzərdə tutulur?

- Bəli, bu məsələ də fikir olaraq var. Eyni zamanda, sizin də qeyd etdiyiniz kimi, bu yaxınlarda Konstitusiyaya dəyişikliklər etmişik və bu sənəd bu məsələni reallaşdırmağı vəzifə olaraq bizim qarşımıza qoyur. Bu baxımdan, qarşıdakı dövrdə yəqin ki, bu məsələyə də baxılacaq.

İlham QULİYEV

Kaspi.-2009.-8 may.-S.9.