Milli Kitabxanada Türkmənistan
səfirliyinin hədiyyə etdiyi kitablar təqdim olundu
İyulun
7-də Milli Kitabxanada Türkmənistanın ölkəmizdəki
səfirliyi tərəfindən hədiyyə olunan
kitabların təqdimat mərasimi keçirildi.
Kitabxananın direktoru Kərim Tahirov
bildirdi ki, təqdim olunan kitablar mədəniyyət, incəsənət,
tarix, coğrafiya və digər sahələri əhatə
edir. Kitabxanaya Türkmənistan səfirliyi tərəfindən
40-dan artıq kitab hədiyyə olunub. Bu kitablar Azərbaycan
oxucuları üçün Türkmənistanı
tanımaqda, qonşu və dost ölkənin mədəniyyətini,
adət və ənənəsini, müasir dövrdə
inkişafı ilə tanış olmaqda mühüm vasitə
olacaq.
Direktor onu da bildirdi ki, Mədəniyyət
və Turizm Nazirliyinin göstərişi ilə Azərbaycan
incəsənətinə aid kitablar Türkmənistanın
Milli Kitabxanasına veriləcək.
Mədəniyyət və Turizm
Nazirliyi Mədəniyyət siyasəti şöbəsinin
Kitabxana sektorunun müdiri Lətifə Məmmədova Milli
Kitabxananın digər kitabxanalarla son vaxtlar sıx əməkdaşlıq
etdiyini diqqətə çatdırdı: «Milli Kitabxananın
Avropa, Asiya, Latın Amerikası ölkələrinin
kitabxanaları ilə əlaqələri qurulub. Kitab
mübadilələri aparılır, müqavilələr
imzalanır”. Qeyd olundu ki, bu yaxınlarda Tacikistan Milli
Kitabxanası tərəfindən Azərbaycan tarixi, incəsənəti,
iqtisadiyyatı ilə bağlı kitabların göndərilməsini
xahiş olunmuşdu və Azərbaycan Milli Kitabxanası
sözügedən kitabları Tacikistana göndərib.
Tədbirdə
çıxış edən Türkmənistanın Azərbaycandakı
səfiri Toyli Komekov Azərbaycan Milli Kitabxanasının iki
qardaş ölkə arasında mədəni əməkdaşlığın
inkişafı yolunda gördüyü işləri yüksək
qiymətləndirdiyini bildirdi: “Türkmənistanın tarixi, ədəbiyyatı,
mədəniyyəti, incəsənəti ilə tanış
olmaq məqsədilə bu gözəl tərtibatlı
kitabları Milli Kitabxanaya təqdim etməkdən qürur
duyuram. Xatırladım ki, artıq «TÜRKSOY kitabxanası»
seriyasından «Məxdimqulu Fəraqi. Seçilmiş əsərləri»
kitabının təqdimatı, məşhur türkmən
şairi Nurməhəmməd Əndəlibin 350 illiyi
münasibətilə Milli Kitabxanada Əndəlibin yeni nəşr
olunmuş əsərlərinin təqdimat mərasimi
keçirilib. Belə layihələri davam etdirəcəyik”.
Bir neçə ölkənin Azərbaycandakı
səfirlərinin də qatıldığı tədbir
iştirakçılarına Türkmənistana həsr
olunmuş film, daha sonra isə kitabxanaya hədiyyə olunan
kitabların sərgisi təqdim olundu.
Gülər
Mədəniyyət.-
2011.- 8 iyul.- S. 3.