Səs Yazıları Arxivinə 4000-dən artıq val təqdim edilib

Məhv olmaq təhlükəsi ilə üzləşmiş 4000-dən artıq qiymətli val Dövlət Səs Yazıları Arxivinə təqdim edilib.

Ötən əsrin ortalarında Azərbaycana aid bütün qrammafon valları Ümumittifaq Melodiya Səsyazma Şirkətinin Bakıda yaradılan anbarında cəmləşərək aidiyyəti ünvanlara paylanırdı. Bu anbar uzun müddət fəaliyyətini dayandırdığından on minlərlə xüsusi qiymətli qrammafon valları binanın zirzəmisində məhv olmaq təhlükəsi qarşısında qalmışdı. Bu yaxınlarda əməkdaşların təşəbbüsü ilə həmin valların bir qismi - 4000-dən çoxu seçilərək arxivə gətirilib.

Azərbaycan musiqi mədəniyyətinə sanballı töhfə olan həmin qrammafon vallarının arasında Cabbar Qaryağdıoğlu, Keçəçioğlu Məhəmməd, Məşədi Məmməd Fərzəliyevin ifasında 1905-1912-ci illərdə yazılmış muğam, təsnif və xalq mahnıları, aşıq və saz havaları, Üzeyir bəy Hacıbəyli, Qara Qarayev, Cövdət Hacıyev, Arif Məlikov, Fikrət Əmirov, Niyazi, Fikrət Əmirov və başqalarının əsərləri yazılmış vallar var.

Mədəniyyət.- 2010.- 27 oktyabr.- S. 11.