Mədəniyyət qardaşlıq körpüsüdür

Xəbər verildiyi kimi, mədəniyyət və turizm naziri Əbülfəs Qarayevin başçılıq etdiyi nümayəndə heyəti mayın 23-28-də Səudiyyə Ərəbistanının Ər-Riyad şəhərində keçirilən “Müsəlman ölkələrinin memarlıq irsinin mədəni və iqtisadi inkişafda rolu” adlı I Beynəlxalq Konfransda iştirak edib. Nümayəndə heyətinin üzvü, Mədəniyyət və Turizm Nazirliyi Mədəniyyətşünaslıq üzrə Elmi-Metodiki Mərkəzin Tətbiqi sənət və sərgilər bölməsinin rəhbəri, rəssam, heykəltəraş Rafiq Quliyev 70-dən çox ölkənin təmsil olunduğu konfrans barədə təəssüratını bölüşüb:

- Konfrans çox yüksək səviyyədə təşkil olunmuşdu. Tədbirdə Azərbaycanın nümayəndə heyətinə, ölkəmizin milli-mədəni dəyərlərinə, zəngin mədəni irsinin təqdim pavilyonuna böyük maraq var idi. Ziyarətçilər nümayiş olunan işlərlə yaxından tanış olur, bizi yeni sərgilər yaratmaq üçün öz ölkələrinə dəvət edirdilər. Bizim apardığımız materialların hamısı unikal nümunələr idi, tamaşaçının diqqətini dərhal cəlb edirdi. Mənim apardığım işlər qrafik işlər, həmkarım Vüqar Məmmədovun işləri isə ağac üzərində oyma nümunələri idi. Səudiyyə Ərəbistanının mədəniyyət və turizm naziri şəxsən bizim pavilyona yanaşıb nümayəndələrlə çox səmimi görüşdü və bizi təbrik etdi. Bu diqqət bizim nümayəndə heyəti üçün çox önəmli idi.

Onu da qeyd edim ki, konfransda mədəniyyət və turizm naziri Ə.Qarayev çox məzmunlu çıxış etdi. Onun cıxışının əsas hissəsi bizim Dağlıq Qarabağda və erməni işğalı altındakı rayonlarda qalmış mədəni irs nümunələrinin taleyi ilə bağlı idi. Nazir öz çıxışı ilə bu problemi növbəti dəfə dünya ictimaiyyətinin, konfransda təmsil olunan ölkələrin diqqətinə çatdırdı.

Konfransda iştirak şəxsən mənim özüm üçün də uğurlu oldu. Mənim ötən il cap olunmuş “Təsviri sənətdə insan dünyası” kitabım rəğbətlə qarşılandı. Məni Səudiyyənin universitetlərindən birinə dərs deməyə dəvət etdilər.

Bu səfərin bizim üçün önəmli cəhətlərindən biri də o idi ki, biz orada olarkən Məkkəni, müqəddəs Kəbəni də ziyarət etmək imkanı qazandıq, Allahımıza xalqımız üçün dualar etdik. Sonda isə onu demək istəyirəm ki, mədəniyyətlər xalqlar arasında anlaşma, qardaşlıq körpüsüdür, bu qardaşlığı isə qorumaq lazımdır.

Ruqiyyə Arifqızı,

sənətşünas

Mədəniyyət.- 2010.- 11 iyun.- S. 8 .