Kitablarımız növbəti beynəlxalq yarmarkada

Xəbər verdiyimiz kimi, fevralın 10-da Belarusda XVII Minsk Beynəlxalq Kitab Sərgi-Yarmarkasının açılışı olub. Gürcüstan, Bolqarıstan, Almaniya, İsrail, İran, Qazaxıstan, Koreya, Çin, Kuba, Litva, Moldova, Polşa, Rusiya, Suriya, Slovakiya, ABŞ, Tacikistan kimi ölkələrin də iştirak etdiyi tədbirdə Azərbaycan ölkəmizdə nəşr edilmiş çap məhsulları ilə təmsil olunub. Çap məhsullarımız Azərbaycan Respublikası Mədəniyyət və Turizm Nazirliyi tərəfindən icarəyə götürülmüş 10 kv.m-lik stenddə nümayiş etdirilib. 125 adda 140 nəşr məhsulundan ibarət ekspozisiyamız mövzu, tərtibat, nəşrlərin poliqrafik icrası baxımından xüsusi diqqət çəkib.

Milli Sərgi Mərkəzində fevralın 10-u yerli vaxtla saat 12.00-da açılışı edilən tədbirdə Belarus Respublikasının informasiya naziri Oleg Proleskovski, mədəniyyət naziri Pavel Latuşko, digər rəsmi şəxslərlə yanaşı, Azərbaycan Respublikasının bu ölkədəki səfiri Əli Nağıyev də iştirak edib.

26 ölkənin iştirak etdiyi tədbirdə ümumilikdə eksponatlərın sayı 619 olub. Ənənəyə görə, hər il bir ölkə bu yarmarkada fəxri qonaq statusu ilə iştirak edir. Builki tədbirin fəxri qonağı statusunda olan Fransa 204 kv.m-lik ərazidə xüsusi dizaynlı stenddə öz çap məhsullarını sərgiləyib, o cümlədən müxtəlif fransız yazıçı və naşirlərlə görüşlər təşkil edərək, maraqlananlara milli mətbəxlərindən və məşhur fransız ətirlərindən nümunələr təqdim ediblər.

Sərginin keçirildiyi 4 gün ərzində Azərbaycan stendi də maraqla izlənib. Bu müddətdə tamaşaçılar dövlətçiliyimizə, tariximizə, Qarabağ həqiqətlərinə, mədəniyyət və incəsənətimizə dair Azərbaycan, rus, ingilis dillərində hazırlanmış nəfis kitablarla tanış olublar. Ölkəmizi tanıdan müxtəlif bukletlər, CD-lər, kitabçalar tədbir izləyicilərinə hədiyyə edilib. Azərbaycan nümayəndə heyəti eyni zamanda Azərbaycanda gedən proseslər, mədəni həyatın inkişafı və Qarabağ həqiqətləri haqqında ziyarətçilərə geniş məlumatlar veriblər.

Sərgi müddətində nümayəndə heyətimiz eyni zamanda “P.Brovki adına Belarus Ensiklopediyasının direktoru Tatyana Belova və ensiklopediyanın yaradıcı heyəti ilə, “Literatura i Mastatsiya” nəşriyyatının direktoru, Belarus Yazıçılar Birliyinin Rəyasət Heyətinin üzvü Ales Karlyukeviç və “Narodnaya avesta” nəşriyyatının direktoru Larisa Minko ilə görüşlər keçirərək həmin müəssisələrdə olublar.

Görüşlərdə kitab işi ilə bağlı ikitərəfli razılaşmalar əldə olunub.

Azərbaycanın da uğurla iştirak etdiyi XVII Minsk Beynəlxalq Kitab Sərgi-Yarmarkası öz işini fevralın 14-də başa çatdırıb.

SABUTAY

Mədəniyyət.- 2010.- 19 fevral.- S. 6.