Sənəti
yaşadanlar
Dəriçilik sənəti Azərbaycanda
qədim tarixə malikdir. Hələ daş dövründə,
ovçuluğun ilk mərhələlərində dəriçilik
özünün ibtidai inkişafına qədəm
qoymuşdu. Zaman keçdikcə gön-dəri məmulatları
da həyatın, məişət və təsərrüfatın
bütün sahələrinə nüfuz etməyə
başlamışdır.
Orta əsrlərdə dəriçilik
xüsusi peşə sahəsinə çevrilmişdir. Bəsit
xalq üsullarından başlayaraq peşəkar sənətkarlığa
qədər inkişaf mərhələləri keçən
bu sahə mədəni irsimizin bir hissəsi kimi bu gün də
yaşadılır, sənətkarlarımız ölkəmizi
müxtəlif sərgi və festivallarda layiqincə təmsil
edirlər.
Avqustun 2-dən 5-dək Rusiya
Federasiyası Tatarıstan Respublikasının Yelabuqa şəhərində
keçirilən türkdilli ölkələrin dəriçilik
sənəti festivalı da belə tədbirlərdən biri
idi. TÜRKSOY-un təşkil etdiyi festivalda Azərbaycanın
dəri sənəti ustalarının əl işləri də
maraqla qarşılanıb.
Festivalda iştirak etmiş Nahid
Vahabov təəssüratını bizimlə
bölüşdü: “Türk dünyasında dəriçilik”
adı altında keçirilən festivalda səkkiz ölkədən
sənətkarlar iştirak edirdilər. Mədəniyyət və
Turizm Nazirliyinin dəstəyi ilə Azərbaycanı bu tədbirdə
dörd sənətkar təmsil edirdi: Pərvanə Eyyubova, Rəşad
Əliyev, Babil Məmmədov və mən. Babil Məmmədov
respublikamızda tanınmış yəhər ustalarından
biridir. Pərvanə xanım dəri məmulatlarından
qobelen nümunələri yaradır. Mən festivalda
balıqqulağı, taxta və dərinin sintezindən yaranan
əl işlərimi nümayiş etdirdim. 20 ilə
yaxındır bu sahədə çalışıram. Əsas
məşğuliyyətim ağac üzərində oyma olsa
da, son zamanlar dəriçiliklə də məşğulam.
Festivala təqdim etdiyimiz işlər böyük maraqla
qarşılandı. Dəridən hazırlanan milli ornamentlə
bəzədilən çantalar, yəhərlər və
suvenirlər sərgiyə gələnlərdə
böyük maraq yaradırdı. Tədbir yüksək səviyyədə
təşkil edilmişdi. Açılışda iştirak edən
Tatarıstan Prezidenti Rüstam Minnixanov festival
iştirakçılarının əl işləri ilə
tanış oldu. Tədbir çərçivəsində
keçirilən simpoziumlarda dəri məmulatlarının
işlənməsi texnikası ilə bağlı məsələlər
müzakirə edildi, usta və araşdırmaçılar
arasında təcrübə mübadiləsi aparıldı.
Qeyd edim ki, indiyədək belə festivallar Qazaxıstan,
Türkiyə, Türkmənistanda da keçirilib. Lakin
Tatarıstanda gerçəkləşən tədbir daha
böyük miqyası ilə yadda qaldı”.
Respublikamızda dəriçiliyin
hazırkı vəziyyəti barədə danışam bu sənətin
daha çox musiqi alətləri sahəsində təşəkkül
tapdığını deyir: “Bu gün dəri ilə işləyən
sənətkarlar elə də çox deyil. Əsasən
nağara, qoşa nağara və dəf kimi alətlərin
hazırlanması ilə məşğul olanlar. Yəhər
ustalarımızın da gözəl əl işləri var.
Bu sənətkarlara bölgələrdə rast gəlmək
mümkündür. Sənətin zəif inkişafına səbəb
tələbatın azlığından irəli gəlir. Məsələn,
festivalda birinci yeri qazanan Qırğızıstanda, habelə
Özbəkistan və Qazaxıstanda da sahəyə tələbat
hiss olunur. Onlar geyimlərində də milli ornamentlərlə
işlənmiş dəri məmulatlarından istifadə edirlər.
Bizdə təmiz dərini tapıb əldə etmək baha
başa gəldiyindən, tələbat az olduğundan bu sahəyə
maraq da azalıb. Amma yenə də sənət yaşayır
və çalışırıq ki, bu sahədə müxtəlif
festival və sərgilərdə ölkəmizi layiqincə təmsil
edək”.
Nadir Vahabov sentyabrda Türkmənistanda
keçiriləcək sərgiyə
hazırlaşdığını bildirdi. Sənətkarın
digər səfəri isə İspaniyada keçiriləcək
sərgi ilə bağlı olacaq.
Lalə
Azəri
Mədəniyyət.-
2012.- 17 avqust.- S. 11.