Böyük türkmən şairi Bakıda yad edilib

Ötən həftəsonu Bakıda qardaş türkmən xalqının böyük şairi, filosof Məhdimqulu Fəraqi ilə bağlı bir sıra tədbirlər keçirilib. M.F.Axundov adına Milli Kitabxanada təşkil edilmiş toplantıda direktor Kərim Tahirov türkmən ədəbiyyatının klassiki olan Məhdimqulunun (1733-1793) yaradıcılığından, xalqlarımız arasındakı yaxınlıqdan ətraflı bəhs etdi. Qeyd olundu ki, türkmən şairin yaradıcılığına Qasım bəy Zakir, Molla Pənah Vaqifin poeziyasının təsiri olub. Məhdimqulu Azərbaycanda da sevilə-sevilə oxunan şairlərdəndir. Şairin 5 kitabı ölkəmizdə 25 min tirajla (“Dünya ədəbiyyatı klassikləri” silsiləsindən) çap olunub.

Milli Kitabxananın fondunda Məhdimqulunun Azərbaycan və rus dillərində nəşr olunmuş kitablarından ibarət sərgi qonaqların marağına səbəb olub. Türkmənistanın Azərbaycandakı fövqəladə və səlahiyyətli səfiri cənab Annaməmməd Məmmədov çıxış edərək səmimi qarşılanma üçün ölkəsindən gələn nümayəndə heyəti adından minnətdarlığını bildirdi. Xalqlarımız, ölkələrimiz arasındakı əlaqələrin tarixindən, mənəvi köklərimizin eyniliyindən geniş danışan diplomat ədəbiyyatımızın da bir-birinə yaxın olduğunu açıqladı. O, Azərbaycan Milli Kitabxanası ilə bundan sonra da bir çox müştərək layihələr həyata keçiriləcəyini dedi.

Türkmənistan Elmlər Akademiyasının Məhdimqulu adına Dil və Ədəbiyyat İnstitutunun şöbə müdiri Çarı Quliyev, Türkmənistan EA-nın Milli Əlyazmalar İnstitutunun baş mütəxəssisi Atamurad Saparmuradov şairin yaradıcılığından ətraflı bəhs edərək bildirdilər ki, o, Sədi, Əlişir Nəvai, Füzuli, Nəsimi əsərlərindən bəhrələnib.

Türkmənistandan gələn qonaqlar bir sıra görüşlər keçirdikdən sonra Məhdimquluya həsr olunmuş tədbir hər iki ölkənin incəsənət ustalarının iştirakı ilə R.Behbudov adına Mahnı Teatrında davam etdirildi.

İradə Əsədova

Mədəniyyət.- 2010.- 26 may.- S. 12.