Azərbaycan teatrının banisi

 

M.F.Axundzadə - 200

 

1812-ci il. Bu, bizim ilk dramaturqumuzun, xalqın ictimai durum, fəlsəfi düşüncə tərzi-hərəkətini, milli dərd-sər «ərizə»sini qələmlə ərz edən ilk mirzəmizin bir az fərqlə, milli dramaturgiyamızın təvəllüd tarixçəsidir. Elə bir milli-önəmli tarixçə ki, xalqımız onu ənənəvi «yubiley formatı»na nisbətdə daha üstün statusla - qarşıdakı 2 il boyunca qutlayacaq. Məhz bu məqsədlə bu yaxınlarda dövlət başçısı Mirzə Fətəli Axundzadənin 200 illik yubileyinin qeyd olunması barədə sərəncam imzalayıb.

 

Teatr tariximiz haqda «monoloq»

 

Tarixən bu xalqın əliqələmlisi az olmasa da, ədəbiyyat tarixmizdə özünə əbədilik qazanmış üç «Mirzə» var: Mirzə Fətəli, Mirzə Ələkbər, Mirzə Cəlil. Bütün istedad vaxtlarını «ahu-zari yar»a sərf edib, qələmlərini gül-bülbül ağaclarına çevirənlərə öz həyati məntiqiylə «durdeyən ilk Mirzəmiz «Kəmalüddövlə məktubları» ilə dünyaya Azərbaycanın fəlsəfi bəşəri-dramaturji düşüncə tərzi haqda da mesaj verdi. Ondan sonrakı Mirzəmizin timsalında bu sayaq mesajlar elə bizdən-bizə gəlirdi: «... hələ avtomobil minməyiriz», amma həm «Çırmanırıq keçməyə çay gəlməmiş». Hələlik sonuncu Mirzəmiz isə, tutalım, növbəti şedevrinə (xristian Qoqola müsəlmani rəhmət diləyəndən sonra) ustad bir təvazökarlıqla belə bir epiqraf verirdi: «Biz öz dağarcığımızı çəkək çuvallar cərgəsinə»...

Bir sözlə, bu dahi üçlük Azərbaycanın ədəbi-bədii, ictimai-fəlsəfi, milli-mənəvi bəyan mədəniyyətinin təkrarsız təmsilçisi, özgürlük avtoqrafıdır. Onların hər biri ilkinlik, banilik məqamına qalxıb, öz xalqını çoxdan bəri sivilizasiya səfərinə çıxmış dünya karvanına qoşandır.

Mirzə Fətəli baniliyilə - dramaturgiyamızla bağlı tarix göstərimiz az müddət deyil. Amma heç çox da deyil; o çağadək, artıq, dünya səhnələri «Olum, ya ölüm?!» xitab-nidalı monoloqlar söyləyir, «Homer, yoxsa Axilles? - Homer qələbənin sözü, Axilles isə özüdürdialoqları qurur, «Görəsən, ölüm Taleyranın nəyinə gərəkmiş?..» kimi fəlsəfi frazalar toxuyurdu.

 

Amma...

 

Elə həmin o dramatik dünyanın (xüsusən Şərqin) sənət tarixi dekorasiyasına yaxşı nəzər etdikdə bu da görsənir ki, əsrlərlə həyatdan çox həyət səhnələrinə cəlb edilmiş Azərbaycan xalqı teatral səhnəyəçıxma aktına geciksə , sənətin bu ən diri, dinamik meydanı üçün çoxlarından çox faktlara, həyati-psixoloji, fəlsəfi-kulturoloji materiallara malikdir. Amma o vaxtadək məhəlli «qaravəlli»lərə, «kos-kosa»lardan başqa heç nəyə baxmağa macal tapmamış bir xalqın xüsusi intellekt, etik-estetik hazırlıq təmrinləri tələb edən teatra maraq göstərib-göstərməyəcəyi ehtimalına bir ipucu görsənmədiyi halda səhnə əsəri yazmaq asanmı milli-məcnunluq idi? Böyük Mirzə Fətəli bu çətinliyin üstündən xətt çəkib, düz beş möhtəşəm pyes qələmə aldı. Hamısını da, dəftər-qələmdən uzaq salınmış bir xalqın nitqinə bab adlandırdı. Onlardan üçü - bu qədər dramatik nüvəyə malik ola-ola, tam nəqli bir ifadəhekayəti...») ilə başlayır ki, bu da bizə bir işarəti yarımbaşlıq bəxş etdi:

 

Hekayəti-Mirzə - 1

 

Mirzə Fətəlinin həyatı heç onun pyeslərindən az dramatik, kəşməkəşli olmayıb. Açıq etiraf etməsə , əsərlərindəki bəzi nüanslardan, haqqında yazılmış monoqrafiya məqalələrdən belə bir motiv keçir ki, o, çar Rusiyasının paqonunu çiyinlərində bir rütbə göstəricisindən əlavə, bir etnik sıxıntı göstərisi kimi daşıyırmış. Hələ bu da var ki, bu rütbə - polkovnik çini ona 59 yaşında, 40 il xidmət etdikdən sonra verilmişdi. Böyük yazıçı-dramaturqun ictimai-siyasi, milli-mənəvi gərginliklərlə dolu qəlbinə dalbadal vəfat edən səkkiz uşağının kədər-qəmini əlavə etsək, onun əli ilə yazılası daha neçə-neçə gözəl əsərlərdən məhrum olduğumuz haqda xəyali qənaətlərimizi reallaşdırmış olardıq...

1812-ci ildə Şəkidə anadan olmuş Mirzə Fətəlinin ailəsi 1814-cü ildə Təbriz yaxınlığındakı Xamnə qəsəbəsinə köçür. Dolanışıq çətinlikləri bu ailəni Güney Azərbaycanın müxtəlif bölgələrini gəzib-dolanmağa məcbur edir. Atası Mirzə Məhəmmədtağının vaxtsız vəfatı Fətəlinin xeyli dərəcədə təbii həyat axarını dəyişdirir. O, anası (Nanə xanım) ilə 1825-ci ildə - 13 yaşında ikən Şəkiyə qayıdır. Anasının əmisi Axund Hacı Ələsgərin qayğı nəzarəti altına keçir. Fətəlinin ruhani olmasını istəyən Hacı Ələsgər 1832-ci ildə onu Gəncəyə aparır.

Gələcəyin materialist filosofu, ictimai xadimi, yazıçı-dramaturqu - gənc Fətəli qədim Gəncədə məntiq fiqh elmlərini, habelə ünlü Azərbaycan şair filosofu M.Ş.Vazehdən xəttatlıq sənətini öyrənir. Əslində, gənc Mirzə Fətəli ilə müdrik Mirzə Şəfi münasibətləri yalnız xəttatlıq sənətini öyrənib-öyrətmə dairəsilə məhdudlaşmır. Bu görüş Mirzə Fətəlinin həyat yaradıcılığına, bir mütəfəkkir kimi yetişib-formalaşmasına çox önəmli təsir göstərir.

Fəal zehni qabiliyyət müasir elm, bilik üfüqləri. Birincinin daşıyıcısı olan Mirzə Fətəli ikinciyə çox dərin maraq göstərdiyindən, 1833-cü ildə Şəkidə açılmış rus məktəbinə daxil olur. Burada bir il təhsil aldıqdan sonra - 1834-cü ildə Tbilisiyə gedir. Tale onu Qafqaz canişinliyinə gətirib çıxarır baş dəftərxanada mülki işlər sahəsində Şərq dilləri mütərcimi təyin olunur. Ömrünün sonunadək (1878) bu vəzifədə çalışan Mirzə Fətəli Axundzadəyə ölümündən beş il əvvəl polkovnik rütbəsi verilir.

 

...132 il sonra isə

 

xalqımız onu ədəbiyyatımızın, dramaturgiyamızın generalı kimi qutlayır. Şöhrətli teatrlarımız, adlı-sanlı rejissorlarımız onun əsərlərini yeni-yeni quruluşlarda, müasir traktovkalarda tamaşaçılara təqdim edir. Ölkə başçısı onun 200 illik yubiley təntənəsi haqda 2 il öncədən sərəncam verir...

Deməli, bizim böyük ilk milli Mirzəmizə «ölümündən əvvəl», «ölümündən sonra» kimi təyin-tamamlıqlar uyğun gəlmir. Necə ki, onun bünövrəsini qoyduğu azad düşüncə tərzi bugünümüzün ən aktual ideoloji elementlərindəndir. Necə ki, onun da ciddi məqalələrlə çıxış etdiyi «Əkinçi» qəzeti bugünkü mətbuatımızın ulu soy-kökü kimi qiymətləndirilir.

Necə ki, bizim universitet (ADU-BDU) müəllimimiz, rəhmətlik Firudin Hüseynov bir gün auditoriyaya daxil olub, Mirzə Fətəli Axundzadə haqda mühazirəsinə belə başlamışdı: «Həyatda elə qanunsuzluqlar, cinayətlər, qüsurlar var ki, onların islahı, cəzalandırılması üçün hüquq-mühafizə orqanlarına, məhkəməyə müraciət etmək olmur. Məsələn, öz xəsisliyi ilə arvad-uşağına, qohum-əqrəbasına olmazın əziyyətlər verən Hacı Qaranı ancaq ancaq öz istedad sənətkarlıq «qılıncı» ilə Mirzə Fətəli Axundzadələr islah edə bilər. Yusif Sərraca, Hacı Qaraya, Molla İbrahim Xəlilə, Müsyö Jordan dərviş Məstəli şaha, Lənkəran xanının vəzirinə başqa «bədii insanlar»a əbədi ömür bəxş etmiş sənətkar heç vaxt ölə bilməz...»

 

 

Tahir Abbaslı

 

Mədəniyyət.- 2010.- 21 may.- S. 13.