Orta məktəblərdə buraxılış imtahanlarının
vaxtı müəyyənləşdi
Mərkəzləşdirilmiş
qaydada keçirilən
imtahanlar iyunun 3-dən 23-nə qədər
davam edəcək
Bu il ölkəmizdə
orta ümumtəhsil məktəblərində
buraxılış imtahanları mərkəzləşdirilmiş
qaydada keçiriləcək. İmtahanlar Naxçıvan MR
istisna olmaqla, Azərbaycanın bütün ümumtəhsil məktəblərinin
və peşə liseylərinin şagirdləri, o cümlədən
ötən dərs illərində buraxılış
imtahanlarında qeyri-kafi qiymət alan, müəyyən səbəblərdən
orta təhsil kursunu bitirməyən və eksternat qaydasında
imtahan vermək üçün müraciət etmiş şəxsləri
də əhatə edəcək.
Artıq
Təhsil Nazirliyi tərəfindən mərkəzləşdirilmiş
buraxılış imtahanlarının vaxtı və imtahan
götürüləcək fənlər də əvvəlcədən
müəyyən edilib. Nazirliyin mətbuat xidmətindən
verilən məlumata görə, respublikanın orta ümumtəhsil
məktəblərinin IX sinif şagirdləri ana dili və
riyaziyyat fənlərindən buraxılış imtahanları
verəcəklər. XI sinif şagirdləri üçün
isə imtahanlar ana dili, riyaziyyat, Azərbaycan tarixi, fizika,
kimya, biologiya, coğrafiya, xarici dil fənləri üzrə
aparılacaq. Təlim gürcü dilində olan məktəblərin
XI (XII) sinifləri üçün test imtahan sualları
müvafiq rayon təhsil şöbələri tərəfindən
Təhsil Nazirliyinin yerlərə göndərdiyi "Test
bankı"ndan istifadə edilməklə hazırlanıb təsdiq
ediləcək. Orta təhsil kursu üzrə
buraxılış imtahanları saat 10.00-da başlamaqla
üç saat vaxt ərzində bölgələr üzrə
müvafiq qrafik əsasında keçiriləcək. Belə
ki, iyunun 3-də Şəki, Ağdaş, Ağsu, Balakən,
Göyçay, İsmayıllı, Oğuz, Qax, Qəbələ,
Quba, Qusar, Xaçmaz, Dəvəçi, Siyəzən,
Xızı, Şamaxı, Ucar, Zaqatala, Saatlı, Sabirabad və
Qobustan rayonları üzrə imtahanlara başlanılacaq. İyun
8-də isə imtahanlar Gəncə, Mingəçevir və
Naftalan şəhərləri, Ağdam, Ağstafa, Bərdə,
Daşkəsən, Füzuli, Gədəbəy, Goranboy,
Göygöl, Qazax, Samux, Şəmkir, Tərtər, Tovuz və
Yevlax rayonlarında keçiriləcək. Şirvan şəhəri,
Abşeron, Ağcabədi, Laçın, Astara, Beyləqan, Biləsuvar,
Cəbrayıl, Cəlilabad, Hacıqabul, İmişli, Kürdəmir,
Lənkəran, Lerik, Masallı, Neftçala, Salyan,
Yardımlı və Zərdab rayonları üzrə isə
imtahanlara iyunun 12-də start veriləcək. İyunun 16-sı
üçün nəzərdə tutulan imtahanlar isə
Bakı və Sumqayıt şəhərlərinin ümumtəhsil
müəssisələrini əhatə edəcək. Bundan
başqa, əsas təhsil kursu üzrə buraxılış
imtahanları üç saat vaxt verilməklə iyun 5-də
reallaşacaq. Eksternat qaydasında əsas və orta təhsil
kursu üzrə buraxılış imtahanları isə iyunun
23-də saat 10.00-da Bakı şəhərindəki 202
saylı məktəbdə keçiriləcək. Peşə
liseylərində orta təhsil kursu üzrə
buraxılış imtahanlarına gəlincə, bu proses
artıq aprelin 24-də həyata keçirilib.
Nazirlikdən
qeyd edilib ki, 2008-2009-cu tədris ilində ölkənin orta
ümumtəhsil məktəblərinin XI sinfini 112.549
şagird bitirəcək. Bu göstərici 2006-cı ildə
116.389, 2007-ci ildə 116.812, ötən il 117.535 nəfər
olub. Ümumtəhsil məktəblərinin XII sinfini başa
vuran şagirdlər 2006-cı ildə 431, 2007-ci ildə 524,
ötən il 311 nəfər olduğu halda 2009-cu ildə
onların sayı 637 nəfərə yüksəlib. 2008-2009-cu
tədris ilində təhsil ocaqlarının I sinfinə isə
119.600 şagird qəbul olunub. Bu göstərici 2006-cı ildə
116.958, 2007-ci ildə isə 117.921 nəfər təşkil
edib. Nazirlikdən o da vurğulanıb ki, 2009-2010-cu dərs
ilində isə I sinif şagirdlərinin sayının 125.114
nəfər olacağı proqnozlaşdırılır.
HƏQİQƏT
Kaspi.-2009.-21 may.-S.8.