Aləmlər
-
Müslüm
dünyası və dünya Müslümü...
Elə mahnılar, ariyalar var ki,
Müslüm onları bəlkə yüz kərə oxuyub (hələ
“Azərbaycan”ını demirəm!), ancaq hər dəfə
yeni kimi dinlənilib, təzə kimi eşidilib. Amma
eşitdiyimə görə, onun haqqında yazanlar hər
növbəti materiala qol qoyarkən dəfələrlə əl
saxlamalı, təkrar-təkrar götür-qoy etməli
olurlar: “görəsən, təkrarçılıq kimi
çıxmaz ki?..”
Elə mən də bir ay öncə
bu qəzetdə dərc olunmuş yazımdakı notlardan
qaça bilməyəcəyimi etiraf edirəm (əlbəttə,
yeni baxış, təzə yanaşma, fakt və xatirə-sitatlarla
bahəm).
O yazıda demişdim ki, qeyri-adilik
ondursa, doqquzu Müslümlükdür. Maqomayev ağzını açanadək
də bir fizio-polifonik lad, dad duyulur...
Bəli,
Müslüm hər dəfə SƏSləndikcə,
Müslümü hər dəfə səsləndirdikcə, o
yenidən doğulur. Müslüm elə
bir nəhəng məhəbbətdir ki, onu birdəfəyə
sevib qurtarmaq, sinirib-sonlamaq, doyub-çəkilmək olmur.
Müslüm sağlığında sevgi sellərindən
qurtula bilmirdi. Tamaşa zallarında, konsert
salonlarında nizə nəzərlər, alqış baxışlar
bolluğundan özünü ələ almağa çətinlik
çəkirdi. Foyelərdə,
vestibüllərdə, səhnə arxalarında (hətta
sevgi atəşləri qorxusundan az-az
çıxdığı küçələrdə,
dükan-bazarlarda) adamlar onun başına fırfıra kimi
fırlanırdılar. Bu böyük həqiqətlərə
balaca bir mübaliğə-əlavə: Yer kürəsinin bəşər
Dünyası qisminin çoxu Müslüm Maqomayev oxu ətrafında
fırlanırdı...
Ancaq
o özü...
Amma o özü necə də sadə
idi, saya idi! O, neçə illər necə sənətkarlıq
kumiri idisə, bənzərsiz təvazökarlıq fenomeni
olaraq da qaldı. Onun sir-sifətində bir gilə
də sirr olmadı, bircə eyhamlıq, bircə anlıq “mən!”
görünmədi; daim məni, səni, onu bəyanladı,
bizi, sizi, onları sayınlayıb-yayınladı. Dünyanın bütün ölkələrinə
eyni gözlə baxdı, bütün könüllərə
eyni səs-səda ilə axdı, bütün salonlara eyni sənət
şimşəkləri çaxdı. Ağzından
püskürülən alov-ordu ilə bütün
dünyanı fəth edib, sənət fatehinə
çevrildi. “Müstəmləkə”lərindən
birinin başçısını (Vladimir Putini) isə belə
bir “bac-xərac”a vadar etdi: “Bilmirəm, Maqomayev Azərbaycana daha
yaxındır, yoxsa Rusiyaya?..”
Nəhəng bir
ölkənin başçısını belə bir
dilemma-sual qarşısında qoymaq hər oğulun işi
deyil. Hələ o ölkənin qızlarını,
qadınlarını demirəm! Niyə deyim ki, - onların
bizim bu yar-yaraşıqlı nəğməkarımızı
şəriksiz özəlləşdirdiklərini nəinki həmyerliləri,
hətta onu onlara qısqanan bütün dünya
xanımları da bilir...
O təkcə camal aşiqlərini,
sənətsevərləri deyil, siyasət-rəyasətyürüdücüləri
də məftun etmişdi. Buna dair başqa sitatlar gətirmək
mümkün olsa da, ən maraqlısı yenə bu: “Bilmirəm,
Maqomayev Azərbaycana daha yaxındır, yoxsa Rusiyaya?..” Bunlar diləgələn, ələgələn
suallar idi - onun sağlığında. Bəs
xəyalagələn suallar? Əlbəttə,
onun “yoxluğunda”. Məsələn, görəsən,
bütün bu dünyanın da vahid başçısı
olsaydı və ondan soruşulsaydı ki: “bu saat Maqomayev daha
çox bu dünyada hiss olunur, yoxsa o dünyada” - nə deyərdi?
Məncə, o, işarə edərdi ki, bu
cümlənin vergülü yerində nida işarəsi qoyub,
məsələni xətm etməli. Yəni,
Müslüm daha çox bu dünyada hiss olunur!
Müslüm haqda nəqd
deyilmişlərin hamısı çox maraqlı olub. Hər bir fikir - sözün müsbət mənasında
- təmtəraqlı səslənib. Nəinki
sözün, hətta hərfin. Məsələn, 1972-ci
ilin yayında Moskvadakı ictimai (sözsüz ki, həm də
siyasi) mahiyyətli bir tədbirə qoşulmaq istəyən
dostlarımdan biri keçilməz milis-mühafizə səddi
ilə qarşılaşır, nə qədər
xahiş-minnət (hətta, bir xaxol mayora məlum Azərbaycan
termini ilə “hörmət”) etmək istəsə də,
buraxmırlar. Lakin bir azdan həmin mayorun dabanlarını
bir-birinə çırpıb, “çest” verib, “kardon”u
yardıraraq bir nəfəri hörmət-izzətlə
içəri dəvət etdiyini görən dostumuz,
özünü bilməməzliyə qoyuban “bəs onu niyə
buraxdınız?!” söylər-söyləməz, mayor əntiq
bir məntiqlə səslənir: “On je Muslim Mahamayev!..”
O zaman Maqomayevin - artıq məşhuri-cahan
“Fiqaro tam, Fiqaro tut!”un vur-tut 30 yaşı
vardı... Yox, bu tərz informasiya - bu üslubi-tanıq adama
qanıq vermədiyindən (qəndsiz çay kimi
çıxdığından), belə də demək istəyirəm:
o vaxt bizim Müslümün biz müslim-müsəlmanlarçün
cəmi otuz yaşı vardı, Xristos-xristianlarçünsə,
qafiyəpərdazlıq çıxmasın, “tuz”
yaşı...
Daha nəyi, nələri
vardı? Bənzərsiz surət-sifətlərə
malik bu təkrarsız SƏS sahibi bəzən adamı yaman
çaşdırır, qələmə “yalan-filan”
yazdırır. Necə ki, indi “nəyi
yoxdu ki” əvəzinə, “nəyi vardı” yazdım. Amma neynək, “yanlış da bir naxışdır”
məsələsi.
Yəni
belə ki...
Müslüm Maqomayev
fenomeninə “hər gözəlin bir eybi” məsəlindən
də yanaşmaq qərarındayam. Bu yeganə
“eyib” isə ibarət olsun bundan ki, kökəncə
“xançal çıxdı - qan çıxdı”standan, əkən-doğanca
“Bir cənub şəhərində”n olan bu oğlan
ömrü boyu nə kiməsə bir sillə vurub, nə də
kimdənsə bir acı “billə” yeyib. Müsahibələrinin
birində (“Sobesednik”, ¹24, 1997) də deyib: “Balacalıq
vaxtlarımı xatırlayır və düşünürəm;
o uşaqlıqdan mənə nə qalıb - hansı ki, hərdən
babamın skripkasının kamanını başım üzərində
ən gözəl, ən kəsərli qılınc kimi yellədə-yellədə
- Bakı küçələrilə qaçardım. Mənim qaçaq-qoçaqlığım belə
şeylərdən ibarət olub və nəinki o illərdə,
heç sonralar da heç vaxt, heç kimlə
savaşmamışam. Mən, ümumiyyətlə, təsəvvür
də edə bilmirəm ki, canlı insanı necə vurmaq
olar...”
Deyirəm, bəlkə
bu fiziki-mənəvi gözəlliklər mücəssəməsinin
bütün gənclik, ahıllıq, qocalıq-ucalıq
özəlliklərinin bir damarı da elə bu “eyib”i ilə
bağlıdır?
Amma
bir... işə baxın ki, o, səhnədə, ekranda,
dükanda-bazarda tamam başqa ampluada - vurub-yıxan igid qamətində,
cigit qiyafəsində görünürdü! “Göydə
quşlar qanad saxladı” deyiminin əsasən səslə,
avazla əlaqədar işləndiyini bilirik. Həmin quşların incə, belə demək
mümkünsə, lirik növlərə aid olduğu da
hamıya bəlli. Amma mənə elə gəlir
ki, Müslüm ərazi-arenalı, Müslüm səs-sədalı
göylərdə qanad saxlayasıların çoxusu qartallar,
şahinlər, qızılquşlar olardı. Onun melodik vokal tonalları öz yerində, baritonunun
“tonnaj”ı adamın qulağının çəkic-zindanında
elə əks-sədalanır, elə “sıra dağlar, gen dərələr”lənir,
“ürək açan mənzərələr”ləşir ki,
sənin xəyalının “hanki səmtə, hanki yana”
uçmağından xəbərin olmur. Buna
qədər bildiyin bilgiləri, estafet-trafaretləri, əzbərlədiyin
misraları “yeni redaksiyada” görürsən. Baritonunda “Qol çırmayıb, sən tarlaya
çıxanda”nı “Gur-gurlayıb, sən səhnəyə
çıxanda!” kimi nəzirələrə, melo-“bas”ında
“Səs salma, yatanlar ayılar, qoy hələ yatsın”ı
“Susma ki, yarıoyaqlar da tamam ayılsın” kimi iqtibaslara
varırsan. Bəzən də adamı elə
məqama çatdırır ki, sənət şərtiliyi
ilə həyat həqiqətlərini qat-qarış
salırsan. Deyirsən, yəni
doğrudanmı bu sənətkarın bütün
canı-qanı ilə yaratdığı, səsləndirib
dip-diri təqdim etdiyi bu sözlər haçansa, kiminsə
cansız qələmilə yazılıb? Yəni
doğrudanmı Şeyx Nizami “Başqa bir yarı necə
axtarım, ey nazlı nigar?” misrasını bu qədər təlatümlü,
bu sayaq ildırımmisal yazıb?! Və yaxud onu “Fiqaronun
toyu”nda seyr edərkən məndə yaranmış bir
kataklizm: fikir məni götürmüşdü ki, rejissor (və
libretto) traktovkasına görə, hərəsi öz ifa
mizan-təmrinilə məşğul olan ətrafdakı
aktyorlar onun bu an dünyanı lərzəyə
gətirən ariyasına necə laqeyd qala bilirlər,
axı?!
Vaxtilə
Müslüm Maqomayev fenomeni, Müslüm Maqomayev sehr-sirrilə
bağlı çox suallar mənimçün bağlı
olaraq qalırdı. Lakin onun haqqında yazıları
oxuduqca, onu hədsiz sevənlərin, ona çox
yaxınların xatirələrilə tanış
olduqca çox şeylər
açılıb-aşkarlandı.
Ulu öndər Heydər Əliyevin
sənətkarın 60 illiyi münasibətilə təbrik məktubundan:
“Sizin yaradıcılığınız tariximizin
bütöv bir dövrünün rəmzi olaraq, bütün
dünyada milyonlarla insanın rəğbət və məhəbbətini
qazanmış, bəşər mədəniyyətində
hadisəyə çevrilmişdir. Nadir səsiniz, məftunedici
səhnə istedadınız, yüksək musiqi mədəniyyətiniz
Sizə ifaçılıq sənətinin klassik opera və estrada sahələrində təkrarsız incilər
yaratmaq imkanı vermişdir”.
SSRİ Xalq artisti İosif Kobzon: “Ən
parlaq istedad adamları haqda fikirləşərkən,
Müslüm Maqomayev xatirimə gələn ilklərdəndir”.
Böyük bəstəkar,
SSRİ Xalq artisti Nikita Boqoslovski: “Mən Müslüm
Maqomayevlə tanış olduğum gün iki-üç dəqiqə
ərzində ona çox sözlər dedim. İyirmi ildən
sonra isə düz iki saat birlikdə olarkən, çox təəssüf
ki, gözlərində, sir-sifətində elə bir rüsxət
ifadəsi yaratmadı ki, bunu da söyləyəm: xəbəriniz
varmı ki, Siz 20 ildir SSRİ-nin bir nömrəli müğənnisisiniz!”
Daha neçə-neçə nəhənglərin
bu qeyri-adi nəhəng haqda sözləri!..
Görürükmü,
Müslüm SƏSi Müslüm haqda deyilən SÖZləri
də necə gözəlləşdirir, aktivləşdirir,
obyektivləşdirir! Bəndəniz isə onun
haqqındakı bu yubiley yazısını qəribə bir
“subyektiv”lə bitirmək “qətnamə”sindədir:
yaxşı ki, Müslüm bəzi “supermen esradnik”lər
kimi, od-yalo oğlanların yaxasökdüsünə,
qızğın qızların tumantökdüsünə
“işləyənlər”dən olmadı. Yoxsa o
da mənim və (deyəsən) çoxlarımızın
göz zivəmizdən, söz zirvəmizdən, sevgi ərşimizdən,
böyük, ağıryana mədəniyyət
gürşümüzdən düşərdi. Onun kimi təkrarsız
ciddi sənətkar yalnız ciddi sevgilərə layiqdir...
Tahir Abbaslı
Mədəniyyət.-
2012.- 17 avqust.- S. 12.