Bakıda məşhur bəstəkar Ferens Listin 200 illik yubileyi qeyd olundu

Yanvarın 31-i Bakı Musiqi Akademiyasında məşhur macar bəstəkarı Ferens Listin 200 illiyinə həsr olunmuş konsert gerçəkləşdi.

Bakı şəhər Musiqi Məktəbləri Direktorları İttifaqının sədri Rafiq Əzizovun təşəbbüsü ilə həyata keçirilən bu konsertdə Bakı şəhərindən olan müxtəlif musiqi məktəblərinin ən layiqli tələbələri çıxış etdilər.

Rafiq Əzizov bildirdi ki, 2011-ci il məşhur macar bəstəkarının xatirəsinə “Ferens List ili” elan olunub. Dünya musiqi aləmində ilk olaraq bu tarixi qeyd edənlərdən biri də Bakı Musiqi Akademiyasıdır: “Biz Bakı şəhərindəki musiqi məktəblərinin tələbələrini dinləyərək ən layiqlilərini seçmişik. Qeyd edim ki, Ferens List kimi məşhur bəstəkarın əsərlərini yalnız yüksək məharətə malik, kifayət qədər peşəkar pianoçular ifa edə bilərlər. Bizim məktəblər artıq o dərəcədə inkişaf ediblər ki, bu cür konserti keçirmək mümkündür”.

Tədbirdə Macarıstanın Azərbaycandakı fövqəladə və səlahiyyətli səfiri cənab Jolt Çutora iştirak edirdi. O, F. Listin həyatı haqda danışaraq onun əsl dahi olduğunu dedi: “Ferens List müxtəlif forma və janrlı musiqi inciləri yaradıb. Lakin bu cür dahilik qarşısında o özündən həmişə narazı idi. İntellektual insan olmaqla yanaşı o əsl beynəlmiləl sənətkar idi. Məncə, onun əsərləri bir məktəbdir, onlardan musiqi sənətinin incəliklərini öyrənməklə bərabər əsl təcrübə keçmək mümkündür.”

Reyhan

Mədəniyyət.- 2011.- 2 fevral.- S. 7.