Şəhla QƏNBƏROVA

F.B.Köçərli adına

Respublika Uşaq Kitabxanasının direktoru

ELÇİN ƏFƏNDİYEV İRSİ BİBLİOQRAFİK MƏNBƏLƏRDƏ

Açar sözlər: Şəxsi biblioqrafiya,informasiya-axtarış imkanları, biblioqrafik metodika

Ключевые слова: персональная библиография,  методика, библиографии, информационно-поисковые возможности

Keywords: personal bibliographic   indexes, the methods of composing of bibliographic indexes,  information retrieval potential

Müasir Azərbaycan ədəbiyyatının görkəmli nümayəndəsi, çağdaş ədəbi-tənqid məktəbinin layiqli davamçısı, xalq yazıçısı, “İstiqlal” və “Şərəf” ordenli, “Azərbaycan Respublikasının Əməkdar incəsənət xadimi”, tanınmış ictimai-siyasi xadim Elçin Əfəndiyev zəngin və çoxşaxəli yaradıcılığa malik ədəbiyyatşünasdır. Elçin Əfəndiyev xalqımızın tarixi, taleyi və ədəbi-bədii irsi ilə bağlı olan sənətkarlarımızdandır. Elçin Əfəndiyevin Azərbaycan ədəbiyyatı və mədəniyyətinin inkişafıında xüsusi xidmətləri, çoxsaylı ədəbi-bədii yaradıcılığı, publisistik fəaliyyəti, xarici ölkə ədəbiyyatından etdiyi tərcümələri, dram əsərləri, kinosenariləri, ictimai-siyasi fəaliyyəti onun haqqında çox zəngin sənəd-informasiya bazasının formalaşmasına səbəb olmuşdur. Bu zəngin sənəd kütləsi ilkin mənbələrlə yanaşı, biblioqrafik mənbələrdə də əks etdirilmişdir.

Elçin Əfəndiyev haqqında ilk şəxsi elmi-köməkçi xarakterli biblioqrafik göstərici 1997-ci ildə peşəkar biblioqraf Bəybala Ələsgərov tərəfindən tərtib edilərək, M.F.Axundov adına Azərbaycan Dövlət Kitabxanası tərəfindən nəşr edilmişdir.(1)

Bu biblioqrafik göstəricidə Elçin Əfəndiyevin 1959-1996-cı illərdə Azərbaycan , rus, MDB və digər xarici ölkə xalqlarının dillərində çap edilmiş bədii əsərlərini, publisistik, elmi-tənqidi yazılarını, o cümlədən monoqrafiya və elmi məqalələrini, həmçinin müxtəlif sessiya, simpozium və elmi konfranslardakı məruzə və çıxışlarını, müqəddimə yazdığı və redaktə etdiyi əsərləri əhatə edir. Biblioqrafik vəsaitdə həmçinin ədibin həyat və yaradıcılığı, ictimai fəaliyyəti haqqında ədəbiyyat da əks etdirilmişdir.

Biblioqrafik göstərici çox zəngin köməkçi aparata malik olub, ədibin həyat və yaradıcılığı, onun əsərlərinin nəşri, tərcümələri, nəşriyyatlar, redaktorlar, tərcüməçilər, dövri nəşrlər və s. müəllifin əsərlərinin nəşrilə əlaqədar olan şəxsiyyətlər və kollektivlər haqqında geniş məlumat verir. Bu biblioqrafik vəsaiti digər elmi-köməkçi göstəricilərdən fərqləndirən əsas xüsusiyyət onun dəqiq və elmi-bibloqrafik cəhətdən düzgün müəyyənləşdirilmiş struktur quruluşa malik olmasıdır. Belə ki, Bu biblioqrafik tədqiqat bir neçə bölmədən ibarət olan giriş hissəsi ilə yanaşı özündə 30- dan yuxarı bölməni birləşdirən dörd əsas hissədən, 21 yardımçı göstəricilərdən ibarət “Köməkçi göstəricilər” adlandırılmış xüsusi bölmədən ibarətdir.

Biblioqrafik göstəricinin giriş hissəsində professor Zöhrab Əliyevin rəyi, sonra Elçin Əfəndiyevin əsərlərinin nəşri haqqında qısa oçerk, ədibin həyat və yaradıcılığının əsas tarixləri və ədib haqqında ədəbiyyat və mədəniyyət xadimlərinin fikirləri təqdim edilmişdir.

Biblioqrafik göstəricinin I hissəsində Azərbaycan dilində müəllifin kitabları, redaktə etdiyi kitablar, dövrü mətbuatda və müxtəlif məcmuələrdə dərc edilmiş bədii əsərləri, ədəbi-tənqidi və publisistik məqalələri, tərcümələri və əsərləri haqqında ədəbiyyatın biblioqrafik təsviri verilmişdir.

Biblioqrafik vəsaitdə bütün mənbələr hər bir bölmə daxilində əlifba sırası ilə qruplaşdırılmışdır.

Biblioqrafik göstəricinin II hissəsində ədibin həyat və yaradıcılığı haqqında Azərbaycan dilində ədəbiyyat verilmiş və sənədlər aşağıdakı bölmələr üzrə qruplaşdırılmışdır:

1. Həyat və yaradıcılığı haqqında;

2. Azərbaycan Yazıçılar İttifaqındakı fəaliyyəti;

3. “Vətən” cəmiyyətindəki fəaliyyəti;

4. Baş nazirin müavini kimi fəaliyyəti.

Biblioqrafik vəsaitin III hissəsində Elçin Əfəndiyevin əsərlərinin rus dilindəki nəşrlərini və onun həyat və yaradıcılığı haqqında rus dilində nəşr edilmiş ədəbiyyatı əhatə edir. Materialların sistemləşdirilməsi əsasən göstəricinin Azərbaycan dilindəki mənbələri əhatə edən hissəsinə uyğun şəkildə tərtib edilmişdir: kitabları, müqəddimə yazdığı əsərləri, dövri mətbuat materialları; ədəbi-tənqidi və publisistik məqalələri, ictimai fəaliyyəti, ekranlaşdırılmış əsərləri, filmləri haqqında ədəbiyyat; həyat və yaradıcılığı haqqında ədəbiyyat. Bu hissədə materiallar Azərbaycan dilindəki sənədlər kimi əlifba prinsipi əsasında düzülmüşdür.

Biblioqrafik göstəricinin IY hissəsi ədibin xarici dilləedə nəşr edilmiş əsərlərini və onun haqqında ədəbiyyatı əks etdirir. Burada ədibin keçmiş SSRİ respublikaları və digər xarici ölkələrdə nəşr edilmiş əsərləri və onun həyat və yaradıcılığı, eləcə də ayrı-ayrı əsərləri haqqında müxtəlif ölkələrdə ( Bolqarıstan, Belorusiya, Çexiya, ABŞ, Almaniya, Türkiyə, Macarıstan, İraq, Qazaxstan, Polşa, Rusiya və s.) dərc edilmiş əsərlərin nəşrlərinin mükəmməl biblioqrafik təsviri verilmiş və müəllif haqqında xarici ölkələrdə dərc edilən çox saylı mənbələr toplanmışdır. Materialların düzülüşü ölkələrin əlifba sırasına görə sistemləşdirilmişdir. Hər bir ölkəyə həsr olunmuş bölmə daxilində də mənbələrin düzülüşündə əlifba prinsipi əsas götürülmüşdür.

Biblioqrafik göstəricidə diqqəti cəlb edən xüsusiyyət burada orjinal köməkçi göstəricilər sisteminin yaradılmasıdır. Belə ki, biblioqrafik göstəriciyə daxil olan çoxsaylı və çoxdilli sənədlərin müxtəlif axtarış əlamətlərinə görə müəyyənləşdirilməsini təmin etmək üçün 21 adda köməkçi göstərici tərtib edilmişdir. Bu göstəricilər vasitəsilə ədibin Azərbaycan, rus və xarici dillərdə nəşr edilmiş əsərlərini, redaktə etdiyi əsərləri, ( kitabları və məqalələrini ) tərcümələrini, onun əsərlərinin redaktorlarını, rəyçilərini, yazıçının senarilərini, səhnələşdirilmiş və ekranlaşdırılmış əsərlərini, nəşriyyatların, dövri orqanların adlarını, müəllifin əsərləri çap edilən ölkələrin adlarını və tərcümə edilmiş əsərlərinin sərlövhələrini operativ və dəqiq müəyyənləşdirmək mümkün olur. Biblioqrafik göstərici özündə bütövlükdə 1152 adda müxtəlif mənbəni əks etdirir. (4.s.125)

Biblioqrafik göstəricinin müəllifi Bəybala Ələsgərovun gərgin zəhməti və və hərtərəfli axtarışları nəticəsində meydana gəlmiş bu bibioqrafik əsər Elçin Əfəndiyev irsinin hərtərəfli əhatə edilməsində mühüm nailiyyət olmuşdur.

“Elçin” biblioqrafik göstəricisinin təhlilini bu vəsait haqqında professor Zöhrab Əliyevin aşağıdakı sözləri ilə yekunlaşdırmaq istərdik: “Çağdaş Azərbaycan ədəbiyyatının görkəmli nümayəndələrindən biri olan Elçin haqqında biblioqrafik göstərici başqa şəxsi biblioqrafik vəsaitlər sistemində özünəməxsus yer tutacaqdır və Azərbaycan ədəbiyyatı üzrə biblioqrafik axtarışda mühüm rol oynayacaqdır”.(3,s.9)

Elçin Əfəndiyev irsinin biblioqrafik tədqiqinə həsr edilmiş digər bir biblioqrafik vəsait 2013-cü ildə, M.F.Axundov adına Azərbaycan Milli Kitabxanası tərəfindən “Azərbaycanın görkəmli şəxsiyyətləri” seriyası ilə nəşr edilmişdir. (Elçin (Əfəndiyev Elçin İlyas oğlu): biblioqrafiya / ixtisas red. və burax.məsul K.Tahirov, red.G.Səfərəliyeva; M.F.Axundov adına Azərbaycan Milli Kitabxanası.-Bakı,2013.-560 s.).

Elçin Əfəndiyevin ədəbi-bədii və ictimai fəaliyyətini tam şəkildə əks etdirən bu yeni biblioqrafik göstərici 1959-2013-cü illərdə nəşr edilmiş materialları əhatə edir. Biblioqrafik göstərici əvvəlki vəsaitdən fərqli olaraq yenidən işlənərək, daha da təkmilləşdirilmiş, metodiki baxımdan yeni tərtibatla mükəmməl şəkildə nəşr edilmişdir.

Bu yeni biblioqrafik göstəricinin əvvəlində “Tərtibçidən”, “Ədəbiyyat yaradıcısı, metodoloqu və təəssübkeşi” adlı AMEA-nın müxbir üzvü Nizami Cəfərov tərəfindən yazilmış çox əhatəli və məzmunlu “Oçerk” verilmişdir. Oçerkdə Nizami Cəfərov Elçin Əfəndiyev yradıcılığına mütəxəssis baxışı ilə yanaşaraq görkəmli yazıçının yaradıcılığını tədqiq və təhlil edərək, əsərlırinin və kitablarının nəşr tarixini göstərməklə onu “böyük ədəbiyyat yaradıcısı-yazıçı, ədəbiyyatşünas-metodoloq olmaqla yanaşı, ədəbiyyatın, xüsusilə milli ədəbiyyatın böyük təəssübkeşidir” adlandırmışdır.( 2.s.7) Daha sonra müəllif fikirlərini davam etdirərək

demişdir:

...Elçinin ədəbiyyat yaradıcısı kimi nə qədər böyük uğur qazandığını sübüt edən ən azı üç texniki göstərici var:

-Bunlardan birincisi nəşr olunan kitablarının tirajı, tamaşaya qoyulan əsərlərinin sayıdır;

- İkincisi, onun bədii istedadı haqqında yazılan ədəbi- tənqidi, elmi yazılar, deyilən fikirlərdir;

- Üçüncüsü isə əsərlərinin dünya dillərinə tərcüməsi, dünyada doğurduğu rezonansdır... (2.s.7)

Bu fikirlər Nizami Cəfərov tərəfindən Elçin Əfəndiyev şəxsiyyətinə, ədəbi-bədii və ictimai fəaliyyətinə verilən ən böyük dəyərdir.

Nizami Cəfərov geniş yaradıcılıq diapozonuna malik olan Elçinn Əfəndiyev yaradıcılığının mühüm istiqamətini təşkil edən incəsənət sahəsindəki fəaliyyətini də yüksək qiymətlçəndirmişdir. Xüsusilə, Azərbaycan və dünya teatrlarının səhnəsində tamaşaya qoyulmuş əsərlərinin və kinossenarilərinin bədii-estetik dəyərləri haqqında da qiymətli fikirlər söyləmişdir.

Elçin Əfəndiyev yaradıcılığını yüksək qiymətləndirən müəllif görkəmli yazıçını mütəffəkkir metodoloq, milli ədəbiyyatımızı dünya ədəbiyyatı səviyyəsinə qaldırmış ədəbiyyatşünas kimi bədiilik, elmilik və publisistik kimi komponentlərini dəyərləndirmişdir.

Heç təsadüfi deyildir ki, görkəmli yazıçı və ictimai xadim olan Elçin Əfəndiyev Azərbaycan ədəbiyyatının inkişafındakı böyük xidmətlərinə görə Ümummilli liderimimiz, Ulu öndər Heydər Əliyev tərəfindən 2003-cü il 29 may tarixində “İstiqlal” ordeni ilə və Azərbaycan Respublikasının Prezidenti İlham Əliyev tərəfindən 2013-cü il 11 may tarixində verilmiş Sərəncama əsasən “Şərəf” ordeni ilə təltif edilmişdir.

Elçin Əfəndiyevin ədəbi-bədii və ictimai fəaliyyəti dövlət başçıları ilə yanaşı, görkəmli elm, ədəbiyyat, mədəniyyət, siyasi və din xadimləri, öz həmkarları, müəllimləri və dostları tərəfindən də yüksək qiymətləndirilərək çox səmimi, ürəkdən gələn fikirlər söylənilmişdir. Bu fikirlər içərisində müasir Azərbaycan ədəbiyyatının yaradıcılarından olan, xalq yazıçısı, professor, Elçin Əfəndiyevin müəllimi olmuş Mir Cəlalın, xalq şairi Mirvarid Dilbazinin və türk alimi, professor Metin Turanın fikirləri çox maraqlı və səmimidir.

Görkəmli yazıçı Mir Cəlal Paşayev öz tələbəsi haqqında fikirlərini belə ümumiləşdirmişdir: “Elçin ədəbiyyata peşə üçün yox, amal üçün gəlib. Ehtiraslı və cəsurdur...”

Şairə Mirvarid Dibazinin də Elçin haqqında söylədiyi “ Mənim bütün həyat təcrübəm göstərir ki, Siz özünüz də aqil doğulmusunuz. “Kəlilə və Dimnə”də belə bir söz var: “Ağılsız adama söz demək anadangəlmə karın qulağına hikmət dərsi oxumaq, su üstünə siir yazmaq kimi bir şey olardı”. Dünya pedaqoji alimlərinin fikrincə, uşaq kamilliyi də, naqisliyi də doğulanda özü ilə gətirir. Tərbiyə, mühit isə bunları az-çox inkişaf etdirmək qabiliyyətinə malikdir.

Əziz Elçin! Sizə yaradıcılığınızda, vəzifələrinizdə, xalq işinizdə, səhhətinizdə, şadlıq, gümrahlıq, müvəffəqiyyətlər arzu edirəm” fikirləri də çox maraqlı və ibrətamizdir.

Türk alimi, professor Metin Turan da Elçin haqqında olan fikirlərini belə ümumiləşdirmişdir: “Türk dünyasının böyük yazarı, professor-doktor Elçin yüzilin yetirdiyi, həm də sadəcə Azərbaycan xalqının deyil, böyük insanların duyğularını dilə gətirmiş önəmli bir şəxsiyyətdir. Türkiyədə çap olunan “Mahmud və Məryəm”, “Ağ dəvə”, “Ölüm hökmü”, “Şuşa dağlarını duman bürüdü”, “Sarı gəlin” kitabları ilə yanaşı, Ankara, Ərzurum, Konya Dövlət Teatrlarında səhnəyə qoyulan “Mənim sevimli dəlim”, “Mən sənin dayınam” və “Mənim ərim dəlidir” adlı pyeslər də xalqımızın böyük məftunluqla oxuduğu və tamaşa etdiyi əsərlərdəndir.

Türk xalqları ədəbiyyatının ulduzu, ortaq qürur qaynağımız - Elçin”.

Biblioqrafik göstəricidə “Görkəmli şəxsiyyətlər Elçin haqqında” fikirlərin ümumiləşdirilmiş şəkildə verilməsi təqdirəlayiq bir haldır. Hər bir oxucu bu fikirlərlərlə tanış olarkən Elçin şəxsiyyəti, yaradıcılığı, əsərlərinin bədii dəyəri, onun ictimai-siyasi fəaliyyəti, yaradıcılıq laboratoriyası, xarici ölkə ədəbiyyatı və mədəniyyəti ilə olan əlaqələri haqqında daha ətraflı informasiya əldə edir. Belə informasiyanın vəsaitə daxil edilməsi biblioqrafik göğstəricinin mükəmməlliyinin və müəllifinin peşəkarlığının göstəricisidir.

Biblioqrafik göstəricinin maraqlı və oxunaqlı olan “Elçinin kitab haqqında fikirləri” və “Elçinin “ədəbi düşüncələri”ndən” adlı bölmələridir. Doğrudur, kitab haqqında müxtəlif müəlliflər tərəfindən çox qiymətli fikirlər, kəlamlar yazılmış və söylənilmişdir. Elçin Əfəndiyevin “kitab haqqında” olan fikirləri öz səmimiliyi və konkretliliyi ilə fərqlənir. Bu fikirlər müasir dövrümüz üçün də çox əhəmiyyətli və müasir şəraiti şərtləndirən xüsusiyyətlərdir. “Kitab doğmalığı”, Kitab küskünlüyü”, “Kitab və illuziyalar aləmi”, “Kitab və oxucu” kimi başlıqlar altında böyük yazıçının fikirləri əks etdirilmişdir.

“Kitab küskünlüyü” başlığı altında böyük yazıçının fikirləri çox maraqlıdır: “ Son zamanlar deyirlər ki, bizdə kitaba maraq azalıb, həvəs itib. Mənə elə gəlir ki, əksinədir. Kitab özü bizdən küsüb”.

Elçinin “Ədəbi düşüncələr”indən bölməsində isə onun Azərbaycan, rus və Avropa yazıçı və şairlərinin yaradıcılıq xüsusiyyətləri, ədəbi janrlar - xüsusilə, hekayə, poeziya, roman haqqında fikirləri lakonok şkildə oxuculara çatdırılır. Yazıçının ədəbi düşüncələri içərisində “Sabirin dahiliyi”, “Dahiyanə sadəlik”, “Sənətkar ölmür”, “Şekspir haqqında” “Özümlə söhbət”, “Tanışlıq”, “İki dünya” haqqında olan fikirləri çox səciyyəvidir. Bu fikirlər içərisində “Kitab cəmiyyətin ifadəsidir” düşüncələri bu günkü günümüzlə səsləşən fikirlərdir: “Bu gün cəmiyyət başdan-başa siyasiləşib və o adam ki, on il bundan əvvəl yatsa, yuxusuna gətirməzdi, indi nadan siyasi mülahizələr yürüdür. Və bu gün kitablar da siyasiləşib. Ona görə də onları oxumaq da mümkün deyil” düşüncələri Elçin Əfəndiyevin ictimai-siyasi baxışlarının göstəricisidir.

Biblioqrafik göstərici Elçin Əfəndiyevin 1959-2013-cü illərdə dərc edilmiş əsərlərini, onun haqqında olan ədəbiyyatı, ədəbi-bədii, publisistik yaradıcılığını, aldığı fəxri fərman və ordenləri, həyat və fəaliyyətinin əsas tarixləri, görkəmli şəxsiyyətlər Elçin haqqında, Elçinin kitab haqqınfda fikirləri, Elçinin “Ədəbi düşüncələri” ndən bölmələrini əks etdirməklə yanaşı, üç hissədən ibartdir:

I hissə: Əsərləri – kitablar, dövri mətbuatda və məcmuələrdə dərc edilmiş əsərləri, romanları, povestləri, hekayələri, ssenariləri, dram, səhnəcik və radio - əsərləri, ədəbi-tənqidi, publisistik məqalələri, habelə, müsahibələri, tərcümələri, tərtib etdiyi, redaktoru olduğu və rəy verdiyi əsərlər sistemləşdirilmişdir.

II hissə: Həyat və yaradıcılığı haqqında ədəbiyyatı əhatə edir. Bu bölmə daxilində - kitablar, Disserftasiya və avtoreferatlar, dövri mətbuatda və məcmuələrdə çap edilmiş məqalələr, ekranlaşdırılmış əsərləri haqqında, səhnələşdirilmiş əsərləri haqqında, Elçinin Xaricdə Yaşayan Həmvətənlərlə Azərbaycan Mədəni Əlaqələr Cəmiyyəti – “Vətən” Cəmiyyətində fəaliyyəti, Elçinin Azərbaycan Respublikası Baş nazirinin müavini kimi fəaliyyəti işiqlandırılmışdır.

Biblioqrafik göstəricidə bölmə və yarımbölmələr daxilində materiallar xronoloji prinsip əsasında qruplaşdırılaraq Azərbaycan və rus dillərində sistemləşdirilmişdir.

Vəsaitin “Elektron resurslar” yarımbölməsində Elçin haqqında internetdə verilən materiallar toplanaraq əks etdirilmişdir. Bu yarımbölmə daxilində Elçin Əfəndiyev haqqında müxtəlif internet saytlarında çıxmış 75 adda mənbənin xronoloji ardıcıllıqla biblioqrafik təsviri verilmişdir. (2.S.331)

“Elçin” şəxsi biblioqrafik göstəricinin III hissəsi köməkçi göstəricilərə həsr edilmişdir ki, buraya - Eçinin əsərlərinin əlifba göstəricisi, Elçin haqqında yazan müəlliflərin əlifba göstəricisi, Sərlövhə üzrə təsvir olunmuş materialların əlifba göstəricisi daxildir. Vəsaitin bu hissəsində də mənbələr Azərbaycan və rus dillərində qruplaşdırılmışdır. Biblioqrafik vəsaitdən istifadəni asanlaşdırmaq və vaxt itkisinə qənaət etmək baxımından köməkçi göstəricilərin əhəmiyyəti olduqca böyükdür.

“Azərbaycanın görkəmli şəxsiyyətləri” seriyasında görkəmli yazıçı, tanınmış ictimai xadim Elçin Əfəndiyevə həsr edilmiş bu şəxsi elmi-köməkçi xarakterli biblioqrafik tədqiqat əsəri Azərbaycan Milli Kitabxanasının uğurlu biblioqrafik fəaliyyətinin nəticəsidir. Bu uğurlu, müasir Biblioqrafiyaşünaslıq elminin nəzəri müddəalarına əsaslanmaqla və bibloqrafiyalaşdırma metodikasına əməl edilməklə, öz mükəmməlliyi ilə seçilən biblioqrafik vəsait Milli Kitabxananın direktoru, Əməkdar Mədəniyyət işçisi, tarix üzrə fəlsəfə doktoru, professor Kərim Tahirovun peşəkarlığı və bu sahəyə ciddi münasibətinin nəticəsi olaraq ərsəyə gəlmişdir.

Elçin (Əfəndiyev Elçin İlyas oğlu) biblioqrafik tədqiqat əsəri müasir Azərbaycan ədəbiyyatşünaslıq biblioqrafiyası elmini zənginləşdirməklə, uğurlu nailiyyəti də hesab edilə bilər.

ƏDƏBİYYAT

1.Elçin (Əfəndiyev Elçin İlyas oğlu): Biblioqrafiya/ Tərtibçi-müəllif B.A.Ələsgərov:M.F.Axundov adına Azərbaycan Dövlət Kitabxanası.- Bakı,1997.-206s.

2.Elçin (Əfəndiyev Elçin İlyas oğlu): biblioqrafiya/ixtisas red.və burax.məsul K.Tahirov; red.G.Səfərəliyeva; M.F.Axundov adına Azərbaycan Milli Kitabxanası .-Bakı,2013.-560s.

3.Əliyev Z.H. Rəy //Elçin (Əfəndiyev Elçin İlyas oğlu): Biblioqrafiya/ M.F.Axundov adına Azərbaycan Dövlət Kitabxanası.- Bakı,1997.-S.9.

4.İsmayılova S.P.Azərbaycanda bədii ədəbiyyat və ədəbiyyatşünaslıq biblioqrafiyası(1965-2000-ci illər).Bakı.:”Nurlan”, 2009.- 184s.

Ш. Гамбарова

НАСЛЕДИЯ ЭЛЬЧИНА ЭФЕНДИЕВА В БИБЛИОГРАФИЧЕСКИХ НАСЛЕДИЯХ

Р Е З Ю М Е

В статье анализирована система библиографических указателей посвященных жизни и творчеству видного деятеля азербайджанской литературы Эльчина.

Sh. Gambarova

THE HERITAGE OF ELCHIN EFENDIYEV IN BIBLIOGRAPHIC SOURCES

S U M M A R Y

The article analyzed the system of bibliographic indexes  on the life and literature activity  of a prominent figure of Azerbaijani literature Elchin.

Kitabxanaşünaslıq və biblioqrafiya: Elmi-nəzəri, metodik və təcrübi jurnal.- 2014.- № 2.- S. 124-130.