Rumıniyada Azərbaycandan bəhs edən kitabların təqdimatı keçirilib

Oktyabrın 20-də Buxarestdəki Zabitlər Sarayının Mədəniyyət Mərkəzində “Polemos” kitab sərgisi açılıb.

Sərgi çərçivəsində Buxarest Yazıçılar Assosiasiyasının sədri Horia Qırbyanın Rumıniyanın “Top Form” nəşriyyatında çapdan çıxmış “Azərbaycan - canlı alov”, Heydər Əliyev Fondunun Rumıniya Nümayəndəliyinin direktoru İqbal Hacıyevin “Azərbaycan Respublikasının Mərkəzi Asiya dövlətləri ilə əlaqələri” və ölkəmizin Rumıniyadakı səfirliyinin mədəniyyət attaşesi Fəxri Kərimlinin “Azərbaycan Respublikası və Rumıniya arasındakı münasibətlər (1993-2004)” kitablarının təqdimat mərasimi keçirilib.

Mərasimdə çıxış edən “Top Form” nəşriyyatının direktoru, nüfuzlu “Geopolitika” toplusunun redaktoru Vasile Similyanu təqdimatı keçirilən kitabların əhəmiyyətindən danışıb, rəhbərlik etdiyi qurumlarla Azərbaycan arasında əməkdaşlığın bundan sonra da uğurla davam edəcəyinə inamını ifadə edib.

Rumıniyanın Azərbaycandakı ilk səfiri, Babeş-Bolyai Universitetinin Türkologiya və Mərkəzi Asiya Araşdırmalar İnstitutunun direktoru, professor Tasin Cəmil azərbaycanlı kitab müəlliflərinin elmi rəhbəri olduğunu vurğulayaraq, təqdim edilən nəşrlərin rumın dilində Azərbaycan və Orta Asiya haqqında yazılmış fundamental əsərlər olduğunu diqqətə çatdırıb.

Kitabların müəllifləri Azərbaycanın tarixi, mədəniyyəti, ədəbiyyat və iqtisadiyyatı, habelə Rumıniya-Azərbaycan əlaqələrinin keçdiyi yol haqqında ətraflı məlumat veriblər.

Sərgi oktyabrın 23-də yekunlaşacaq.

Mədəniyyət.- 2010.- 22 oktyabr.- S. 2.