Tanınmış kaman ustasının yubileyi qeyd olunub

Beynəlxalq Muğam Mərkəzində tanınmış kaman ustası, Milli Konservatoriyanın professoru, Xalq artisti Fəxrəddin Dadaşovun 60 illiyi qeyd edilib.

Məkəzin foyesində Fəxrəddin Dadaşovun 44 illik sənət yolunu əks etdirən fotosərgi nümayiş etdirilib. Tədbirin əvvəlində göstərilən videogörüntüdə kaman ustasının vaxtilə müşayiət etdiyi muğam ustaları - xalq artistləri Yaqub Məmmədov, Əbülfət Əliyev, Alim Qasımovun ifaları, xalq artistləri Arif Məlikov, Habil Əliyev, Firəngiz Əlizadənin yubilyar haqqında ürək sözləri səsləndirilib.

Tədbirdə Baş nazirin müavini Elçin Əfəndiyevin, mədəniyyət və turizm naziri Əbülfəs Qarayevin, Azərbaycanın Rusiya Federasiyasındakı səfiri Polad Bülbüloğlunun Fəxrəddin Dadaşova ünvanladıqları təbrik teleqramları oxunub.

Milli Konservatoriyanın rektoru bəstəkar Səyavuş Kərimi, Xalq artisti, bəstəkar Tofiq Bakıxanov, teatrşünas İlham Rəhimli və başqaları F.Dadaşovun fəaliyyətə başladığı Əhməd Bakıxanov adına Azərbaycan Dövlət xalq çalğı alətləri ansamblı ilə birgə getdiyi qastrol səfərlərində Azərbaycan muğamını dünyaya tanıtdığını vurğulayıb, indi də bu sənətin incəliklərini səbirlə tələbələrinə öyrətdiyini bildiriblər.

Qeyd edilib ki, F.Dadaşovun əməyi yüksək qiymətləndirilmiş, O, Prezident İlham Əliyevin sərəncamı ilə “Xalq artisti” fəxri adına və Prezidentin fərdi təqaüdünə layiq görülmüşdür.

Tədbirdə xalq artistləri Aygün Bayramova, Mələkxanım Əyyubova, Nəzakət Teymurova, Əməkdar artist Firuz Səxavət və başqaları çıxış ediblər.

Sonda F.Dadaşov tədbirin təşkilatçılarına və iştirakçılarına minnətdarlığını bildirib, kamanda bir sıra musiqi nömrələri səsləndirib.

Mədəniyyət.- 2010.-6 oktyabr.- S. 6.