Xalq artisti Yaqub Məmmədovun 80 illik yubileyi qeyd olunub

 

Ağcabədi şəhərindəki Qarabağ Muğam Mərkəzində Azərbaycan xanəndəlik sənətinin görkəmli nümayəndəsi, Xalq artisti Yaqub Məmmədovun 80 illik yubileyi qeyd olunub.

 

Tədbirdə Milli Məclisin deputatı Tahir Rzayev, Xalq artisti Qəndab Quliyeva, müğənni Süleyman Abdullayev, rayon icra hakimiyyəti başçısının müavini Əbülfət Tapdıqov və başqaları çıxış edərək Y.Məmmədovun həyat və yaradıcılığından, muğamımızın inkişafı naminə gördüyü işlərdən danışıblar. Qarabağ muğam ifaçıları məktəbinin parlaq nümayəndələrindən olan Y.Məmmədov 1930-cu ildə Ağcabədi rayonunun Xəlfərəddin kəndində anadan olub. Ağcabədidə ustad xanəndə Mütəllim Mütəllimovdan bir neçə muğam və xalq mahnıları öyrənib, A.Zeynallı adına musiqi məktəbində məşhur xanəndə Seyid Şuşinskidən dərs alıb, müxtəlif illərdə Azərbaycan Dövlət Filarmoniyasında, Dövlət Konsert Birliyində çalışıb.

Azərbaycan ifaçılıq sənətinin görkəmli simalarından olan Yaqub Məmmədov sələflərinin yolunu layiqincə davam etdirib. Yüksək mədəniyyətə, təbii fitri istedada, ifaçılıq qabiliyyətinə malik olan Y.Məmmədov bütün muğam dəstgahlarının, habelə klassik Azərbaycan poeziyasının mahir bilicisi idi. Klassik muğam ifaçılığı çərçivəsindən kənara çıxmayan xanəndə məlahətli səsi ilə muğama yeni xallar, zəngulələr gətirib. Tədbirdə tanınmış muğam ifaçılarının çıxışları olub.

 

 

Mədəniyyət.- 2010.- 21 may.- S. 3.