Dahi bəstəkara həsr olunmuş “Ölməzlik” kitabının təqdimatı oldu

 

   Sentyabrın 30-da Azərbaycan Bəstəkarlar İttifaqında AMEA-nın müxbir üzvü, sənətşünaslıq doktoru, professor Zemfira Səfərovanın “Ölməzlik“ kitabının təqdimat mərasimi oldu.

  

   Tədbiri giriş sözü ilə Azərbaycan Bəstəkarlar İttifaqının sədri, professor Firəngiz Əlizadə açdı. O, təqdimatı keçirilən “Ölməzlik” kitabının müəllifinin zəngin yaradıcılığından danışaraq, Zemfira Səfərovanın Orta əsrlər Azərbaycan musiqisinə dair apardığı araşdırmaları yüksək qiymətləndirdi.

   Sonra söz akademik Bəkir Nəbiyevə verildi. O, Z.Səfərovanın yaradıcılığından maraqlı məqamları diqqətə çatdırdı: “1973-cü ildə Zemfira Səfərova Moskvada Üzeyir Hacıbəylinin yaradıcılığı ilə bağlı bir monoqrafiya dərc etdirmişdi. Həmin monoqrafiya görkəmli bəstəkarımız Qara Qarayevin diqqətini çəkmiş, böyük bəstəkar Zemfira Səfərovanın bu xidmətlərini yüksək dəyərləndirmişdi. Müəllif bu kitabında Üzeyir Hacıbəylinin pedaqoq, publisist, dramaturq kimi yaradıcılığına işıq tutub”.

   Mədəniyyət və turizm naziri Əbülfəs Qarayev çıxış edərək Üzeyir Hacıbəylinin 125 illiyi münasibətilə nəinki respublikamızda, bir sıra xarici ölkələrdə də tədbirlər keçirildiyini diqqətə çatdırdı. Nazirin sözlərinə görə, Üzeyir Hacıbəylinin yaradıcılığına həsr olunmuş “Ölməzlik” kitabı dahi bəstəkarın irsinə diqqətinin tükənməz olduğunu göstərir: “Kitab üç dildə yazılıb. Yəni kitab gələcəkdə tək azərbaycanlılar üçün deyil, digər xalqlar üçün də bir mənbə olacaq”.

   Xalq yazıçısı Çingiz Abdullayev də Zemfira Səfərovanın “Ölməzlik“ kitabının üç dildə yazılıb nəşr olunmasını önəmli fakt kimi vurğuladı: “Bu kitabı bizdən başqa rus və ingilis dillərini bilən digər xalqlar da oxuyacaq. Üzeyir Hacıbəylinin yaradıcılığı və dünya musiqi mədəniyyətinə verdiyi töhfələrlə yaxından tanış olacaqlar”.

   Daha sonra Qədim Musiqi Alətləri Ansamblının bədii rəhbəri Məcnun Kərimov, musiqişünas professor Aidə Tağızadə, Xalq artisti Fidan Qasımova çıxış etdilər.

   Tədbirin sonunda kitabın müəllifi Zemfira Səfərova çıxış edərək kitabın ərsəyə gəlməsində Bakı Musiqi Akademiyasının rektoru, Xalq artisti Fərhad Bədəlbəyliyə minnətdarlığını bildirdi.

  

 

   Savalan Fərəcov

 

  Mədəniyyət.- 2010.- 1 oktyabr.- S. 3.