“Sevgi fəsli”nin təqdimatı oldu

Mayın 19-da Milli Kitabxanada Mədəniyyət və Turizm Nazirliyinin maliyyə dəstəyilə nəşr olunan İslam ölkələri şairlərinin şeirlərindən ibarət “Sevgi fəsli” antologiyasının təqdimat mərasimi keçirildi. Tədbiri giriş sözü ilə açan kitabxananın direktoru Kərim Tahirov son illər İslam Konfransı Təşkilatına üzv olan ölkələr arasında müxtəlif sahələrdə, o cümlədən mədəniyyət sahəsində əməkdaşlığın genişləndiyni vurğuladı.

Tədbirdə çıxış edən Mədəniyyət və Turizm Nazirliyinin Nəşriyyat, reklamın təşkili və informasiya şöbəsinin müdiri Vaqif Bəhmənli “Bakı-İslam mədəniyyətinin paytaxtı - 2009” çərçivəsində bir sıra uğurlu tədbirlərin gerçəkləşdiyini, yeni nəşrin işıq üzü görməsini bu tədbirlərin davamı olduğunu bildirdi. V.Bəhmənli Azərbaycan dilində çap edilən antologiyanın digər dillərdə də nəşrinin zəruriliyini qeyd etdi. Onun sözlərinə görə, Azərbaycanda həyata keçirilən mədəniyyət siyasəti bu sahədə yeni-yeni uğurlu addımların atılmasına, dünya və ölkə əhəmiyyətli tədbirlərin keçirilməsinə imkan verir.

Nazirliyin Nəşriyyat sektorunun müdiri Çingiz Əlioğlu tərcümə sahəsində yeni kitab layihələrinin həyata keçirilməsi istiqamətində işlərin getdiyini, dünya poeziya nümunələrindən ibarət iki cildlik toplunun nəşr olunacağını söylədi.

Antologiyanın tərtibçisi və redaktoru Ağacəfər Həsənli yeni nəşrdə 16 İslam ölkəsindən olan şairlərin şeirlərinin toplandığını, gələcəkdə belə layihələrin davam etdiriləcəyini dedi. O, Rusiya Federasiyası ərazisində yaşayan türkdilli xalqların şair və yazıçılarının əsərlərindən ibarət kitabın çapının da gərəkli olduğunu bildirdi.

Tədbirdə tərcüməçilər kitabda dərc olunan şeirlərdən nümunələr oxudular.

Ceyhun

Mədəniyyət.- 2010.- 21 may.- S. 5.