Muğama bənzər ömür

Əhməd Bakıxanov - 120

Unudulmaz tarzən, müəllim, bəstəkar və tədqiqatçı Əhməd Bakıxanovun yubiley gecəsi xoş anlarla yadda qaldı

Dekabrın 8-də Beynəlxalq Muğam Mərkəzində məşhur tarzən, pedaqoq, musiqi xadimi, Əməkdar müəllim və Xalq artisti Əhməd Bakıxanovun 120 illik yubileyi qeyd olundu. Tədbir iştirakçıları əvvəlcə sənətkarın həyat və yaradıcılığını əks etdirən fotosərgi ilə tanış oldular.

Gecənin aparıcısı Dövlət Opera və Balet Teatrının baş rejissoru, Əməkdar incəsənət xadimi Hafiz Quliyev Azərbaycan musiqi mədəniyyətində müstəsna xidmətləri olan Əhməd Bakıxanovun həyat və sənət yolu barədə iştirakçılara ətraflı məlumat verdi. Qeyd olundu ki, Əhməd Bakıxanov 1892-ci il sentyabrın 5-də anadan olub. Uzun illər Azərbaycanın Dövlət Konservatoriyasında dərs deyib. Azərbaycan radiosu və televiziyasının xalq çalğı alətləri ansamblının təşkilatçısı və rəhbəri (1941-1973) olub. Ansamblın tərkibinə bas tar, saz, ud, kanon, qoşa-nağara, həmçinin qaboy və fortepiano daxil edib. "Azərbaycan xalq rəngləri", "Azərbaycan ritmik muğamları", "Muğam, mahnı, rəng" əsərlərinin müəllifidir. Əhməd Bakıxanov "Bayatı-Şiraz", "Şur", "Rast", "Çahargah", "Humayun" və s. muğamlarımızın bənzərsiz ifaçısı idi. “Əhməd Bakıxanov musiqiçi, bəstəkar deyil, müəllim kimi fəaliyyət göstərsəydi, yenə tarixdə qalardı” - deyən Hafiz Quliyev sənətkarı mahir muğam bilicisi kimi də yad etdi.

Xalq artisti Əlibaba Məmmədov çıxış edərək Əhməd Bakıxanovla bağlı xatirələrini dilə gətirdi: “Əhməd Bakıxanov Azərbaycan xalqının musiqisi, muğamı üçün çox böyük işlər görüb. O dövrün xanəndələrinin boynunda onun çox böyük haqqı var. Onlardan biri də mənəm. Əhməd Bakıxanov həm də gözəl bəstəkar idi. O olmasaydı, bu gün musiqimizdə bir çox rənglər, dəramədlər olmayacaqdı”.

Akademik Vasim Məmmədəliyev çıxış edərək böyük istedad, böyük zəka sahibi Əhməd Bakıxanovun yaradıcılığını yüksək qiymətləndirdi: “Xan nəslindən, zadəgan nəslindən olan Əhməd Bakıxanov Şərq muğamının mükəmməl bilicisi idi. Çünki o, mükəmməl təhsil almışdı, Şərq ədəbiyyatını bilirdi. Onun ən böyük xidmətlərindən biri xalq çalğı alətləri ansamblının yaradılması idi”.

Xalq artistləri Teymur Mustafayev, Mələkxanım Əyyubova, əməkdar artistlər Gülüstan Əliyeva, Səbuhi İbayev, gənc xanəndə Səbinə Ərəblinin çıxışları gecəyə xüsusi rəng qatdı. Xalq artisti Arif Babayevin çıxışı isə möhtəşəmliyi ilə yadda qaldı.

Əhməd Bakıxanovun oğlu, Xalq artisti, professor Tofiq Bakıxanovun atasına ithaf etdiyi kompozisiyanı Əməkdar artist, virtuoz qarmon ifaçısı Zakir Mirzəyev səsləndirdi.

A.Zeynallı adına Bakı Musiqi Kollecinin direktoru Nazim Kazımov çıxış edərək bildirdi ki, ənənəvi olaraq Əhməd Bakıxanovun yubileylərində gənc tarzənlərin müsabiqəsi keçirilir. Sənətkarın 120 illik yubileyi münasibətilə keçirilən builki müsabiqədə IV kurs tələbəsi Səxavət Məmmədov birinci yerə layiq görülüb. Gecədə qalibə diplom təqdim olundu. 20 il əvvəl Əhməd Bakıxanovun 100 illiyində tar müsabiqəsinin qalibi olmuş Ələkbər Ələkbərovun solo ifası ilə gecə davam etdi.

Yubiley mərasimində Xalq artisti, tarzən Möhlət Müslümovun rəhbərlik etdiyi Əhməd Bakıxanov adına Xalq Çalğı Alətləri Ansamblı mükəmməl ifaları ilə böyük insanın ruhunu şad etdi.

Jurnalist-publisist İttifaq Mirzəbəyli çıxış edərək sənətkarın 120 illiyi münasibətilə yenicə çapdan çıxan “Əhməd Bakıxanov xatirələrdə” kitabı barədə iştirakçılara məlumat verdi. Kitabda tanınmış sənət adamlarının Əhməd Bakıxanov haqqında dəyərli xatirələri, tədqiqatları, o cümlədən məqalələri yer alıb.

Sonda Əhməd Bakıxanovun oğlu Tofiq Bakıxanov çıxış edərək gecənin təşkilatçılarına, iştirakçılarına öz təşəkkürünü bildirdi: “Atalar deyib ki, əsl sənətkar odur ki, özündən sonra iz qoyub getsin. Belə sənətkarlardan biri də Əhməd Bakıxanovdur. Bu gün də onun gözəl davamçıları var”.

Təranə Vahid

Mədəniyyət.- 2012.- 12 dekabr.- S. 5.