Azərbaycan-Belarus turizm əlaqələri genişlənir

İki ölkə biznesmenləri mehmanxana təsərrüfatı və ovçuluq turizminin inkişaf etdirilməsinə dair razılığa gəlib

Bugünlərdə Belarusun idman və turizm nazirinin müavini Çeslav Şulqa və “AtaHoldinq” şirkəti idarə heyəti sədrinin müavini Anar Mehdiyev arasında görüş olub. Görüş Belarusun Azərbaycandakı səfirliyinin təşəbbüsü ilə keçirilib.

BELTA agentliyinin verdiyi məlumata görə, görüşdə Belarus İdman və Turizm Nazirliyinin turizm departamentinin nümayəndələri, Azərbaycanın “AtaHoldinq” şirkətinin marketinq departamentinin rəhbərləri, Belarusun Azərbaycan İcmaları Konqresi Beynəlxalq İctimai Birliyinin sədri, dördqat dünya çempionu, həmin ölkənin sambo və cüdo üzrə yığma komandalarında çıxışları ilə tanınan Natiq Bağırov da iştirak ediblər.

Çeslav Şulqa Belarus və Azərbaycanın biznes strukturları arasında münasibətlərin yüksək səviyyədə inkişaf etdiyini vurğulayıb. O, işgüzar dairələrin qarşılıqlı iqtisadi əlaqələri genişləndirə biləcəyi sahələrdən söz açaraq, turizm sahəsində əməkdaşlığı inkişaf etdirmək üçün böyük imkanların olduğunu görüş iştirakçılarının nəzərinə çatdırıb.

Ç.Şulqa qeyd edib ki, Belarus tərəfi ölkəsinin mehmanxana biznesinə xarici sərmayənin cəlb olunmasında maraqlıdır. O birgə proqramların həyata keçirilməsi istiqamətində Azərbaycan biznesmenləri və Belarus dövlətinin hakimiyyət strukturları nümayəndələri və işgüzar adamları arasında əlaqələrin yaradılmasına hər cür kömək göstəriləcəyini vəd edib.

Azərbaycan nümayəndə heyətinin üzvləri Belarusda mehmanxana təsərrüfatının və ovçuluq turizminin inkişaf etdirilməsinə dair birgə investisiya layihələrinə böyük maraq göstərdiklərini, habelə Belarus İdman və Turizm Nazirliyi rəhbərliyinin təkliflərini nəzərdən keçirməyə və əməkdaşlığın istiqamətlərini dəqiqləşdirməyə hazır olduqlarını bildiriblər. Tədbir iştirakçıları Azərbaycan biznesmenlərinin konkret təkliflərini müzakirə etmək məqsədilə bir daha görüşmək barədə razılığa gəliblər.

FƏXRİYYƏ

Mədəniyyət.- 2010.- 20 yanvar.- S. 7.