“Mübarizə
bu gün də var, yarın da”
Gələcək
oxucularsa belə qələm, belə kəlamlar
intizarında...
Necə
qələm? O sayaq qələm ki, daim həyatın
içinin içində, ətrafın mərkəzinin
nüvəsində, insanın qəlbinin paytaxtında, ədəbiyyat
aləminin kulminasiyasında, ədəbi-bədii təsərrüfatın
əkin-şərt “şum”unda, siyasi-ictimai
biçin-xırmanın xalq mənafeyi “yabalaşmasında”,
vətəndaşlıq daşının bünövrəsində,
milli təəssübkeşlik qəzəb-əsəbinin qan
təzyiqi doğuruşunda, lirik eşqin abır-həya halələrində,
epik məhəbbətin xəlqi xanalarında olurdu...
O aləm-qələm hökm-fərma
qələmlərinin qəvi düşmən əlində
olduğu vaxtlar söyləyirdi ki; “...hər şey
bölünəndə bədbəxt Bakının da
püşkünə internasionalizm düşüb”!..
O qələm bəyanlayırdı
ki; “...necə yəni, “filankəsin vaxtsız vəfatı
münasibətilə başsağlığı veririk”, bəyəm
vaxtında ölən də olur?”
O qələm
“ikiaçılanlar”layırdı ki; “Yaşasın qadın
azadlığı!” - dedi vələdüzzina,
Şorgözlüklə baxdı baldızına”. “Adı
peyğəmbərin adından, Özü - primitiv şeytan!”
“Desələr ki, mələkliyin yalandır, Qaldır kirpiklərini,
inandır”.
Dünyanın psixo-filoloji “dərd”i...
“Qınamıram İsgəndəri
- yaman olur anlamaq dərdi!..”
Bu dərdə “pentalgin”lər
çarə qıla bilməz, qadam! Bu mərəzin
çarəsi Rəsul-loğmanların “qələmgin”lərindədir.
Qələm...
Çoxlarının “çörək ağacı” kimi
baxdığı əşya... Onunçünsə
milli-mənəvi qida, arzu-dilək qılıncı olan o
“ağac” yazırdı ki; “Rza, yaz. Rza, durma, Rza, yaz!..”
Bütün ədəbi-bədii
hal və qalmaqallarda, ictimai-siyasi situasiyalarda, fəlsəfi-idraki
taktlarda sözünün ağası olmuş bu böyük
qələm qulu yorulmadan, usanmadan, çəkinmədən, hər
beş-üç şeirindən bir çəkdiyi
“başağrı”lardan bezikmədən yazdı. Və hələ
ömrünün ortalarında ikən müasirlərindən
birinin yazdığı kimi (“Rəsul durmadı - yazdı,
yazdı, yazdı... Rəsul bu minvalla
yazmasaydı, Rəsul Rza olmazdı!”) Rəsul Rza oldu!
O, bizim (və bir çox başqa
şairlərin) görə bilmədiklərimizi qartal gözlərilə
görür və onların poetik portretini yaradırdı. Görünməzləri də görə bilirdi.
Qayğını gözlə necə görmək
olar ki? Amma o bunu
duyğularımızın “subtitr”inə çevirirdi.
Özü də çox poetik, obrazlı şəkildə:
“Qayğı” sözü, qayğı - özü”. Biz bizdən
rüşvət istəyən sus(!) al (!) izm-realizm məmurlarını,
ali (?!) məktəb müəllimlərini, JEK juklarını
nə məhkəməyə, nə mətbuatda ictimai
qınağa verə bilməyib, infarkt və digər
depressiyalara düşhadüşdə, onun “yapış beləsinin
ayağından, at belinə - ağzı hara düşə-düşə”,
“beləsi “aş”ın müqəyyəd qafiyəsidir” kimi həblərini
hissi orqanizmimizə qəbul edib, müalicə olunurduq...
...Və bir də
görürdün, bu poetik-artillerik kişinin atəş-tikanlı
şeirləri içərisindən əsrarəngiz bir bənövşə
boylanır: “Gözlərinə denən ki, yuxuma girməsinlər...”
O, durmadı - yazdı, yazdı və
nəinki təkcə bənzərsiz Rəsul Rza, həm də
- sovetlərə qarşı bir az yumşaldılması
üçün SSRİ Dövlət mükafatı
laureatı (1951) və haqq-halal Xalq şairi (1960) oldu. Sonra,
siyasi həyatımızla bərabər, ədəbi aləmimizə
də yenilik kimi doğulub, yeniliklər yaradan ümummilli lider
Heydər Əliyev hakimiyyətə gəldi və ona, qurulduğu
gündən kapitalizmin gözünə demokratiya külü
üfürməyə başlamış sosializm
paytaxtından Sosialist Əməyi Qəhrəmanı (1980) təltifatını
da alıb verdi ki, bu ad “qara camaat”dan çox “sarı dana”lara
qayğı göstərən o mərkəzin gözünə
“qələmi dinc durmayan” bu şair üçün
“talisman”lıq etsin.
Nəhayət, onun 19 may 1910-cu il doğum-başlanğıcını məzar-mənzil
başına çatdıran 1 aprel 1981-ci il tarixçəsi
- özü demişkən, hamı üçün
“vaxtsız” vəfat da gəldi...
1 aprel? Zarafat? Bu əbədi dirinin
olümsüzlüyünə inanmamağımız
üçün “yalan günü” hadisəsi?
O, Müşfiq yoxluğuna dair
“Qızılgül olmayaydı” yazmışdı, bəs biz
nə qaralayaq? Onun bu rəngsiz
yazı-obrazına ecazkar-kaleydoskopial “Rənglər”indən nə
qataq? Yazsaq ki, bu ölümlə ədəbiyyatımızın
novatorluq ulduzu söndü - onun “Pəncərəmə
düşən işıq” incisinin ruhu inciməzmi? Desək
ki, əgər o, “Bir gün də insan ömrüdür”
deyirdisə, niyə həkimlər ona, tutalım, 2 apreli də
yaşatmayıblar, bəs onda “Xalq həkimi”
poemasındakı neçə-neçə bədii suala nə
cavab verərik?
1 aprel... Onun bu
dünyadan əbədi köçü? İnanmayaq?
Əbədi sənəti, çox nadir
orijinallığı, ağayana, ciddi, ədəbli şəxsiyyəti
baxımından - bəlkə də. Cismanilik sarıdan
isə - həqiqət! Misraları söz dənizində,
fikir dəryasında hər an diri balıq kimi çapalayan,
oxucu diqqətini bir an belə “yad” getməyə qoymayan bu
“neo-novella” şairin ölümü də ayların-günlərin
1 aprel inancı “janr”ında nəşrləndi. Özü də
sevgi-sevdaların “şanlı məktub”luq çağları
dövründə yepyeni bir ərzi-üslubda
yazdığı, “gözlərinə denən ki, yuxuma girməsinlər”
dediyi ala gözlü yarı - Rəfibəyli Nigarı ilə
eyni əlvida çapında, ayrılıq-“almanax”ında. Bu dünyaya bir gəlib, bir sevib, bir yazıb, o
dünyaya birgə qoşmaq peşində. Hər ikisi də folklorumuzun say-sanballı rəqəmləri
yanına - “yeri göynəyən yeddilər” qarşısına
bir sıfır əlavəsilə. Bu barədə o vaxt
onların daha bir müasiri daha gözəl, daha mənalı
demişdi:
Zalım dünya öz işində,
Gəlişində, gedişində,
Gəl, ağlayaq yetmişində
Sevgili tək ölənlərə...
Yazdıqları, dedikləri, etdikləri...
Əslində,
yazdıqları haqda yuxarıda bir-iki cümlə
yazmışam və aşağıda da, yeri gəldikcə,
bəhs edəcəyəm.
Öncə qoy “Şuşam mənim”
şeirilə özü “bəhs” etsin özü barədə:
Sinəsi qabarıq,
nağıllardan
gəlmiş
pəhləvandır
Şuşam mənim;
Mərdliklə,
gözəlliklə
qoşam mənim.
Azərbaycan torpağının
nur
parçası.
İncə mahnılar yuvası,
Pənahların yadigarı,
Alagözlü,
qarasaçlılar
diyarı.
Səndə Cabbarın, Seyidin,
Nəvvabın, Üzeyirin,
Bülbülün,
neçə-neçə
nəğməkarın,
qoç igidin
nəğməsi
var,
nərəsi
var.
Könüllərdə
neçə-neçə
mahnıların
zümzüməsi,
sözü
qalıb,
Sənin doğma torpağında
neçələrin
gözü qalıb...
...Tarix sənin
torpağında,
daşındadır,
hər
yan-yörən,
hər
dolayın,
hər
cığırın
Azərbaycan - Vətən
dadır...
...Vətənimin
allı-güllü
əlvan-əlvan
çiçək xallı,
göy
dağları!
Kirsin sərin mehi gəlir,
sığallanır
Cıdır düzü.
Dan yerindən qalxan günəş
xəbər
verir -
zəfər
dolu bir gündüzü.
Danış, danış,
Cıdır düzü...
Sağ olsaydı,
danışdırardı “Cıdır düzü”nü.
Özü də öz dilində...
Bu eyhamın “elə-belə”dən
deyil; deyirəm, bəlkə, iki məktəb ilidir ki, yad kəlmələr,
xosunlaşmalar eşidən “Cıdır düzü”müz
öz dilimizdə danışa bilməz daha...
Əgər
çağımızın dağ dərdi,
başımızın “baş problem”i olmasaydı, mən də
bu dünya çaplı şairimizi lokallaşdırıb,
“çəpəriçi” şeirini yox, cahanşümul notlu
misralarından nümunələr verərdim...
Və hələ deyim ki, onun
yazıları tək elə qələmindən
çıxanlar deyil ki! O öz həyatı, əməllərilə
də yazıb-yaradırdı; canından-qanından “cəmiyyət
necə formalaşmalıdır”, “xalq necə millətləşməlidir”,
“ziyalının vəzifələri”, “ər-ərənlik əxlaqı”
kimi nəşriyyatlardankənar nümunəvilik əsərləri
də saçırdı Rəsul Rza.
Bu “janr”lı əsərlərinə,
daha obrazlı desək, neçə-neçə sənətkarları
da əlavə etmək olar - ünlü şairlərimizdən
rəhmətlik Əli Kərimi, çağdaşımız
Fikrət Qocanı və başqalarını. O şairlər
ki, onlar da sözü oxucunun tək elə qulağına,
hissinə yox, həm də - Rəsul Rza kimi - üzünə
deyirlər: “O borc sənin özünsən - özünü
qaytar ona” (Əli Kərim). “Güzgünü
neyləyirsən, ay gözəl, Üzündə gör
özünü, ay gözəl” (Fikrət Qoca).
O, sonralar ideyalarına qarşı
açıq misra-mübarizələr apardığı
Vladimir İliçlər (“Lenin” poeması) haqda yazanda da
mütləq birinciliyə nail olur, onların
etno-doğmalarına göstərirdi ki, yazmağa məcbur
ediləndə də, elə yox, belə yazarlar: “Mən
hansı bir insana bənzədim ki, Lenini - Məzarının
başında cahan ağlamış olsun?!” Və ya
İliçin yatdığı həbsxana keşikçisinə
dair: “Zülmət dayanmışdır nurun keşiyində!..”
Onun dedikləri... Bunlar çox, səhifəmizdə
başqa mətləblər haqda da deməyə yer az qaldığına görə, sizə
birciyini xatırladım. Ensiklopediyada direktor işləyərkən
əməkdaşlardan biri növbəti bir “qorxulu” milli
informasiyanın yeni nəşrə
salınıb-salınmaması ilə əlaqədar: “Rəsul
müəllim, şəxsən mən bundan çox qorxuram,
Siz necə?” - deyə gözünü ona
zillədiyi məqamda Rəsul Rza ona: “Mən? Mən
heç nədən yox, sənin bu “qorxuram” sözündən
qorxuram...” cavabını verir.
Etdikləri... Bu barədə
çox tərif-təbliğ saçmağa, “Amerika”
açmağa ehtiyac yox. Sadəcə,
hansı yaşlarında hansı vəzifə
başlarında olmasını xatırlatmaq kifayət. İyirmi doqquz yaşında Azərbaycan
Yazıçılar İttifaqının sədri. Otuz beşində Azərbaycan kinematoqrafiya naziri.
Əllisində Asiya və Afrika ölkələri ilə
Respublika Həmrəylik Komitəsinin sədri...
Və... yetmiş
birindən ölkənin Fəxri Xiyabanında böyük
Turanın ən fəxri mərhumlarından biri...
Sonda bu aydınlar
aydınının məlum və məşhur -
“Aydındır”ı
haqda bəndənizin
bir-iki kəlməlik, onun özünün isə 6-7
misralıq sözü.
Bir-iki kəlməlik sözüm
bu ki, Rəsul Rzanı şairlikdə, obrazlılıqda, vəzifə-məmurluqda,
ictimai xadimlikdə çox az
başqaları ilə müqayisə etmək olarsa da, milli təəssübkeşlik,
milli (və şəxsi!) qürur, milli ziyalılıq kimi
epitetlər düjünündə onun paralelinə düşən
(bir başqa şairimiz demiş) “ya bir olar, ya iki”.
İndi aşağıda
oxuyacağınız misralardakı obrazı - “şeirin dili”ni yuxarıdakı xarakter-keyfiyyətlər
“düjün”ünün hər biri ilə əvəz edə
də bilərsiniz:
Aydındır şeirin dili -
İstərsən sevincdən,
İstərsən -
qəmdən yaz.
O qədər aydındır ki
bu dil -
Nadan yüz kərə oxusa,
Yenə bir şey anlamaz...
Tahir
Abbaslı
Mədəniyyət.-
2012.- 4 aprel.- S. 11.