Diplomatik Akademiyanın binasının tikintisinə başlanıb

Hafiz Paşayev Azərbaycanda yeni tipli təhsil ocağının yaradılacağını vurğulayır

Dünən Azərbaycan Diplomatik Akademiyasının binasının və Dədə Qorqud Parkı layihəsinin təqdimat mərasimi keçirildi. Akademiyanın rəhbəri, xarici işlər nazirinin müavini Hafiz Paşayev vurğuladı ki, məqsəd Azərbaycanda yeni tipli təhsil ocağı yaratmaqdır: "Akademiyanın binasının və burada tətbiq olunacaq proqramların layihələrinin hazırlanması uzun vaxt çəkdi. Lakin artıq layihələr tamamlanıb və biz akademiya binasının tikintisinə başlamışıq. Bu layihənin hazırlanmasında ABŞ-ın Arxitektura Şirkətinin və dünyanın aparıcı universitetlərinin təcrübəsinin böyük rolu olub".

H.Paşayev onu da vurğuladı ki, artıq akademiyada qısa və orta müddətli tədrislər kursları keçirilir. Bu, əsasən XİN-ə yeni qəbul olunan işçilər üçün nəzərdə tutulub. Tədris proqramlarının hazırlanmasında da Kembric, Con Hopkins, MDBƏİ, Corc Taun kimi məşhur məktəblərin təcrübələrindən istifadə edilib. Artıq builki test imtanından sonra uğur qazanaraq XİN-ə götürülən 26 nəfərə də altı aylıq kursların keçirilməsinə başlanılıb.

Akademiyanın rəhbəri onu da vurğuladı ki, hazırda təhsil müəssisəsində magistr proqramı işlənib hazırlanıb. Bu proqramda əsas iki istiqamət - beynəlxalq münasibətlər və eneryi və ətraf mühitin idarə olunması müəyyənləşdirilib. Bu il üçün hələlik magistr pilləsinə 25 tələbənin qəbulu nəzərdə tutulub.

H.Paşayev Diplomatik Akademiyanın Dədə Qorqud Parkı ərazisində yerləşdiyini də dedi. Onun sözlərinə görə, akademiyanın binası parkın 40 hektarlıq ərazisinin yalnız 3-4 hektarını əhatə edəcək.

Nazir müavini təhsil müəssisəsinə qəbul qaydalarından da danışdı. O vurğuladı ki, Diplomatik Akademiyaya qəbul test üsulu ilə olacaq. Akademiyada diplomatiya, beynəlxalq münasibətlərlə bağlı Azərbaycan dilində kitabların nəşri də planlaşdırılır. Həmçinin Azərbaycan, ingilis və rus dillərində diplomatik lüğətin hazırlanması da nəzərdə tutulub: "Keçmiş SSRİ dövlətlərinin xarici ölkələrdə səfirliklər açması da çox mühüm tarixi hadisələrdəndir. Biz planlaşdırırıq ki, hər bir ölkənin müxtəlif dövlətlərdəki ilk səfirləri özlərinin iş təcrübəsi ilə bağlı sanballı əsərlər yazsınlar və bu əsərlər kitab şəklində Azərbaycan Diplomatik Akademiyasının xətti ilə nəşr edilsin. Digər tərəfdən, hər ilin sonunda təhsil müəssisəmizdə aparılan tədqiqat işlərinin də kitab şəklində nəşrini düşünürük". Burada böyük diplomatik kitabxana da fəaliyyət göstərəcək və orada dünyanın beynəlxalq münasibətlərə dair ən sanballı kitabları yerləşdiriləcək. Bu kitabxana ictimaiyyət üçün də açıq olacaq. H.Paşayev akademiyada təhsilin pullu olacağını dedi. Onun sözlərinə görə, təhsil haqqı 4750 manat olacaq. Lakin akademiyada fəaliyyət göstərəcək fond istedadlı tələbələr üçün müvafiq güzəştlər də nəzərdə tutub: "Heç bir təhsil müəssisəsi tamamilə dövlət büdcəsi hesabına fəaliyyət göstərə bilməz. Ona görə də hər tanınmış təhsil ocağı özünün maliyyə fondunu yaratmağa çalışır. Biz bu yaxınlarda ərəb dövlətlərində olduq və onların bu istiqamətdəki təcrübələri ilə maraqlandıq. Fonda maliyyə vəsaitinin toplanması istiqamətində işlərə artıq başlanılıb. Azərbaycanda varlı insanlar və maliyyə imkanları geniş olan şirkətlər çoxdur. Bu məsələdə onların da imkanlarından yararlanmaq mümkündür".

İ.Quliyev

Kaspi.- 2009.- 29 yanvar.- S. 5.