Dost gəlişi bayram olar

Bu günlərdə Bakı sakinləri Misir mədəniyyəti ilə tanış olmaq üçün daha bir imkan əldə etmişdilər. Misir Ərəb Respublikasının məşhur “Matroohda” folklor rəqs qrupunun R.Behbudov adına Mahnı Teatrındakı rəngarəng çıxışı tamaşaçılar tərəfindən alqışlarla qarşılanıb. 1975-ci ildə yaranmış folklor qrupu dünyanın bir çox ölkələrində çıxışlar edib, mükafatlar qazanıb.

Bugünlərdə Bakıda səfərdə olan Misirin təhsil nazirinin birinci müavini Məhəmməd Cabir Əbu əl Əla ali təhsil ocaqlarının rəhbərlərilə görüşüb, “Dünya sivilizasiyaları kontekstində Misir mədəniyyəti” elmi konfransında, Qafqaz Universitetində çıxış edib. Nazir müavini Misirin Bakıdakı Mədəniyyət Mərkəzinin yeni binasının rəsmi açılışında da iştirak edib. Xatırladaq ki, mərkəz 10 ildən çoxdur şəhərimizdə fəaliyyət göstərir.

Qonaq xalqlarımız arasındakı yaxınlıq, dostluq əlaqələrindən, burada təhsil alan misirli gənclərin əldə etdikləri uğurlardan, mənəvi bağlılığımızdan, mədəni dəyərlərdən danışaraq 2010-cu ilin əvvəllərində Misirdə keçirilən «Azərbaycan mədəniyyəti günləri»nə olan böyük maraqdan bəhs etdi. Mərkəzin direktoru doktor Adel Dərviş burada çalışdığı bir neçə il ərzində görülən işlərdən, gələcək planlardan məlumat verdi. Misirin ölkəmizdəki fövqəladə və səlahiyyətli səfiri cənab Saber Mənsur toplaşanlara ölkələrimiz arasındakı mehriban münasibətdən, əlaqələrin daha da inkişaf etdirilməsi imkanlarından danışaraq Azərbaycan xalqını qarşıdan gələn 28 May - Respublika Günü münasibətilə təbrik etdi, xoş arzularını bildirdi.

Hər iki ölkənin mahnıları, rəqsləri, musiqisi bir-birini əvəz etdikdən sonra şirin söhbət çay süfrəsi arxasında davam etdirildi. Açılış mərasimində digər ərəb ölkələrinin Bakıdakı səfirləri də iştirak edirdilər.

İ.Əsədova

Mədəniyyət.- 2010.- 21 may.- S. 15