Dünyada bütün maneələr insan istəyinin qarşısında heç nədir...”

 

   Etiraf edim ki, gənc müğənni Murad Sadıxla görüşüb yazı hazırlamaq tapşırığı alanda onun barəsində elə də geniş məlumatım yox idi. Amma ifasını eşitmişdim. Mobil telefonuna zəng edib onu redaksiyamıza dəvət etdim. Məmnuniyyətlə razılaşdı. Redaksiyamızın Dövlət Film Fondunun 5-ci mərtəbəsində yerləşdiyini deyəndə tərəddüdlü səslə «Liftiniz varmı» deyə soruşdu. Mən də sualın fərqinə varmadan “var” deyə cavab verdim.

  

   Vaxt barədə razılaşdıqdan sonra internetdə müsahibim haqqında məlumat toplamağa başladım və ... Muradın fiziki durumunun 5-ci mərtəbəyə çıxmağa imkan vermədiyini biləndə isə bayaqkı tərəddüdlü sualın mənasını anladım. Zəng edib görüşün yerini dəyişmək istədim, amma gec idi. Dedi ki, artıq yoldadır. Beləliklə, 20 yaşında “Qafqazın Stiv Uanderi” adlandırılan bu istedadlı gənclə söhbətimiz qəzetimizin redaksiyasında, özü də valideynlərinin iştirakı ilə baş tutdu.

  

   “Hər şey üçün Məryəm Babayevaya minnətdaram”

  

   «Hələ 7-8 yaşım olanda mən daxilimdən oxumağa, musiqiyə bir istək, tələbat olduğunu hiss edirdim. Həmişə oxumaq istəyirdim. Amma sağlamlığımla bağlı komplekslərim vardı. Düşünürdüm ki, görəsən, səhnəyə çıxsam məni necə qəbul edərlər, mahnılarımı, ifamı sevəcəklərmi və s. Çünki o zamana qədər Azərbaycan şou-biznesində mənim kimi fiziki qüsuru olan insanların olduğunu bilmirdim. Sonralar isə özümdə güc tapdım, fikirləşdim ki, əgər məndə istedad varsa, bunu mütləq göstərməliyəm, oxumalıyam. Bir çox müəllimlərə müraciət etdim. Nəhayət, müəllimimi tapdım”.

   Murad Sadıx sənətə gəlişində ona dəstək olan insanların sırasında hər zaman birinci olaraq sevimli müəlliməsinin - Azərbaycan Milli Konservatoriyasının dosenti, Əməkdar müəllim, sənətşünaslıq üzrə fəlsəfə doktoru Məryəm Babayevanın adını qeyd edir. Deyir ki, Məryəm xanıma müraciət etməyi ona Mədəniyyət və Turizm Nazirliyində tövsiyə etdilər: “Biz müəlliməmlə çox gözəl anlaşırıq. Mən etiraf etmək istəyirəm ki, Məryəm xanımın həm bir pedaqoq, həm də insan kimi əvəzi yoxdur. Mən əvvəllər də oxuyurdum. Amma indi hiss edirəm ki, ifamda bir peşəkarlıq var. Üstəlik, səsimi istədiyim kimi idarə edə bilirəm. Bunlara isə Məryəm xanımın sayəsində nail ola bilmişəm. Hər yerdə çəkinmədən fəxrlə Məryəm Babayevanın tələbəsi olduğumu deyirəm. Çünki məhz onun yanına getdikdən sonra mən istədiyimə nail olmağa başladım. Uşaq Filarmoniyasında dərs deyən Məryəm Babayeva mənimlə fərdi qaydada məşğul olur. Bu şəraiti yaratdığına görə Uşaq Filarmoniyasının rəhbəri Fərəh Şəkinskayaya da təşəkkür edirəm”.

   Ümumilikdə isə incəsənətə maraq Murada ailəsindən gəlib. Atası rəssam, anası isə musiqi müəlliməsidir. Odur ki, sənətə gəlməsində valideynlərinin əməyini və dəstəyini də xüsusi qiymətləndirir. Deyir ki, əgər valideynləri olmasaydı, nəinki sənətə gəlməzdi, hətta yaşamaq onun üçün çox çətin olardı: «Atamla anam hər zaman mənim yanımdadırlar. Həyatımın hər anında mən onlardan dəstək görürəm. Bu sənətdə ikinci dəstəyi sevimli sənətkarımız, rəhmətlik Reyhan Müslümovadan almışam. O həmişə mənə deyirdi ki, Murad, sən qorxma, istedadını göstər, bu səs ki, səndə var, çox böyük uğurlara imza atacaqsan. Sənətdə daha bir dəstəyi bəstəkar Vaqif Gərayzadədən almışam».

  

   Rusiya musiqisevərlərini heyrətə salan ifa

  

   Murad Rusiyanın musiqi aləmində tanınır və sevilir. Bir müddət əvvəl Rusiyanın ORT kanalında (Andrey MalaxovunQoy desinlər” (“Pust qovoryat”) verilişinin qonağı olan həmyerlimizin ifası tamaşaçıları heyrətə salıb. Hətta zaldakı dinləyicilər arasında göz yaşlarını saxlaya bilməyənlər də olub: «Həmin verilişdən sonra məndə sənətimə, özümə inamım daha da artdı. Bu müddət ərzində bir həqiqəti özüm üçün kəşf etdim: bu dünyada bütün maneələr insan istəyinin qarşısında yox olur”.

   Ona daha çox uğur gətirən hadisələrdən biri də ötən ilin oktyabrında Moskvada keçirilən “ qamış - tolerantlıq, bərabərlik və inteqrasiya» festivalındakı çıxışı olub. Murad bu festivalda Heydər Əliyev Fondunun dəstəyi ilə iştirak edib: “Bu festivalda çıxışım mənim tanınmağımda müstəsna rol oynadı. Festival Rusiya Federasiyasının birinci xanımı Svetlana Medvedyevanın və tanınmış opera müğənnisi Qalina Vişnevskayanın dəstəyi ilə ötən ilin oktyabrında keçirildi. Yarışma görmə qabiliyyəti məhdud olan insanlara dəstək məqsədilə təsis edilən “Beynəlxalq qamış günü”nə (15 oktyabr) həsr olunmuşdu”.

   Bu yarışmanın ən yaddaqalan məqamı isə festivaldan sonra Heydər Əliyev Fondunun Rusiya filialının rəhbəri Leyla Əliyevanın Murada böyük bir gül dəstəsi göndərməsi olub: «Festivalda Heydər Əliyev Fondunun dəstəyi ilə iştirak edirdim. Ən böyük hədiyyəm isə Leyla xanımın sənətimə verdiyi qiymət oldu. Ona görə də həm Mehriban Əliyevaya, həm də Leyla Əliyevaya təşəkkür edirəm».

   Ötən ilin dekabrında Sankt-Peterburq şəhərində keçirilən «Zvezda nadejdı» festivalında iştirakı da Muradın həyatında yaddaqalan hadisələrdən biridir: ”Festivalın sonunda mənə Sankt-Peterburq şəhərinin meri Valentina Matviyenkonun imzası ilə diplom təqdim edildi”.

  

   Muradın İlahidən bir payı var

  

   Atası Sadıx Sadıxov deyir ki, Murad hələ uşaq vaxtlarında qonşuları toplayıb onlara konsert verirmiş. Bu isə onun valideynlərini çox sevindirirdi: «Biz həmişə deyirdik ki, Allah ona heç olmasa yaxşı səs versin. Bununla həyata bağlansın. Çünki Murad həm görməsində, həm yeriməsində problem olduğu üçün məktəbə getmirdi. Amma riyazi hesablama danışıq qabiliyyəti çox yaxşıdır. Səhhəti ilə əlaqədar dəfələrlə Rusiyada digər MDB ölkələrində olmuşuq. 4 dəfə gözündən, 3 dəfə isə ayağından əməliyyat olunub. Murad həmişə deyirdi ki, indi siz məni xəstəxanalara aparırsınız, amma vaxt gələcək mən sizi yaxşı yerlərə, gəzməyə aparacağam. Doğrudan da həmin vaxt gəlib çatıb. İndi biz onun çıxışlarını dinləmək dəstək olmaq üçün Muradla müxtəlif ölkələrdə oluruq. Şükür edirik ki, Murad kimi oğlumuz var. O qədər böyüsə , yenə mənim üçün balaca uşaq kimidir. Hər zaman onun qulluğunda durmağa, istəyini yerinə yetirməyə hazıram».

   «Murad həmişə özündən yaşca çox böyüklərlə dostluq edib. Bəzən olur ki, deyir, ana, dostum bizə qonaq gələcək. Fikirləşirəm ki, yəqin özü yaşda kimsə gələcək. Baxıram ki, özündən xeyli yaşlı bir insandır gələn». Bunu isə Muradın anası Rəna xanım deyir. Onun sözlərinə görə, Murad körpəliyindən musiqi vurğunu olub: «Evdə işim çox olanda onun beşiyini tərpədə bilmirdim ki, ağlamasın. Bu zaman maqnitofon köməyimə gəlirdi. Murad musiqi sədası altında yuxuya gedirdi. Beşiyə yaxınlaşanda onun artıq yatdığını görürdüm».

   Muradın stilisti Rəna xanım özüdür. Deyir, oğlunun geyimini başqasına etibar edə bilməz: «Hətta evdə məşq edən zaman da ona kömək etməyə çalışıram. Axı mən özüm musiqi müəlliməsiyəm. Hamı deyirdi ki, Muradın çox gözəl səs tembri var. Amma üzərində işləmək lazımdır. Mən ona elə bir müəllim tapmaq istəyirdim ki, Muraddakı istedadı üzə çıxara bilsin. Sağ olsun Məryəm Babayeva. O, Muradın səsini elə bir səviyyəyə gətirib çıxarıb ki, bu gün Muradın yüksək peşəkarlıqla oxuduğunu deyirlər. Bu isə Məryəm müəllimənin zəhmətidir».

   Rəna xanım Muradın İlahidən bir payı olduğunu deyir bizə maraqlı faktlar açıqlayır: «Onun 4-5 yaşı olanda bizi İrana qonaq çağırmışdılar. Murad 2 günün içərisində namazın sözlərini ərəbcə əzbər dedi həmin gündən namaz qılmağa başladı».

   Sanki gizli bir qüvvə Muradı daima qoruyur. Rəna xanım deyir ki, dəfələrlə olub ki, onun hər hansı bir əməliyyatını müxtəlif səbəblərdən həyata keçirmək mümkün olmayıb. Sonradan isə məlum olub ki, həmin əməliyyat Muradın həyatına son qoya bilərmiş.

  

   Murad bütün Azərbaycanındır

   

   Murad söhbət əsnasında sənət planlarından da danışdı: “Yeni mahnılar üzərində işləyirəm, çalışıram ki, daha çox bəstəkar mahnılarına müraciət edim. Musiqisi Arif Səlimova, sözləri Vüsal Nuruya aid “Sevməsəm ölərəmadlı mahnı da mənə uğur gətirdi. Mərhum sənətkarımız Reyhan Müslümovanın mahnılarına çox müraciət edirəm. Onun «Sən yanımda olmayanda» «Məhəbbət» mahnılarını yeni aranjemanda ifa edirəm. Bu yaxınlarda isə Sədaqət Arifqızı mənim xahişimlə «Yaşadır məni» adlı mahnı yazıb».

   Murad korifey sənətkarlarımızdan Rəşid Behbudovu Müslüm Maqomayevi dinləməyi sevir. Deyir, sentyabr-oktyabr aylarında R.Behbudovun repertuarından «Küçələrə su səpmişəm» «Bahar sənsiz» mahnısını ifa edəcək.

  

   * * *

 

   Bu gün Murad sənətdə ard-arda uğurlar qazanır. vaxtsa fiziki sağlamlığını da tam bərpa edəcəyinə ümidini itirmir. Onun müalicəsinə böyük məbləğdə vəsait tələb olunur. Ailənin bu vəsaiti toplamaq imkanı yoxdur. Yardım üçün indiyə qədər heç kəsə müraciət etməyiblər. Amma indi Murad təkcə Sadıxovlar ailəsinin övladı deyil. İndi Murad Azərbaycanın adını yüksəldən, onu xarici ölkələrdə təmsil edən bir sənətkardır. Deməli, Murad həm bütün Azərbaycanındır.

   Tanrı köməyi olsun!

  

 

   Fəxriyyə Abdullayeva

 

   Mədəniyyət.- 2011.- 17 avqust.- S. 11.