Baba Vəziroğlunun yaradıcılıq gecəsi

İyunun 23-də Dövlət Filarmoniyasının yay zalında Əməkdar incəsənət xadimi, şair Baba Vəziroğlunun “Məndən bir də olmayacaq” adlı yaradıcılıq gecəsi keçirildi.

Gecədə çıxış edən Baba Vəziroğlu qonaqlara təşəkkürünü bildirdi: “Bu qədər insanın bu tədbirə gəlməsi məni çox xoşbəxt edir. Bu o deməkdir ki, bu illər ərzində çəkdiyim əziyyət boşa getməyib. Müəllifi olduğum hər bir şeirimlə insanlara gözəl hisslər aşılamağa çalışmışam. Xoşbəxtəm ki, bu gün çoxsaylı sənət dostlarım buraya toplaşıblar”. Xatırladaq ki, Baba Vəziroğlunun şeirlərinə çoxsaylı mahnılar bəstələnib.

"Həsən Seyidbəyli", "Yeri boş qalan adam" (Rəşid Behbudov), "Sənsiz və ya ömrün son axşamı" (Həsən Turabov), "Haradan başlanır vətən", "Elegiya" (Zərifə Əliyeva), "Beş nəğməlik ömür" (Oqtay Kazımov) və başqa sənədli filmlərin ssenari müəllifidir. Respublikanın Əməkdar incəsənət xadimidir.

Gecədə çıxış edən millət vəkili Fəttah Heydərov tədbirin mədəniyyət bayramı olduğunu vurğuladı və Baba Vəziroğlu yaradıcılığından söz açdı. O bildirdi ki, Baba Vəziroğlunun şeirlərində böyük məhəbbət hissi aşılanır: “Bu məhəbbət həm anaya, həm qadına, həm də Vətənədir. Onun geniş oxucu auditoriyası vardır. Baba Vəziroğluna daha böyük yaradıcılıq uğurları arzulayıram”.

Çıxışlardan sonra gecə musiqili proqramla davam etdi. Xalq artistləri Mübariz Tağıyev, Flora Kərimova, əməkdar artistlər Tünzalə Ağayeva, Ədalət Şükürov, müğənnilər Aysel Teymurzadə, Lalə Məmmədova, Zamiq, Elnur, Elnarə Abdullayeva, Səməd Səmədov, Yalçın Rzazadə və başqaları Baba Vəziroğlunun şeirlərinə bəstələnmiş mahnıları ifa etdilər. Tədbirdə Novruz Aslan, Faiq Sücəddinov və başqaları çıxış edərək səbəbkarı təbrik etdilər. Şairin yaradıcılıq gecəsində çoxsaylı mədəniyyət və incəsənət xadimləri iştirak edirdi.

Nuray

Mədəniyyət.- 2010.- 25 iyun.- S. 4.