Aktrisa Ofeliya Aslan vəfat edib

Tanınmış aktrisa Ofeliya Aslan (Əfqanlı) mayın 18-də vəfat edib. 71 yaşlı aktrisa ürək tutmasından dünyasını dəyişib.

Qeyd edək ki, Ofeliya Aslan 1939-cu il yanvarın 27-də Bakıda, görkəmli aktyor Rza Əfqanlının ailəsində doğulub. 1983-cü ildə M.A.Əliyev adına Azərbaycan Dövlət İncəsənət İnstitutunun «Musiqili Komediya aktyoru» fakültəsini bitirib. 1963-cü ildən Musiqili Komediya Teatrında əvvəl xor artisti, sonra isə aktrisa işləyib.

Uzun fasilədən sonra 1997-ci ildə yenidən teatra qayıdıb.

O.Aslanın ilk rolu «Durna» komediyasında Lalə obrazı olub. Bundan sonra aktrisa get-gedə püxtələşərək, «Beşmanatlıq gəlin»də Gülnaz, «Arşın mal alan»da Telli, «Hicran»da Çarliston, «Axırı yaxşı olar»da Dilbər, «Bankir adaxlı»da Səmayə və s. rolları ifa edib.

Aktrisa keçmiş SSRİ-nin müxtəlif şəhərlərində qastrol səfərlərində olub. Moskvanın Operetta Teatrında tamaşaya qoyulmuş R.Hacıyevin «Mama, ya jenyus» əsərində Bibixanım rolunda çıxış edib.

Allah rəhmət eləsin.

Mədəniyyət.- 2010.- 19 may.- S. 6.