Rəsul Rzanın 100 illik yubileyinə həsr olunmuş tədbir

Mayın 4-də Tədris Teatrında Azərbaycan Dövlət Mədəniyyət və İncəsənət Universitetinin təşəbbüsü ilə Xalq şairi, Sosialist Əməyi Qəhrəmanı, Dövlət mükafatı laureatı Rəsul Rzanın 100 illik yubileyinə həsr olunmuş ədəbi-bədii mərasim keçirildi.

“Üzü küləyə” adlanan mərasimdə çıxış edənlər - professor Nizaməddin Şəmsizadə, şairlər Çingiz Əlioğlu və Ramiz Rövşən Rəsul Rzanı Azərbaycan şerinə yeni məzmun və forma gətirmiş novator bir şair kimi dəyərləndirdilər. R.Rza poeziyasının Azərbaycan ədəbiyyatına böyük təsiri vurğulandı. Natiqlər Rəsul Rzanın obrazlar, deyim tərzi, ifadələr, heç kəsin ona qədər işlətmədiyi qafiyələr və neologizmlərlə poeziyamızı zənginləşdirmiş bir sənətkar olduğunu vurğuladılar.

Qeyd olundu ki, ötən əsrin 30-cu illərində ədəbiyyata gələn R.Rzanın bu dövrdə, habelə Böyük Vətən müharibəsi (1941-1945) illərində bir çox gözəl əsərlər yaratmasına baxmayaraq, onun yaradıcılığının ən məhsuldar dövrü 50-ci illərin ikinci yarısında başlayıb.

Tədbirdə Xalq şairləri Rəsul Rza və Nigar Rəfibəylinin məhəbbətini, şairin həyatının müxtəlif anlarını əks etdirən fotoşəkillər nümayiş etdirildi. Şairin sözlərinə yazılmış mahnılar və unudulmaz şeirləri universitetin tələbələri və müəllimləri tərəfindən ifa olundu.

Tədbirdə Azərbaycan Yazıçılar Birliyinin sədri Anar da iştirak edirdi.

Nuray

Mədəniyyət.- 2010.- 5 may.- S. 5.