İşıqlı
insanların sayəsində yola
çıxdım...
Kitabxanaçıların II Ümumrespublika müşavirəsi ərəfəsində
görkəmli alim, BDU-nun
kitabxanaşünaslıq kafedrasının müdiri,
tarix elmləri doktoru,
professor, BMT yanında Beynəlxalq
İnformasiyalaşdırma Akademiyasının akademiki,
“Şöhrət” ordenli Abuzər Xələfovun
həyat yoluna nəzər saldıq.
Ömrünün yarım əsrdən çoxunu kitabların arasında keçirən, milli kitabxanaşünaslıq elminin banisi kimi şöhrət tapan Abuzər Xələfovun bu sahədə xidmətləri əvəzsizdir. Ötən ilin elə bu günlərinin birində Abuzər Xələfovla iş otağında görüşüb ömür kitabını birgə vərəqləmişdik. Yaxşı kitablar kimi, yaxşı ömürləri də təkrar-təkrar “oxumağa” dəyər.
Ömrün səhifələri
Abuzər Alı oğlu Xələfov 1931-ci il dekabrın 25-də Qərbi Azərbaycanın Göyçə mahalının Cil kəndində anadan olub. 1950-ci ildə Toxluca kənd orta məktəbini bitirdikdən sonra Azərbaycan Dövlət Universitetinin filologiya fakültəsinin kitabxanaçılıq şöbəsini bitirib. 1962-ci ildə onun fəal səyi nəticəsində kitabxanaçılıq şöbəsi müstəqil fakültə kimi fəaliyyətə başlayıb. Abuzər Xələfov fakültənin ilk dekanı olub və 25 il fasiləsiz bu vəzifədə çalışıb. 1962-ci ildən bu günədək kitabxanaşünaslıq kafedrasının müdiridir. Keçmiş SSRİ məkanında kitabxana işinin tarixi sahəsində ilk tarix elmləri doktorudur.
Abuzər Xələfov o xoşbəxt insanlardandır ki, xeyirxah insanların əhatəsində böyüyüb, onların xeyir-duası ilə yola çıxıb.
- Universitetdə
oxuyarkən mənim böyük müəllimlərim
olub. Mir Cəlal Paşayev, Məmmədcəfər Cəfərov,
Həmid Araslı, Mirzə Feyzullayev və
neçə-neçə belə böyük
şəxsiyyətlərin bulağından su
içmişəm, belə nəhəng şəxsiyyətlərin
əhatəsində böyümüşəm. Məni universitetdə Yusuf Məmmədəliyev
saxlayıb. O vaxt universitetin rektoru idi. Prorektora tapşırdı ki, mənə dərs versinlər. Dedi ki, biliyini
bilmirəm, amma çox mübariz adama oxşayır. Bunu saxlayın, bu ixtisası dirçəldə
bilər.
Çox keçmir ki,
akademikin uzaqgörənliyi
özünü doğruldur.
Yusuf Məmmədəliyevdən
sonra akademik Şəfayət Mehdiyev rektor olur. Onun dövründə kitabxanaçılıq
şöbəsi müstəqil
fakültəyə çevrilir.
- 1962-ci ildə
kitabxanaçılıq fakültəsi
yaradıldı. Məni də
fakültənin dekanı
təyin elədilər.
25 il bu
vəzifədə çalışdım.
50 ilə yaxındır
ki, kitabxanaşünaslıq
kafedrasının müdiriyəm.
İşıqlı insanların sayəsində
yola çıxdım,
onların xeyirxahlıqlarını,
diqqətlərini, qayğılarını
zaman-zaman hiss elədim.
Mən təbiət etibarı ilə mübariz adam
olmuşam. Bu fakültəni öz övladım hesab edirəm.
Abuzər Xələfov sanballı monoqrafiyaların, kitabların və dərsliklərin müəllifidir.
- İndiyədək 34 kitabım çap olunub. “Kitabxana və cəmiyyət” kitabımı oxuyan hər bir insan dərk edəcək ki, kitabxana cəmiyyətin inkişafında çox dəyərli bir mədəniyyət ocağıdır. Kitabxanaçı millətin formalaşmasında, milli ideologiyanın yayılmasında, mədəniyyətimizin, tariximizin inkişafında böyük xidməti olan mütəxəssisdir. Mən ona görə bu sənəti sevirəm ki, bu sənət doğma xalqımın ümumi inkişafına xidmət edir, xalqımın tarixini qoruyub nəsildən-nəslə ötürür.
34 kitabın müəllifi ən çox zəhmət çəkdiyi kitab barədə danışdı:
- Ən çox zəhmət çəkdiyim kitab “Azərbaycanda kitabxana işinin tarixindən” adlı üçcildlikdir. Min səhifə həcmində olan topluda qədim zamanlardan bizim dövrə qədər Azərbaycanda kitabxana işinin tarixindən bəhs edir. Bu kitabı yazmaq üçün Azərbaycan tarixini dərindən öyrənmişəm. Çünki kitabxana tarixi cəmiyyət tarixinin, xüsusilə mədəniyyət tarixinin tərkib hissəsidir. Ona görə də mən əvvəlcə xalqımızın milli tarixini öyrənmişəm, o tarixə söykənmişəm. Sonra Azərbaycan ədəbiyyatını dərindən mənimsəmişəm. Azərbaycan klassiklərinin əsərlərini oxumuşam, oradan bəhrələnmişəm. Nizaminin əsərlərində qeyd edilir ki, o zaman Bərdədə kitabxana olub. Bu qiymətli faktı başqa haradan tapmaq olardı? Bəli, bu kitabı araya-ərsəyə gətirmək üçün illər boyu zəhmət çəkmişəm. Bu mənim xalqım qarşısında xidmətimdir.
Təranə Vahid
Mədəniyyət.-
2012.- 19 dekabr.- S. 6.