Qəbələdə ədəbi-bədii gecə keçirilib

Qəbələdə Azərbaycan milli dramaturgiyasının banisi Mirzə Fətəli Axundzadənin 200 illik yubileyinə həsr olunmuş ədəbi-bədii gecə keçirilib. Prezident İlham Əliyevin “Mirzə Fətəli Axundzadənin 200 illik yubileyinin keçirilməsi haqqında” 2010-cu il 13 aprel tarixli sərəncamına uyğun olaraq Qəbələ Mərkəzi Rayon Kitabxanasında keçirilən tədbirdə rayon mədəniyyət və turizm, gənclər və idman, təhsil şöbələrinin əməkdaşları, kitabxana işçiləri, ziyalılar, müəllimlər və fəal oxucular iştirak ediblər.

Tədbirdə görkəmli ədib, mütəfəkkir, milli dramaturgiyamızın banisi M.F.Axundzadənin yaradıcılığından, kəşməkəşli həyat yolundan geniş söz açılıb. Yazıçı-dramaturqun Azərbaycan ədəbiyyatında azad düşüncənin ifadəçisinə çevrildiyi, ətrafındakı zülməti, cəhaləti, nadanlığı ifşa edərək xalqa işıq, maarifçilik yolunu göstərdiyi vurğulanıb. Belə tədbirlərin gənclər üçün əhəmiyyəti, gənc nəslin öz klassiklərini tanımalarında bir vasitə olduğu nəzərə çatdırılıb. Axundzadənin fəlsəfi və maarifçilik düşüncələrini bu gün üçün də aktual hesab edən tədbir iştirakçıları onun Azərbaycan ədəbiyyatı tarixində silinməz izlər buraxdığını söyləyiblər.

Tədbirin bədii hissəsində dramaturqun “Hekayəti-mərdi-xəsis” komediyası əsasında çəkilmiş “Hacı Qara” filmi nümayiş etdirilib.

Mədəniyyət.- 2012.- 20 iyul.- S. 5.