Azərbaycan-Qazaxıstan mədəni əlaqələri inkişaf edir

Mayın 20-də mədəniyyət və turizm naziri Əbülfəs Qarayev Azərbaycanda səfərdə olan Qazaxıstanın Manqestau vilayətinin mərkəzi Aktau şəhərinin akimi (İcra Hakimiyyətinin başçısı) Krımbek Kuşarbayevin rəhbərlik etdiyi nümayəndə heyətini qəbul edib. Danışıqlarda iki ölkə arasında mədəniyyət və turizm sahəsində əlaqələr və gələcək münasibətlər müzakirə olunub. Qeyd edək ki, hər il Aktau şəhərində «Xəzər - dostluq dənizi» adlı mədəniyyət tədbiri keçirilir. K. Kuşarbayev avqustda keçirilməsi nəzərdə tutulan növbəti tədbirə nazir Ə.Qarayevi də dəvət etdi.

Söhbət əsnasında nazir qonağa konkret təkliflər də verdi. Azərbaycanın turizm potensialından danışan nazir bildirdi ki, Azərbaycanda turizm sahəsində yeganə təhsil müəssisəsi olan Turizm İnstitutu fəaliyyət göstərir. Yaxın gələcəkdə Azərbaycanla Manqestau vilayəti arasında tələbə mübadiləsinin həyata keçirilməsi bu vilayətlə ölkəmiz arasında turizm sahəsində qarşılıqlı əməkdaşlığın yaranmasına zəmin yaradar.

Nazir Azərbaycanda həyata keçirilən turizm layihələri, xüsusilə də Şahdağ yay-qış turizm kompleksi haqqında qonağa məlumat verdi. Ə.Qarayev bildirdi ki, gələcəkdə Manqestau vilayətində fəaliyyət göstərən turizm şirkətləri də bu layihələrdə iştirak edə bilərlər. Bütün bunlar isə ölkələrimiz arasında mədəniyyət və turizm sahəsində əməkdaşlığın hərtərəfli inkişafına gətirib çıxarar.

Mədəniyyət.- 2010.- 21 may.- S. 2.