Uşaq-gənclər
muğam ifaçılarının respublika müsabiqəsinə yekun
vurulub
Mədəniyyət və Turizm
Nazirliyinin təşkilatçılığı ilə
Masallı şəhərində keçirilən Uşaq-gənclər
muğam ifaçılarının VI Respublika müsabiqəsinə
yekun vurulub.
Müsabiqədə
13-25 yaşınadək ifaçılar, habelə şəhər
və rayon mədəniyyət müəssisələri
nəzdində fəaliyyət göstərən bədii-özfəaliyyət
kollektivlərinin üzvləri iştirak
ediblər. Müsabiqənin keçirilməsində
məqsəd Azərbaycan musiqi xəzinəsinin
nadir incilərindən olan
muğamların, xalq mahnıları və
təsniflərin bölgələrdə geniş
təbliği, yeni istedadların üzə
çıxarılması və mədəniyyət
ocaqlarında bu işin
daha da
canlandırılmasına nail
olmaqdır.
Mədəniyyət və Turizm Nazirliyinin Regionlarla iş sektorunun aparıcı məsləhətçisi Oqtay Muxtarovun verdiyi məlumata görə, müsabiqə üç mərhələdə aparılıb. İlk turun qalibləri şəhər, rayon mədəniyyət və turizm şöbələri tərəfindən yaradılmış münsiflər heyətlərinin qərarı ilə müəyyənləşib. II və III turun qalibləri isə müsabiqənin münsiflər heyəti - respublikanın xalq artistləri Ağaverdi Paşayev, Səkinə İsmayılova, Zabit Nəbizadə, əməkdar artistlər Gülyaz Məmmədova və Gülüstan Əliyeva tərəfindən seçilib.
Uşaq, yeniyetmə və gənclər arasında keçirilən müsabiqədə 49 rayon və şəhərdən 100 nəfərədək muğam ifaçısı iştirak edib. Masallı şəhərindəki Nizami Gəncəvi adına parkda gerçəkləşən yekun turda hər iştirakçı bir muğam və bir xalq mahnısı ifa edib. İfaçıları tarda Mahmud Əliyev, Elşən Məmmədov, kamançada Samitxan Mürşüdov, Fariz Hüseynov, nağarada Mirzağa Zülfəliyev müşayiət ediblər.
Sonra münsiflər heyətinin qərarı əsasında qaliblərin adları açıqlanıb. Asya Məmmədova (Qubadlı) I, Hənifə Hüseynova (Sumqayıt) II, Cahangir Əliyev (Lerik) III, Səbuhi Abdullazadə (Şirvan) IV yeri tutub. Qaliblərə müvafiq dərəcəli diplom və pul mükafatı təqdim olunub. Səxavət Əsədullazadə (Astara), Murad Kərimzadə (Füzuli), İsmayıl İsgəndərov (Ağdaş) və Tural Məmmədov (Ağcabədi) həvəsləndirici diplom və pul mükafatları ilə təltif ediliblər.
Müsabiqə başa çatdıqdan sonra ümummilli lider Heydər Əliyevin anadan olmasının 89-cu ildönümünə həsr edilmiş konsert proqramı təqdim olunub. Konsertdə müsabiqə qaliblərinin, həmçinin Xalq artisti Zabit Nəbizadənin, əməkdar artistlər Gülyaz Məmmədova, Gülüstan Əliyevanın ifasında xalq mahnıları və muğamlar səsləndirilib.
Ceyhun
Mədəniyyət.-
2012.- 9 may.- S. 8.