Qədim
Gəncənin müasir musiqi
mənzərəsi
Azərbaycanın qədim mədəniyyət
paytaxtlarından sayılan əzəmətli Gəncə
şəhəri hər zaman özünəməxsus sənət
mühiti, kübar və zövqlü tamaşaçı-dinləyici
auditoriyası, milli köklərə bağlı mədəni
tərəqqisi ilə seçilib. Teatr, musiqi, şeir, sənət
ocağı kimi tanınan şəhərin bugünkü mədəni
mənzərəsi də zəngin və çoxşaxəlidir.
İncəsənətin ən
müxtəlif istiqamətlərinin inkişaf etdiyi Gəncədə
dolğun musiqi mühiti də formalaşıb. Azərbaycan
musiqi səhnəsinə əvəzsiz sənətkarlar,
musiqiçilər nəsli verən şəhərin
hazırkı sənət qayğıları barədə
danışmaq maraqlı olardı.
Elə biz də bu məqsədlə
şəhərin musiqi beşiyi sayılan Fikrət Əmirov
adına Gəncə Dövlət Filarmoniyasının
direktoru, Xalq artisti, gözəl ifaçı Şahnaz
Haşımovanın bələdçiliyi ilə şəhərin
musiqi dünyasına qiyabi səfər etdik. Filarmoniyaya 1997-ci
ildən rəhbərlik edən sənətkar ümumilikdə
şəhərin mədəni həyatını gözəl
bilir. Ən azı ona görə ki, o, ömrünün 40
ilini musiqiyə bağlayıb.
Həmsöhbətim hazırda
ölkə başçısının göstərişi
ilə əsaslı şəkildə yenidən qurulan musiqi
ocağı və onun tərkibində fəaliyyət göstərən
kollektivlərin işinə qısa nəzər salmaqla sözə
başladı:
- Şəhərimizin dinləyici-tamaşaçı
kütləsinin əsas mədəni qida qaynaqlarından biri məhz
Fikrət Əmirov adına Gəncə Dövlət
Filarmoniyasıdır. Musiqi ocağı bu statusunu
yarandığı gündən qoruyub saxlaya bilib. Filarmoniya Azərbaycan
SSR Mədəniyyət Nazirliyinin 27 avqust 1990-cı il tarixli qərarı
ilə yaradılsa da, şəhərdə musiqi kollektivlərinin
zəngin fəaliyyət tarixi var. Bu yaradıcılıq yolu
ilk növbədə Azərbaycan musiqi mədəniyyətində
özünəməxsus yeri olan “Göygöl” Dövlət
Mahnı və Rəqs Ansamblının adı ilə
bağlıdır. 1969-cu ildə yaradılan kollektivə
1977-ci ildə dövlət ansamblı statusu verilib. Hazırda
55 nəfərlik heyəti olan “Göygöl” Dövlət
Mahnı və Rəqs Ansamblı dəfələrlə
respublika və xarici ölkələrdə təşkil olunan
müxtəlif musiqi bayramlarında, TÜRKSOY-un təşkil
etdiyi Novruz şənliklərində ölkəmizi layiqincə
təmsil edib. Məhz bu ansamblın bazası əsasında Gəncə
Dövlət Filarmoniyası yaranıb.
Filarmoniyanın nəzdində fəaliyyət
göstərən digər kollektiv Xalq Çalğı Alətləri
Orkestridir. 43 nəfərdən ibarət heyəti olan orkestr
tarixi bayramlar və əlamətdar günlərdə, yubileylərdə,
şəhər günlərində müvəffəqiyyətlə
çıxış edərək gəncəli musiqisevərlərin
ruhunu təzələyir. Musiqi ocağının nəzdində
klassik musiqi ənənələrini təbliğ edən Gəncə
Dövlət Kamera Orkestri də fəaliyyət göstərir.
Repertuarında Azərbaycan bəstəkarları
ilə yanaşı, xarici ölkə bəstəkarlarının
əsərlərinə də yer verən kollektiv klassik musiqi ənənələrinə
xidmət etməkdədir. Filarmoniyanın daha bir heyəti isə
ictimai əsaslarla fəaliyyət göstərən
“Gülşən” rəqs ansamblıdır.
- Müxtəlif zövqlü
tamaşaçıya xidmət edən bu kollektivlərin
repertuarı barədə nə demək olar?
- Biz hər zaman
tamaşaçılarımızın yüksək musiqi
zövqünə arxalanır, konsert proqramlarımızı
da bu məramla hazırlayırıq. Ona görə də
repertuarımız çox zəngin və rəngarəngdir.
Klassik əsərlər, Azərbaycanın xalq
mahnıları, muğamlarımız, milli rəqs nümunələrimiz
gözəl bir çələng şəklində
tamaşaçılara təqdim olunur. Xalq Çalğı
Alətləri Orkestrinin repertuarında Azərbaycan bəstəkarlarından
Üzeyir Hacıbəyli, Qara Qarayev, Fikrət Əmirov,
Süleyman Ələsgərov, Ramiz Mirişli, Cövdət
Hacıyev və başqa bəstəkarların əsərləri
daim yer tutur. Dövlət Kamera Orkestri Azərbaycan və xarici
ölkə bəstəkarlarının məşhur əsərlərindən
ibarət maraqlı konsert proqramları hazırlayır. Şəhərimizdə
bir mədəni-kütləvi tədbir, bayram mərasimi olmaz
ki, biz orada çıxış etməyək. Ona görə
də binamızın təmirdə olmasına baxmayaraq daim
tamaşaçılarla ünsiyyətdəyik.
- Bu gün regionların mədəni
mənzərəsi, orada yaşayan insanların mənəvi-estetik
zövqünün formalaşması üçün bu tip mədəniyyət
müəssisələrinin üzərinə böyük vəzifə
düşür. Bu barədə sizin münasibətinizi bilmək
maraqlı olardı.
- Gəncə Dövlət
Filarmoniyası gəncəlilərin və Gəncə ətrafı
regionların mənəvi qida yeridir. Təsadüfi deyil ki,
bizim kollektiv bu böyük şəhər və ətraf
rayonların musiqi tarazlığını yaradır. Filarmoniya
gəncəlilərin sevimli məkanı, mənəvi qida
yeridir. Azərbaycan ifaçılıq sənətində 40
ilə yaxın əmək fəaliyyətimi göz
önünə gətirərək deyə bilərəm ki, Gəncədə
yaşayan insanların zövqü, musiqiyə, incəsənətə
münasibəti çox yüksəkdir. Elə ona görə
də bizim əməyimiz daim yüksək qiymətləndirilir.
Bu gün klassik musiqiyə marağın azaldığı, bu
musiqinin məxsusi tamaşaçı auditoriyasına
hesablanması barədə səslənən fikirlərə
rəğmən deyə bilərəm ki, gəncəlilər
ən mürəkkəb musiqi əsərlərini, klassik sənət
nümunələrini də böyük maraqla dinləyirlər,
belə konsertlərə çox böyük həvəslə
gəlirlər.
- Filarmoniyanın kollektivlərinin
uğurları, xarici ölkələrdəki
çıxışları barədə nə deyə bilərsiniz?
- Bizim kollektivlər Azərbaycan
musiqisini, onun gözəl və özəl cəhətlərini
dünyanın müxtəlif qütblərinə
daşımaqla, tamaşaçı alqışı
qazanıblar. 2001-ci ildə Norveç Krallığında
möhtəşəm konsertlər vermişik. Respublikanın Əməkdar
artisti, Prezident mükafatçısı Rafael Bayramovun rəhbərliyi
ilə ifaçılarımızın hər bir ölkədə
çıxışları rəğbətlə
qarşılanır. Macarıstanda, İordaniyada maraqlı
proqramlarla çıxış etmişik. Mədəniyyət
və Turizm Nazirliyinin dəstəyi ilə reallaşan bu səfərlərdən
xoş təəssüratlarla qayıtmışıq.
Sentyabrda Türkmənistana səfərimiz olacaq. Kollektiv
hazırda bu qastrol səfəri ilə bağlı
qızğın məşqlər edir.
- Qarşıdakı günlərdə
Gəncə böyük Nizaminin 870 illik yubiley tədbirləri
ilə də diqqət mərkəzində olacaq. Bununla
bağlı yəqin sizin də layihələriniz var?
- Təbii ki, dahi şairin yubileyi
ilə bağlı dünyanın diqqəti bizim gözəl
şəhərimizə yönələcək. Nəinki
yaradıcı kollektivlər, hətta adi sakinlər də bu
böyük tədbirlərə canla-başla
hazırlaşırlar. İnşallah, oktyabr ayında «Nizami Gəncəvi
- 870» adı altında silsilə tədbirlər olacaq.
İnanıram ki, bu tədbirlər çox uğurla həyata
keçiriləcək.
- Filarmoniyanın musiqi kollektivlərində
gənc solist və ifaçılara nə dərəcədə
yer ayrılır?
- Filarmoniyaya gənclərin
çox böyük marağı var. Onlar bu gün
muğamlarımıza, klassik musiqilərimizə çox
böyük sevgi ilə yanaşırlar. Burada istedadı,
yüksək zövqü və təbii ki,
professionallığı olan hər kəsə
özünü realizə imkanı verilir.
- Filarmoniya üçün
yeni, müasir bina inşa olunur. Yəqin yeni şəraitdə yeni fəaliyyət planları da var...
- Gözəl şəhərimizə daha
bir əzəmətli
musiqi ocağı, tikili bəxş etdiyinə, buna xüsusi diqqət göstərdiyinə görə
musiqiçilər adından
ölkə rəhbərinə
dərin təşəkkürümü
bildirirəm. Təbii ki,
hər kəs kimi biz də yeni binada yeni
layihələri və
yeni konsertləri həyəcanla gözləyirik.
- Son olaraq Gəncənin mədəni
mənzərəsi və
musiqi dünyası barədə nə demək olar?
- Gəncənin
mədəni mənzərəsi
və musiqi dünyası bu gün çox böyük sürətlə
inkişaf edir. Şəhər qədim əzəmət
və möhtəşəmliyində,
yeni inkişaf yolundadır. Və təbii
ki, biz də yaradıcı insanlar olaraq, bu dinamik
inkişafda öz sözümüzü deməyə
çalışırıq.
Həmidə Nizamiqızı
Mədəniyyət.-
2012.- 10 avqust.- S. 7.