Böyük türkoloqun yubileyinə həsr olunmuş beynəlxalq konfrans

Aprelin 30-da M.F.Axundov adına Azərbaycan Milli Kitabxanasında böyük türkoloq-alim Əhməd Zəki Validi Toğanın 120 illik yubileyinə həsr olunmuş sərgi və beynəlxalq elmi konfrans keçirildi.

Mədəniyyət və Turizm Nazirliyi, TÜRKSOY və AMEA-nın Şərqşünaslıq İnstitutunun birgə təşkilatçılığı ilə keçirilən tədbiri kitabxananın direktoru Kərim Tahirov açaraq Türkiyə, Qazaxıstan, Özbəkistan, Qırğızıstan, Türkmənistan, Başqırdıstan və Krımdan gəlmiş qonaqları konfrans iştirakçılarına təqdim etdi. K.Tahirov bildirdi ki, Əhməd Zəki Validi Toğan 1890-cı ildə Başqırdıstanda, Ufa quberniyasının Kuzən kəndində dünyaya göz açıb. Əhməd Zəki doğma başqırd xalqının azadlığı uğrunda fəal mübarizə aparıb, eyni zamanda, böyük türkoloq-alim olub.

Mədəniyyət və turizm nazirinin müavini Sevda Məmmədəliyeva TÜRKSOY-un fəaliyyətini yüksək qiymətləndirərək, bugünlərdə qurumun qeyri-maddi mədəni irsin qorunması üzrə Bakıda keçirdiyi III Beynəlxalq seminarın mühüm əhəmiyyət daşıdığını dedi. O, TÜRKSOY-un 2010-cu ili «Əhməd Zəki Validi Toğan ili» elan etməsini də qurumun uğurlu addımı kimi dəyərləndirdi.

Elmi konfransda AMEA-nın Z.Bünyadov adına Şərqşünaslıq İnstitutunun direktoru, Milli Məclisin deputatı Gövhər Baxşəliyeva “Professor, doktor Əhməd Zəki Validi Toğanın həyatı və elmi fəaliyyəti”, Türkiyə Milli Kitabxanasının direktoru Tuncel Açar “Əhməd Zəki Validi Toğanın həyatı və fikir mücadiləsi”, Başqırdıstan Milli Kitabxanasının direktoru Azad İbrahimov “Ə.Z.Validi adına Başqırdıstan Milli Kitabxanası başqırd xalqının mənəvi-mədəni irsinin qoruyucu mərkəzi kimi” mövzularında məruzə etdilər.

Məruzə və çıxışlarda Əhməd Zəki Validi Toğanın həyatından və türkoloq-alim kimi əvəzsiz xidmətlərindən ətraflı söz açıldı. Onun “Türklərin ümumi tarixinə giriş”, “Oğuz haqqında dastan”, “Quran və türklər”, “Tarixi araşdırmalarda metodologiya”, “Müasir Türküstan və onun yaxın keçmişi” və digər əsərləri türkologiya elmi üçün bu gün də əhəmiyyətini itirməyən böyük töhfə kimi dəyərləndirildi. Bildirildi ki, onun ilk dəfə dərc etdirdiyi İbn Fadlanın “Səyahət kitabı” dünya alimlərinin arasında “türk tarixinin balaca ensiklopediyası” adlandırılır.

Tədbir çərçivəsində Əhməd Zəki Validiyə həsr olunmuş kitab sərgisinin açılışı da oldu. Bir həftə davam edəcək sərgidə yubilyarın əsərləri və onun haqqında yazılmış 200-dən artıq kitab nümayiş olunur.

F.Sakitqızı

Mədəniyyət.- 2010.- 5 may.- S. 15.