UNESCO və Avropa Şurasında uğurlu təqdimat
Fikrət Babayev: «Mədəniyyətimiz
Avropanın ən mötəbər yerlərində
təqdim olundu»
Xəbər verildiyi kimi, martın 28-dən 30-dək Novruz
bayramının UNESCO-nun Qeyri-Maddi
Mədəni İrs siyahısına daxil edilməsi və 2010-cu ilin UNESCO tərəfindən
«Mədəniyyətlərin Yaxınlaşması ili» elan olunmuşdur. Bununla
əlaqədar TÜRKSOY Baş
katibliyinin təşəbbüsü
və bu quruma üzv dövlətlərin nümayəndə
heyətlərinin iştirakı
ilə UNESCO-nun və Avropa Şurasının qərargahlarında
Novruz bayramının
təqdimat mərasimləri
keçirilib. Tədbirlərdə
TÜRKSOY-un Baş katibi Düsen Kaseinov və UNESCO Baş katibinin müavini Marsio Barboso iştirak ediblər. Təqdimat mərasimlərində iştirak
edən Mədəniyyət
və Turizm Nazirliyinin nümayəndə
heyətinə nazirliyin
Mədəniyyət siyasəti
şöbəsinin müdiri
Fikrət Babayev rəhbərlik edib. Nümayəndə heyətinə xanəndə,
Əməkdar artist Nuriyyə Hüseynova, Xalq artisti Firuz
Əliyev (tar), Əməkdar artist Munis Şərifov (kamança), musiqiçilər
Aydın Əliyev (qarmon), Eyvaz Rzayev (nağara) və Xalq artisti
Cəmilə Bayramovanın
rəhbərliyi ilə
Azərbaycan Dövlət
Mahnı və Rəqs Ansamblının rəqs qrupu daxil idi.
Səfər təəssüratını
qəzetimizlə bölüşən
F.Babayev bildirdi ki, tədbirdə Türkiyə, Qazaxıstan,
Qırğızıstan, Rusiya
Federasiyasının Tatarıstan,
Başqırdıstan və
Tuva respublikaları,
Moldova Respublikasının Qaqauz
Muxtar Qurumu təmsil olunub: «UNESCO-da Novruz bayramı
çox yüksək
səviyyədə qeyd
edildi. Qurumun 1300
nəfərdən artıq
tamaşaçının yerləşə
biləcəyi akt zalı tamamilə dolmuşdu. Burada UNESCO-nun rəhbər işçiləri, səfirlər,
diplomatlar, müxtəlif
diasporların təmsilçiləri
və ictimaiyyət nümayəndələri iştirak
edirdilər. Türkiyədə
yaşayan həmyerlimiz,
rejissor Əflatun Nemətzadənin rəhbərliyi
ilə gözəl bir təqdimat mərasimi hazırlandı.
Bu, Novruz bayramının fəlsəfəsini
iştirakçılara çatdıran
uğurlu bir təqdimat idi. Tədbirin ən maraqlı hissəsi isə finalda konsert iştirakçılarının
birlikdə əllərində
xonça zala düşərək tamaşaçılara
bayram şirniyyatları
təqdim etməsi oldu. Bununla Novruz
bayramının sülhə,
barışa, xalqlar arasında dostluğa səsləyən bir mərasim olduğu təlqin edildi».
UNESCO-nun Parisdəki mənzil-qərargahındakı
təqdimatdan sonra Azərbaycan nümayəndə
heyəti matrın
30-da Strasburq şəhərinə
yola düşüb. Avropa
Şurasının qərargahında
da təqdimat mərasimi uğurla keçib: «Tədbirdə
çoxsaylı Azərbaycan
diasporunun nümayəndələri
iştirak edirdi. Qeyd edim ki,
üçgünlük səfər
çərçivəsində çox böyük iş görüldü. Mədəniyyətimiz Avropanın
ən mötəbər
yerlərində təqdim
olundu. Bu, çox mühüm hadisə kimi qiymətləndirilməlidir».
Fəxriyyə Abdullayeva
Mədəniyyət.- 2010.- 7 aprel.- S. 12.