İşıqlı insanın işığında

Yusif Səmədoğlu – 75

Dekabrın 23-də Yazıçılar Birliyinin Natəvan klubunda XX əsr Azərbaycan nəsrinin ən görkəmli simalarından biri Yusif Səmədoğlunun anadan olmasının 75 illiyinə həsr olunmuş tədbir keçirildi. Tədbir iştirakçıları əvvəlcə Fəxri xiyabanda yazıçının məzarını ziyarət edərək abidəsi önünə tər çiçəklər düzdülər.

Əgər Yusif Səmədoğlu olmasaydı, ədəbiyyatımızda roman janrının zirvələrindən biri sayılan “Qətl günü” olmayacaqdı. Yusif Səmədoğlunun 20 ilə yazdığı bu əsər nəsrimizin sütunlarından birinə çevrildi, 20 il Yusif Səmədoğlu “Qətl günü”nün içində oldu, əvəzində ilk dəfə ədəbiyyatımızda çoxqatlı roman janrının ən gözəl nümunələrindən biri yarandı. Az və zərgər dəqiqliyi ilə gözəl yazmaq nümunəsini də ədəbiyyatımıza o gətirdi. 14-15 hekayəsi ilə hekayə janrının ən gözəl nümunələrini yaratmağa nail oldu.

Yusif Səmədoğlu şəxsiyyəti, sənəti, yeni baxışı, düşüncəsi ilə çox böyük örnək, məktəb oldu. Adi, əslində qeyri-adi insanı dostları, yaxınları “Allahın nur payı” adlandırırdılar. Və bir də Yusif Səmədoğlu həyatı çox sevərdi. Yazıçılar Birliyinin sədri Anar, Xalq şairi Fikrət Qoca, “Azərbaycan” jurnalının baş redaktoru İntiqam Qasımzadə, ədəbiyyatşünas Arif Əmrahoğlu, tanınmış şair Çingiz Əlioğlu, tənqidçi Vaqif Yusifli, yazıçı Natiq Rəsulzadə Yusif Səmədoğlunu belə xatırladılar.

Yusif Səmədoğlu xatirələrdə hələ sağdı, yaşayır. Xeyirxahlığı, ürəyiaçıqlığı, mehribanlığı ilə. Onunla bağlı xatirələr bir-birini əvəz etdi. Hər kəs ürəkdən danışdı, hər kəs onu xatırlamaqdan məmnunluq duydu.

Yazıçının qardaşı, Xalq şairi Vaqif Səmədoğlu ömrü boyu böyük qardaşına - Yusifə oxşamaq istədiyini, ondan örnək götürdüyünü söylədi və Yusifin xatirəsinə yığışan iştirakçılara öz təşəkkürünü bildirdi.

Dekabrın 25-də Yusif Səmədoğlunun 75 yaşı onsuz qeyd ediləcək. Əsərlərinin, xatirələrinin yaşı isə ömründən çox-çox uzun olacaq…

Təranə Vahid

Mədəniyyət.- 2010.- 24 dekabr.- S. 5.