Türkiyədə
Azərbaycan Mədəniyyəti Günləri başa çatdı
Türkiyədə iyunun
18-də başlanan Azərbaycan Mədəniyyəti
Günləri İzmir şəhərində
keçirilmiş tədbirlərlə başa çatıb. İyunun
20-də İzmirdəki Egey Universitetinin Atatürk Mərkəzində
Azərbaycan incəsənət ustalarının konserti olub.
Konsertdən əvvəl Azərbaycanın İstanbuldakı baş konsulu Həsən Zeynalov, İzmir valiliyi və bələdiyyəsinin rəhbərləri çıxış edərək iki qardaş ölkənin ortaq mədəni irsinin tanıdılması baxımından bu tədbirlərin əhəmiyyətindən bəhs ediblər. Çıxışlarda vurğulanıb ki, onilliklər boyu İzmir və Bakı qardaş şəhərlər olmuş və bu gün də sıx əlaqələr davam edir.
Konsertdə
Qara Qarayev adına
Dövlət Kamera Orkestri
(bədii rəhbər və baş dirijor Xalq artisti
Teymur Göyçayev),
Dövlət Rəqs Ansamblı (bədii rəhbər Xalq artisti Afaq
Məlikova), solistlər - vokalçı, Xalq
artisti Samir Cəfərov
və Aygün Zeynalova,
muğam ifaçıları, respublika müsabiqələri
laureatları Babək Niftəliyev və Arzu
Əliyeva, Əməkdar artist Sahib Paşazadənin rəhbərliyi ilə instrumental ansambl, balaban ifaçısı, Əməkdar artist Şirzad Fətəliyev
çıxış ediblər. Türkiyəli
tamaşaçılar incəsənət
ustalarımızın çıxışlarını
alqışlarla qarşılayıblar. Sonda
Əməkdar artist Azərinin ifa etdiyi mahnılar sürəkli
alqışlar doğurub.
Mədəniyyət.-
2012.- 22 iyun.- S. 2.