“Bənzərəm bir qocaman dağa ki...”

İyunun 12-də AMEA-nın Mərkəzi Elmi Kitabxanasında görkəmli satirik şair Mirzə Ələkbər Sabirin 150 illik yubileyinə həsr olunmuş “Bənzərəm bir qocaman dağa ki...” mövzusunda konfrans keçirilib. Kitabxananın direktoru Aybəniz Əliyeva-Kəngərli tədbirin Prezident İlham Əliyevin Mirzə Ələkbər Sabirin 150 illik yubileyinin keçirilməsi haqqında sərəncamının icrası ilə bağlı keçirildiyini deyib.

Tədbirdə “Milli yaddaşımızın fəryadı”, “Gülüşün poetik dərki”, “Sabirin yaşayan ənənələri”, “Satirik sözün cazibəsi” mövzularında məruzələrdə böyük satirik şairin öz yaradıcılığında dövrün ən ciddi sosial-siyasi münasibətlərini, müxtəlif ictimai baxışlarını çox canlı şəkildə əks etdirdiyi və bu yolla xalqın rəğbətini qazandığı vurğulanıb.

Sonra tədbir iştirakçıları dahi sənətkarın əsərlərindən ibarət sərgi ilə tanış olublar. Sərgidə Mirzə Ələkbər Sabirin həyat və yaradıcılığını əks etdirən “Seçilmiş əsərləri”, “Hophopnamə”lər, “Məktəb şərqisi”, ”Şeirlər məcmuəsi”, o cümlədən Sabir haqqında yazılmış kitablar nümayiş olunub.

Mədəniyyət.- 2012.- 13 iyun.- S. 13.