Şərqşünas alimin kitabları Milli Kitabxanaya təqdim edilib

Görkəmli şərqşünas alim, tarix elmləri doktoru, professor, Rusiya EA-nın Şərqşünaslıq İnstitutunun baş elmi işçisi, Moskvada fəaliyyət göstərən «Ocaq» Azərbaycan Mədəniyyəti Cəmiyyətinin sədr müavini Saleh Əliyevin Azərbaycan Milli Kitabxanasına vəsiyyət etdiyi kitabların təqdimat mərasimi keçirilib. Tədbirdə Milli Kitabxananın direktoru Kərim Tahirov, Əməkdar elm xadimi Süleyman Məmmədov çıxış edərək, Saleh Əliyevin həyat və yaradıcılığı barədə danışıblar.

Qeyd edək ki, S.Əliyev iranşünas alim kimi də dünya miqyasında tanınıb. «XlX əsrin ikinci yarasında Azərbaycan, Türkiyə, İraq maarifçilərinin ictimai-siyasi əlaqələrində İstanbulun rolu», «1978-1979-cu illərdə İran inqilabı, səbəblər və nəticələr», «Müasir İran tarixi», «XX əsrdə İranın siyasi və ictimai inkişafı və neft» monoqrafiyaları alimin ən sanballı əsərlərindən sayılır. Elmi əsərləri dünyanın bir çox dillərinə tərcümə edilib.

Gülər

Mədəniyyət.- 2010.- 5 noyabr.- S. 3.