Rəsul Rzanın ev-muzeyi yenidən açıldı
Mayın 14-də Göyçay
şəhərində Xalq
şairi Rəsul Rzanın ev-muzeyinin təmir və bərpadan sonra təntənəli açılışı
oldu. Mərasimdə iştirak etmək üçün Bakıdan
geniş nümayəndə
heyəti Göyçaya
getmişdi.
Yolboyu düşünürdüm:
bir vaxtlar bu yollar gələcəyin
böyük şairini
arzularının dalınca
böyük şəhərə
- Bakıya aparırdı.
Yollar aparırdı,
amma o bilmirdi
ki, qarşıda onu hansı həyat gözləyir. Yaxşı ki bilmirdi, özünə və sözünə güvənirdi. Bir də qoyub gəldiyi
qollu-budaqlı çinarlara...
Sonralar yaradıcılığında
çinarlar pöhrələyib
böyüdü, qol-qanad
açdı, Rəsul
Rza poeziyası ənənəvi poeziyanın
divarlarını aşıb
sərbəst oldu... Çinar kimi...
Özü də çinar ömrü yaşadı. Qollu-budaqlı,
əzəmətli, kölgəli...
Nə qorxdu, nə əyildi, nə sındı.
Çinar beş yüz ildən bir az
Bircə yaz
Az yaşadı.
Amma yaşadı
ha!!!
Bu gün çinar ömürlü şairin100 yaşı
tamam olur.
Qarayazı, Qaraməryəm kəndləri
arxada qalır, yollar bizi istədiyimiz
ünvana çatdırır. Rəsul Rzanın
ev-muzeyinin açılışına
gələnləri nar bağları, xan çinarları, bu yurdun övladları,
Rəsul Rza ocağının Anarı
və doğmaları
qarşıladı.
Əvvəlcə rayon ictimaiyyəti və qonaqlar Heydər Əliyev Mərkəzini ziyarət edib, ulu öndərin xatirəsini tər çiçəklərlə yad
etdilər. Sonra ziyarətçilər Rəsul
Rzanın evinə yol aldılar.
Rəsul Rzanın
ev-muzeyinin açılış
mərasimini Rayon İcra
Hakimiyyəti başçısının
müavini Rəxşəndə
Rəcəbova açaraq
tədbir iştirakçılarını
salamladı, şairin
həyat və yaradıcılığından danışaraq qeyd etdi ki, harada
olursa-olsun, Rəsul Rza üçün Vətən Göyçaydan
başlayıb. Anası
Məryəm xanımın
şirin laylalarını
bu evdə eşidib, 12 yaşında
ilk şeirini bu evdə yazıb.
Sonra rayon ziyalıları adından
çıxış edən
7 saylı məktəbin
direktoru Adil Məmmədov həyəcanlı,
yaddaqalan, tarixi bir an yaşadıqlarını
belə bildirdi. “Bu gün Göyçayda
yeni bir mədəniyyət ocağının,
poeziya evinin açılışında iştirak
edirik. Rəsul Rza 100 il əvvəl burada dünyaya gəldi, buradan sənət yoluna addımladı, poeziyası ilə dünyanın tərəqqipərvər
oxucularının ürəyini
fəth etdi və uzun illərdən
sonra öz evinə qayıtdı. Bundan sonra Rəsul
Rzanın doğulduğu
ocaq ev-muzeyi, xatirə muzeyi, poeziya evi kimi
fəaliyyət göstərəcək,
bu müqəddəs ocaq Göyçay ziyalılarının ən
çox üz tutduğu bir məkan olacaq”.
Göyçay Rayon İcra Hakimiyyətinin başçısı Mənsur
Məmmədov da Azərbaycan ədəbiyyatında,
Azərbaycanın ictimai
həyatında öz
sözünü demiş
həmyerliləri Rəsul
Rzanın ev-muzeyinin açılışı münasibəti
ilə tədbir iştirakçılarını təbrik etdi.
Rəsul Rza adına
Beynəlxalq Ədəbiyyat
Fondunun mükafatı
Tədbirdə daha sonra Rəsul Rza adına Ədəbiyyat Fondunun sədri, Xalq şairi Fikrət Qoca çıxış edərək bildirdi ki, fondun təsis
etdiyi mükafat bu il əlamətdar
bir gündə sahiblərinə təqdim
olunacaq. Mədəniyyət
və turizm naziri Əbülfəs Qarayevə, Göyçay
RİH başçısı Mənsur Məmmədova, heykəltəraş Azad Zeynalova, “Azərbaycan” qəzetinin mədəniyyət
şöbəsinin müdiri
Flora Xəlilzadəyə, Rəsul
Rzanın ev-muzeyinin direktoru Solmaz Həsənovaya, rejissor Əhliman Qafarova Rəsul Rza mükafatları təqdim
olundu.
Xoş təsadüf
Mərasimdə çıxış
edən mədəniyyət
və turizm naziri Əbülfəs Qarayev bildirdi ki, son illər Azərbaycan ümummilli liderimiz Heydər Əliyev siyasətinin yeni mərhələsini yaşayır: «Ülu öndər mədəniyyət
sahəsinə xüsusi
önəm verirdi. Bu ənənə bu gün daha geniş
miqyasda həyata keçirilir. Şəhərlərin
görkəmindən tutmuş
yeni mədəniyyət
ocaqlarının yaradılmasınadək
böyük işlər
görülür, incəsənət
və mədəniyyət
xadimlərinə diqqət
və qayğı göstərilir.
Nazir Rəsul
Rzanın 100 illiyinin geniş şəkildə
qeyd olunmasının əhəmiyyətindən söz
açdı: “Azərbaycan
poeziyasında Nizamidən,
Xəqanidən tutmuş
bugünə qədər
yaşayıb-yaradan şairlərin
sırasında Rəsul
Rzanın özünəməxsus
yeri var, o yer hər zaman
Rəsul Rzaya məxsus olacaq”.
Nazir böyük şairin ev-muzeyinin açılışının 18 may Beynəlxalq Muzeylər Günü ərəfəsinə təsadüf etdiyini vurğulayaraq bunun xoş bir təsadüf olduğunu dedi: “Görün, nə gözəl təsadüfdür. Rəsul Rzanın ev-muzeyinin belə bir vaxtda açılması Beynəlxalq Muzeylər Gününə töhfədir. Bu gün Azərbaycan xalqı üçün yeni bir mənəviyyat ünvanı yaradıldı”.
Çıxışının sonunda muzeyin yaradılmasında əməyi,
əziyyəti olan hər kəsə təşəkkürünü bildirən Ə.Qarayev əminliklə bildirdi ki, bu ünvanda
həyat davam edəcək, burada söz, poeziya, mənəvi ucalıq daima əziz tutulacaqdır.
Əbədi qayıdış
Rəsul Rza ocağının davamçısı, Xalq yazıçısı Anar
göyçaylıları, qonaqları salamlayaraq çoxdan gözlədikləri
günün gəlib çatdığını bildirdi. “14-15 yaşına
kimi yaşadığı
şəhərə Rəsul
Rza indi əbədi qayıtdı”,
- deyən yazıçı
Rəsul Rzanın 100 illik yubileyinin keçirilməsi ilə bağlı sərəncam
verdiyinə görə
ölkə başçısı
İlham Əliyevə
öz minnətdarlığını
bildirdi. O, bildirdi ki, Rəsul Rzanın yubileyi münasibəti ilə AMEA-da, Azərbaycan Pedaqoji Universitetində, Mədəniyyət və
İncəsənət Universitetində,
M.F.Axundov adına Milli Kitabxanada silsilə tədbirlər keçirilib. Türkiyənin
paytaxtında, şəhərlərində
Rəsul Rzanın 100 illiyi qeyd olunub.
Anar Rəsul Rza şeirlərini Türkiyə türkcəsinə
uyğunlaşdıran və
orada çap etdirən İmdad Əfşara təşəkkürünü
bildirdi.
“Muzeyin ərsəyə gəlməsi üçün
göstərdiyi səylərə
görə hörmətli
mədəniyyət və
turizm naziri Əbülfəs Qarayevə
xüsusi təşəkkür
edirəm. Mədəniyyət və Turizm
Nazirliyinin bu işlə məşğul
olan bütün əməkdaşlarına, Göyçay
Rayon İcra Hakimiyyətinə, Mənsur
Məmmədov başda
olmaqla bu işdə zəhməti keçən bütün
göyçaylılara təşəkkür
edirəm. Muzeyin
direktoru Solmaz xanıma minnətdarlığımı
bildirirəm. Onun fəaliyyəti nəticəsində
muzey nəfis şəkildə tərtib
olunub. Bu gün Rəsul Rza mükafatı alanların hamısını
təbrik edirəm”.
Çıxışlardan sonra
rəmzi qırmızı
lent kəsildi. 100 il əvvəl Rəsul Rzanın dünyaya göz açdığı ev qonaqlarını musiqi sədaları ilə qarşıladı...
Rəsul Rzanın
sadə, bol xatirələrlə dolu olan ev-muzeyində 600-dən
çox eksponat var. Dörd zaldan ibarət olan muzeydə şairin həyat və yaradıcılığını, ictimai-siyasi fəaliyyətini
əks etdirən guşələrlə yanaşı,
şairin həyat yoldaşı Nigar xanıma həsr olunmuş guşədə
qiymətli xatirələr,
izlər qorunub saxlanılır.
Rəsul Rzanın ev-muzeyini ziyarət edənlər bu ocaqdan xoş
xatirələrlə ayrıldılar. Bundan
sonra bu evin ziyarətinə gələnlər çox
olacaq. Çünki bu evdə çinar
ömürlü bir şairin ruhu yaşayır.
Belə yaşayacaqdı,
Kökü torpağa bağlı.
Vüqarlı çinar
kimi,
Müdrik babalar kimi.
Təranə Məmmədova,
Bakı-Göyçay-Bakı
Mədəniyyət.- 2010.- 19 may.- S. 4.