Berlindəki Azərbaycan Evinin beş yaşı tamam oldu

Noyabrın 27-də Berlində fəaliyyət göstərən Azərbaycan Evi beşillik yubileyini qeyd edib. Azərbaycan Evinin sədri Tofiq Qarayev qonaqları salamladıqdan sonra, gecəni idarə edən yazıçı Əmir Pəhləvan cəmiyyətin fəaliyyəti haqqında qonaqlara məlumat verib, Azərbaycan Evinin bir sıra mədəniyyət tədbirləri təşkil etdiyini nəzərə çatdırıb.

Ölkəmizin Almaniyadakı səfiri Pərviz Şahbazov tədbirdə çıxış edərək Azərbaycan Evinin əməkdaşlarını yubiley münasibətilə təbrik edib, qurumun gələcək fəaliyyətində uğurlar arzulayıb.

Azərbaycan Evinin yubileyi münasibətilə Berlin-Bakı Qalereyasının rəhbəri İbrahim Əhrari də Azərbaycan Evinə uğurlar arzulayıb və hədiyyə olaraq öz rəsm əsərini təqdim edib.

Tədbirdə Ü.Hacıbəyli adına Bakı Musiqi Akademiyasının rektoru Fərhad Bədəlbəyli, Milli Məclisin üzvü, müstəqil siyasi analitik Rasim Musabəyov, “Dağlıq Qarabağ Bölgəsinin Azərbaycanlı İcması” İctimai Birliyinin İdarə Heyətinin üzvü, millət vəkili Rövşən Rzayev, millət vəkili Rauf Əliyev, Diasporla İş üzrə Dövlət Komitəsinin, Azərbaycan səfirliyinin digər əməkdaşları, çoxlu sayda alman və azərbaycanlı qonaqlar iştirak ediblər.

Gecənin musiqi hissəsində Moldovadan gəlmiş sənətkar Konstantin Moskoviç ney alətində Azərbaycan xalq musiqisindən parçalar və Azərbaycandan gəlmiş sənətkarlar Azərbaycan və Avropa musiqisini ifa edərək, qonaqlara xüsusi musiqi çələngi ilə zövq veriblər.

Mehparə

Mədəniyyət.- 2011- 2 dekabr.- S. 7.