Həvəskar və tətbiqi sənət ustalarının əsərlərindən ibarət fond

Mədəniyyət və Turizm Nazirliyinin Mədəniyyətşünaslıq üzrə Elmi-metodiki Mərkəzində həvəskar təsviri və tətbiqi sənət ustalarının əsərlərindən ibarət fond yaradılıb. Mərkəzin İncəsənət bilikləri şöbəsinin müdiri Rafiq Quliyevin verdiyi məlumata görə, fondun yaradılmasında məqsəd yaradıcılıqla məşğul olan rəssamların və tətbiqi sənət ustalarının əl işlərinin daha geniş səviyyədə təbliğinə nail olmaqdır. Fondun mədəniyyət və turizm naziri Əbülfəs Qarayevin təşəbbüsü ilə yaradıldığını deyən R.Quliyev burada ölkənin müxtəlif bölgələrində yaradıcılıq fəaliyyəti göstərən təsviri və tətbiqi sənət ustalarının 100-dən artıq əsərinin yer aldığını bildirib. Onun sözlərinə görə, fondda ölkə miqyaslı sərgilərdə nümayiş olunan ən yaxşı əsərlər seçilib. Gələcəkdə burada sənət əsərlərinin say tərkibinin artırılması nəzərdə tutulur.

Rafiq Quliyev onu da qeyd edib ki, Mədəniyyət və Turizm Nazirliyinin dəstəyi ilə həvəskar rəssam və tətbiqi sənət ustalarının respublika üzrə təşkil olunan sərgilərində fərqlənən sənətkarların əsərlərindən ibarət fərdi sərgilər təşkil olunacaq. Tədbir Xaçmaz Rayon Rəsm Qalereyasında baş tutacaq. Hazırda isə fərdi sərgiləri keçiriləcək bacarıqlı sənətkarların seçimi aparılır. Həvəskar yaradıcılıq nümunələrinin nümayişi bir həftə davam edəcək.

Mədəniyyət.- 2010.- 18 avqust.- S. 4.