Rusiya səfiri bəzi məsələləri anlamır

Vasili İstratov Ermənistana silah ötürülməsi mövzusunun niyə davam etdiyini bilmir

"Rusiya ümid edir ki, Ermənistana guya silah verilməsi barədə narahatlığa Azərbaycan və Rusiya xarici işlər və müdafiə nazirlərinin yaxın zamanlarda keçiriləcək görüşündə son qoyulacaq". Bunu Rusiyanın Azərbaycandakı səfiri Vasili İstratov dünən keçirdiyi mətbuat konfransında bildirib.

O, 2008-ci ildə Ermənistana 800 mln. dollar məbləğində mövcud olmayan silah satışı barədə yerli KİV-də davam edən müzakirələri anlamaqda çətinlik çəkdiyini də vurğulayıb: "Biz Azərbaycan tərəfinin notasına Rusiya XİN-in cavabı ilə nöqtə qoymaq istəyirdik. Lakin proses təəssüf ki, davam edir".

Onun sözlərinə görə, Bakının Rusiya tərəfinin rəsmi cavabını gözləmədən qətiyyətlə hərəkət edərək nota ilə çıxış etməsi çaşqınlıq törədir. "Mənə aydın deyil ki, nə üçün 1996-cı ildə Rusiya silahının Ermənistana satışının mənfi təcrübəsi ilə son 6-8 ildə ölkələrimiz arasında mövcud olan bütün müsbət irəliləyişlər tamamilə ört-basdır edilməlidir" - deyə o bildirib. Səfir silah satışına dair sənədi saxta adlandırıb: "Mənim diqqətimi o fakt çəkir ki, bu tip məlumatları dərhal göydə tutur və ən mənfi formada yayırlar". Diplomat Rusiya tərəfinin müfəssəl cavabına baxmayaraq, bu mövzunun müzakirəsinin davam etməsilə bağlı təəssüfünü bildirib və "bəzi hörmətli şəxslərin, deputatların uzağa gedən xülasələr, bəzi səfirliklərin diplomatların isə şərhlər yağdırdıqlarını" qeyd edib.

Rusiyanın ölkəmizdəki səfiri "Nabucco" ilə də bağlı məsələyə yer ayırıb. Azərbaycanın "Nabucco"ya qoşulacağı təqdirdə Rusiyanın Azərbaycana qarşı siyasətində dəyişiklik olacağı ilə bağlı sualı cavablandıran səfir bildirib ki, Rusiya rəhbərlərindən heç kəs heç vaxt Azərbaycanın "Nabucco"ya qoşulmasının ikitərəfli münasibətlərə təsir edəcəyini söyləməyib. Səfir bildirib ki, milyardlarla dollar sərmayə tələb edən bu miqyasda kommersiya layihəsi üzrə strateyi qərar verildikdə müəyyən siyasi təminatlar da nəzərə alınmalıdır: "Belə strateyi qərar verildikdə, bütün faktorlar nəzərdən keçirilməlidir. Faktorlar isə çoxdur". Diplomat hesab edir ki, istənilən ixracatçı ölkə səhvə yol verməməlidir. O, prezident İlham Əliyevin Azərbaycanın "Nabucco"ya qoşulmasının qaz üçün təklif olunacaq qiymətdən asılı olacağı barədə bəyanatını tamamilə düzgün adlandırıb. "Avropa Azərbaycan qazı üçün "Qazprom"un təklif etdiyi qiymətdən yüksək rəqəm təklif edərsə, Rusiya tərəfi təklifinə yenidən baxacaqmı" sualının cavabında səfir "Qazprom"un təklif etdiyi qiymətdən xəbərsiz olduğunu, belə məsələlərin təsərrüfat subyektləri arasında müzakirə edildiyini vurğulayıb.

Səfir 26 Bakı komissarının abidə kompleksinin sökülməsinə də münasibət bildirib: "Rusiya Bakıda 26 Bakı komissarının abidə kompleksinin sökülməsi və orada olan qəbirdən çıxarılan sümüklərin gələcək aqibəti ilə bağlı situasiyanı izləyir". 26 Bakı komissarının varislərindən Rusiyada yaşayanların olduğunu qeyd edən səfir onlar səfirliyə müraciət edəcəkləri təqdirdə, bu məsələ ilə daha yaxından məşğul olacaqlarını söyləyib: "Mən şifahi olaraq qəbirdən çıxarılan sümüklərin aqibəti ilə maraqlanmışam, amma hələlik heç bir cavab almamışam".

Azər Nuriyev

Kaspi.- 2009.- 28 yanvar.- S. 4.