Azərbaycan UNESCO-dakı sərgidə təmsil olunub

Azərbaycanın UNESCO yanındakı daimi nümayəndəliyindən bildiriblər ki, mayın 31-də UNESCO-da keçirilən İslam Konfransı Təşkilatının (İKT) günü çərçivəsində “Mədəniyyətlərin yaxınlaşmasında İslamın rolu” mövzusunda “dəyirmi masa”, mədəniyyət sərgisi və ziyafət təşkil edilib.

UNESCO-da belə bir mövzuda “dəyirmi masa”nın keçirilməsi ideyası çoxdan nəzərdən keçirilirdi. Lakin bu tədbirlə yanaşı, sərgi və ziyafətin təşkil olunması təklifi son anda gündəliyə salınıb və İKT üzv dövlətlərin əksəriyyəti tərəfindən dəstəklənib.

Bu silsilə tədbirlərin keçirilməsində əsas məqsəd mədəniyyətlərin yaxınlaşması çərçivəsində İslamın sülhsevər və ümumbəşəri dəyərlərə sadiq olan din kimi nümayiş etdirilməsinə, eləcə də İKT ilə UNESCO-nun işbirliyini artırmağa yönəlib.

Azərbaycan İKT-nin üzvü kimi bu tədbirlərin təşkili prosesindən kənarda qalmayıb, həm sərgiyə, həm də ziyafətə önəmli töhfəsini verib. Sərgidə ölkəmizin milli incəsənət əşyaları və musiqi alətləri ilə yanaşı, xalçalar, Azərbaycanın zəngin mədəniyyəti, o cümlədən Şərqlə Qərb arasında oynadığı körpü rolu haqqında kitab və broşürlər nümayiş etdirilib, qonaqlara digər təbliğat xarakterli materiallar paylanıb.

Sərgidən sonra keçirilmiş ziyafət zamanı ölkəmizin masası zəngin Azərbaycan mətbəxinin məhsulları olan şəkərbura, paxlava və başqa məhsullarla bəzədilib. “Dəyirmi masa” iştirakçıları Azərbaycanla bağlı sərgiyə, milli mətbəximizin nümunələri olan şirniyyatlara böyük maraq göstərib.

Mədəniyyət.- 2010.- 4 iyun.- S. 15 .