Görkəmli rəssam Rüstəm Mustafayevin qəbirüstü abidəsi açılıb

Bu il görkəmli rəssam, Azərbaycanda realist teatr-dekorasiya sənətinin yaradıcılarından biri Rüstəm Mustafayevin anadan olmasının 100 illiyidir. Yubiley tədbirləri çərçivəsində mayın 19-da rəssamın Fəxri xiyabandakı məzarı üstündə büstünün açılışı olub.

Azərbaycan mədəniyyətinin tanınmış nümayəndələrinin iştirak etdikləri mərasimdə çıxış edən mədəniyyət və turizm naziri Əbülfəs Qarayev Rüstəm Mustafayevin mədəni irsindən, cəmi 30 il yaşamış sənətkarın qısa ömründə rəssamlıq sənətimizin inkişafı üçün böyük işlər gördüyündən danışıb.

Rəssamlar İttifaqının sədri, Xalq rəssamı Fərhad Xəlilov R.Mustafayevin dərin biliyə malik, incə zövqlü, orijinal düşüncəli bir sənətkar olduğunu qeyd edib, fitri istedadlı rəssamın çoxşaxəli yaradıcılığından söz açıb. Xalq rəssamı Nazim Bəykişiyev R.Mustafayevin Milli Dram Teatrının baş rəssamı olduğu illərdə bir çox tamaşalara bədii tərtibat verməsindən, Azərbaycan teatrında orijinal səhnələrin qurulmasının onun adı ilə bağlı olmasından danışıb.

Sonra mərhum sənətkarın məzarı üstünə gül dəstələri düzülüb, ruhuna dualar oxunub.

Mədəniyyət.- 2010.- 21 may.- S. 3.